1Ou te fai atu foi, o aso uma o itiiti ai le suli, e ui lava o ia e ana mea uma, e leai se mea e ese ai o ia ma le pologa;
2a e pule ia te ia faatamā ma auauna e pule, seia oo atu i ona po na tuupoina e le tamā.
3Sa faapea foi i tatou ina o tama iti, sa nofo pologa i tatou i mataupu muamua a le lalolagi.
4A ua oo atu i le faaatoaga o tausaga, ona auina mai lea e le Atua o lona Alo, na fanau i le fafine, na fanau ua nofo i le tulafono;
5ina ia faatau mai e ia i e na nofo i le tulafono, ia avea i tatou ma tamafai.
6O atalii outou, o le mea lea ua auina mai ai e le Atua le Agaga o lona Alo i o outou loto, o valaau, Ava, le Tamā e.
7O lea e te le se pologa ai i ona po nei, a o le atalii; a e afai o le atalii, o le suli foi o le Atua ia Keriso.
8E moni, o ia ona po ua le iloa ai e outou le Atua na fai ai outou ma pologa i mea e leai lava so latou atua;
9a o nei ona po ina ua outou iloa le Atua, a e moni ua iloa lava outou e le Atua, pe faapefea ona outou toe liliu i mataupu muamua e vaivai ma faatauvaa, ua outou toe mananao ea ia outou toe nofo pologa i ai?
10Tou te anaana i aso, ma masina, ma tau, ma tausaga.
11Ou te fefe ia te outou, ina ne‘i iu ina faaleaogaina la‘u galuega na ou faia ia te outou.
12Le au uso e, ou te aioi atu ia te outou, ia faapei o a‘u outou, auā o a‘u ua pei o outou; na le agaleagaina a‘u e outou i se mea e tasi.
13Ua outou iloa foi na ou folafola anamua le tala lelei ia te outou ina ua vaivai lo‘u tino;
14o le tofotofo foi sa ia te au i lo‘u tino e lei ta‘ufaatauvaaina lea e outou, pe inosia e outou, a ua outou talia mai a‘u peiseai se agelu a le Atua, peiseai o Keriso Iesu.
15Pe faapefea foi lo outou manuia sa fai mai? auā o la‘u mau lenei ia te outou, ana outou mafaia, po ua outou sasali mai o outou mata, ma foai mai ia te au.
16Ia, ou te se ita atu ea ia te outou i lo‘u ta‘uina atu ia te outou le upu moni?
17Latou te maelega ia te outou, a e faaletatau; a e peitai latou te fia faateaeseina outou, ina ia outou maelega ia te i latou.
18A e lelei ona maelega i le mea lelei e le aunoa, aua ne‘i gata ina o ia te outou o a‘u.
19La‘u fanau e, ou te toe oono ai i o‘u faatiga, seia tino Keriso i totonu ia te outou,
20ou te loto ina ia ou i ai ia te outou i ona po nei, ma tautala faatatau atu, auā ua faaletonu lo‘u manatu ia te outou.
21Ina ta‘u mai ia ia te au outou o e fia nonofo i le tulafono, tou te le faalogo atu ea i le tulafono?
22Auā ua tusia, sa ia Aperaamo atalii e toalua, o le tasi na fanau mai i le fafine nofo pologa, a o le tasi i le fafine o le tama a le eleele.
23A e peitai o le tama a le fafine nofo pologa, ua fanau lea i la le tino; a o le tama a le fafine o le tama a le eleele, na fanau ia ona o le mea na folafolaina.
24Ua fai ma mea faataoto ia mea; auā o fafine nei o feagaiga e lua ia; o le tasi mai le mauga o Sinai, e fanau mai tama e fai ma pologa, o Akara lea;
25auā o Akara lenei o le mauga o Sinai ia i Arapi; ua la tutusa ma Ierusalema i ona po nei, ua nofo pologa atoa ma lana fanau;
26a o Ierusalema i lugā o le tama a le eleele ia, o le tinā o i tatou uma lava ia.
27Auā ua tusia, Ia e olioli oe le fafine e pa sa le fanau; ia e uio ma leo tele oe sa le faatiga; auā ua tele le fanau a le ua nofo fua i la le nofo tane.
28A o i tatou, le au uso e, o fanau i tatou e tusa ma le mea na folafolaina, pei o Isaako;
29a e faapei ona saua o le na fanau i la le tino i le na fanau i la le Agaga i ia ona po, e faapea foi i ona po nei.
30A e peitai se a ea e fai mai ai le Tusi? Ina tutuli ia le fafine nofo pologa ma lana tama; auā e le tofia le tama a le fafine nofo pologa faatasi ma le tama a le fafine o le tama a le eleele.
31O lenei, le au uso e, e le ni fanau i tatou a le fafine nofo pologa, a o le fafine o le tama a le eleele.
Who We AreWhat We EelieveWhat We Do
2025 by iamachristian.org,Inc All rights reserved.
