1Oi talofa ia te oe o lē faatafuna atu, a e le faatafunaina oe; ua e faasaua, a e latou te le faasaua ia te oe; a tuua e oe ona faatafuna atu, ona faatafunaina lea o oe; a uma lou faasaua, ona latou faasaua lea ia te oe.
2Ieova e, ia e alofa mai ia te i matou, ua matou faatalitali atu ia te oe; ia fai oe mo latou lima i taeao uma, o lo matou faaola foi i ona po o le puapuaga.
3O le leo o le taalili na sosola ai le nuu; o lou tulai na faataapeapeina ai o nuu ese.
4E faaputuina la outou vete e pei ona aoaoina mea e le sē kasili; e pei ona fetaufetulia‘i o sē akerisi, e faapea foi ona fetaufetulia‘i i ai o tagata.
5E silisili Ieova; auā o loo afio o ia i lugā; ua faatumuina e ia Siona i le faamasinoga ma le amiotonu.
6O ia o le e tumau ai ou tausaga, o le tele o le faaolataga, o le poto ma le malamalama; o le mata‘u ia Ieova, o lana oloa lea.
7Faauta, e alalaga o latou tagata totoa i fafo; e tagi lotulotu o le sāvali o le faaleleiga.
8Ua gaogao ala tele, e le toe ai se malaga; ua na tuumavaega, ua ia inosia aai, ua ia le manatu i tagata.
9O loo faanoanoa le laueleele, ua mamae; ua faamaina Lepanona, ua mamae; ua avea ma nuu lafulafua Sarona; ua malili lau laau o Vasana ma Karamelu.
10Ua fetalai mai Ieova, Ou te tulai atu nei lava; e viia nei lava a‘u; e faasilisiliina nei a‘u.
11E totō outou o mutia magumagu, tou te fananau mai o tagutugutu o saito; o lo outou mānava o le afi lava lea e ‘aina ai outou.
12E avea foi le nuu e pei ona mu o umu panisina; e pei o laau tuitui ua salaina, e susunuina i latou i le afi.
13Outou o e mamao, ia outou faalogologo mai i le mea ua ou faia; outou foi o e latalata mai, ia outou iloa lo‘u mana.
14O e agasala i Siona ua fefefe i latou; o e faalematau ua maua i latou i le mata‘u. O ai ea so tatou na te mafaia ona nofo i le afi mu tele? O ai ea so tatou na te mafaia ona nofo i le afi e faavavau?
15O le ua savali i le amiotonu, ma tautala i upu tonu; o le ua ‘ino‘ino i le oloa e maua i le faasaua, ua liaiina e ia ona lima ina ne‘i tago i se taui, ua pupuni e ia ona taliga ina ne‘i faalogo atu i pulega o fasiga, ua moe foi ona mata ina ne‘i vaai atu i le leaga.
16E mau lava o ia i le mea maualuga, o ‘olo papa o lona malu lea; e foaiina ia te ia ana mea e ‘ai, e tumau pea ia te ia le vai.
17E maimoa ou mata i le tupu i lona matagofie; latou te vaavaai i nuu mamao.
18E manatunatu lou loto i le mea sa mata‘u ai. O ifea ea le tusiupu? O ifea ea le tali taulaga? O ifea ea le faitau ‘olo?
19E te le toe vaaia le nuu feai, o le nuu upu faigata e le mafai ona lagona; ua ese a latou gagana e le mafai ona iloa.
20Vaai atu ia i Siona le aai o tatou faapotopotoga; e iloa lava e ou mata o Ierusalema le mea e nofo filemu ai, le fale ie e le tatalaina, e le toe liaiina lava sona fao, e le motusia lava sona maea e tasi.
21Auā e ia te i tatou i lea mea o Ieova lē silisili, e fai o ia ma vaitafe ma maga vai lautetele; e le alu i ai se vaa e fai foe, e le ui ane i ai foi e vaa tele.
22Auā o Ieova o lo tatou faamasino ia, o Ieova o lo tatou fai tulafono, o Ieova o lo tatou tupu, o ia lava e faaola ia te i tatou.
23Ua malū ou maea, latou te le mafai ona faamauina o le tulāfanā, latou te le mafai ona fai la; ona tufatufaina ai lea o le oloa o le vete tele; e vete lava e tagata pipili.
24E le fai mai foi se tasi ua mau ai, Ou te ma‘i; e faamagaloina agasala a le nuu e nonofo ai.
Who We AreWhat We EelieveWhat We Do
2025 by iamachristian.org,Inc All rights reserved.
