1Ona fetalai mai lea o Ieova ia Mose, ua faapea mai,
2Ia e tautala atu i le fanauga a Isaraelu, ia e aumaia foi mai ia te i latou o tootoo, taitasi le aiga o latou tamā ma le tootoo; ia e au mai i o latou alii sili i aiga o latou tamā, o tootoo e sefulu ma le lua; ia e tusi foi le igoa o le tagata i lona tootoo.
3Ia e tusi foi le igoa o Arona i le tootoo o Levi; auā e taitasi le tootoo i matai o aiga o latou tamā.
4Ia e tuu ai foi i le fale fetafai o le faapotopotoga i luma o le atolaau o le tulafono, o le mea tatou te fetaiai ai ma outou.
5Ona oo ai lea ina fotu mai le tootoo o le tagata ou te filifilia; ou te faagata foi i o‘u luma o muimuiga a le fanauga a Isaraelu ua latou muimui ai ia te oulua.
6Ua fai atu foi Mose i le fanauga a Isaraelu, ona au mai ai lea ia te ia e o latou alii sili uma lava, e taitoatasi le alii sili ma le tootoo i aiga o latou tamā, o tootoo e sefulu ma le lua; sa faatasi foi le tootoo o Arona ma o latou tootoo.
7Ona tuu ai lea e Mose o tootoo i luma o Ieova i le fale fetafai e i ai le tulafono.
8Ua oo i le aso taeao, ona ulu atu ai lea o Mose i le fale fetafai e i ai le tulafono, faauta foi, ua fotu mai le tootoo o Arona mo le aiga o Levi; ua fotu mai lava, ua matala mai fuga, ua fua mai foi sekati matutua.
9Ona ave ai lea e Mose o tootoo uma nai luma o Ieova i le fanauga a Isaraelu uma lava, ona latou iloilo ai lea, ua latou taitoatasi ma ave lona tootoo.
10Ona fetalai mai lea o Ieova ia Mose, Ina toe au mai ia le tootoo o Arona i luma o le atolaau o le tulafono e tuu ai, e fai ma faailoga i tagata fouvale; e te faagata ai a latou muimuiga i o‘u luma, ona le oti ai lea o i latou.
11Ona faia lea e Mose e pei ona poloai mai ai o Ieova ia te ia, ua faapea lava ona fai e ia.
12Ona fai mai lea o le fanauga a Isaraelu ia Mose, ua faapea mai, Faauta, a oti i matou, o le a matou fano, o i matou uma lava o le a matou fano.
13Ai se faalatalata atu i le malumalu o Ieova e oti lava ia; pe faaumatia ea i matou i le oti?
Who We AreWhat We EelieveWhat We Do
2025 by iamachristian.org,Inc All rights reserved.
