1Ua manatu Solomona e fai se fale mo le suafa o Ieova, ma se fale mo lona malo.
2Ona faitauina lea e Solomona o tagata e fitu sefulu o afe e ave avega, ma tagata e valu sefulu o afe e talai maa i le mauga, ma ē pule ia te i latou e tolu o afe ma le ono o selau.
3Ua ave foi le feau a Solomona ia Hiramo le tupu o Turo, ua faapea atu, E pei ona e faia ia Tvaita lo‘u tamā, na e au mai ia te ia o arasi e fai a‘i lona fale e nofo ai, ia faapea ona fai ia te au.
4Faauta, ou te faia se fale mo le suafa o Ieova lo‘u Atua, e faapaiaina mo ia, e faamu ai i ona luma o mea manogi lelei, ma le areto foi e laulauina i luma e le aunoa, ma taulaga mu i le taeao ma le afiafi, ma sapati, ma masina faatoa vaaia, ma tausamiga ia Ieova lo matou Atua. O le tulafono lenei ia Isaraelu e faavavau.
5O le fale ou te faia e tele lava; auā e sili lo matou Atua i atua uma.
6A o ai ea se na te mafaia ona fai o se fale mo ia, auā o le lagi, ma le lagi o lagi e le ofi ai o ia? O ai foi a‘u nei ou te faia se fale mo ia, tau lava o se fale e mu ai mea manogi i ona luma?
7O lenei, ia e auina mai ia te au se tagata poto e galue i auro, ma ario, ma ‘apa memea, ma uamea, ma ie pāuli, ma le mūmū, ma le uli, ma ua iloa togitogi mea, ia faatasi ma e ua popoto ua ia te au i Iuta ma Ierusalema, o e na filifilia e Tavita lo‘u tamā.
8Ia e au mai foi ia te au, mai Lepanona, o laau o arasi, ma perosi, ma alemuka; auā ua ou iloa o au auauna e popoto e ta laau i Lepanona; faauta foi, o a‘u auauna latou te faatasi ma au auauna,
9Ia sauniuni foi ma a‘u laau ia tele; auā o le fale ou te faia e matuā tele lava.
10Faauta foi, ou te avatu i au auauna, o tufuga ta laau, e lua sefulu o afe o kori o saito ua solia, ma le lua sefulu o afe o kori o karite, ma le lua sefulu o afe o paita o uaina, ma le lua sefulu o afe o paita o suāuu.
11Ona fai mai lea o Hiramo le tupu o Turo i le tusi na ia avatua ia Solomona, Ua alofa mai Ieova i lona nuu, o le mea lea ua ia fai ai oe ma tupu ia te i latou.
12Ua faapea mai foi o Hiramo, Ia faamanu ia Ieova le Atua o Isaraelu, o le na faia le lagi ma le lalolagi, o le ua foai mai ia Tavita le tupu le atalii poto, o lē iloa mafaufau ma le faautauta, e fai ai se fale mo Ieova, ma se fale mo lona malo.
13O lenei, ua ou auina atu le tagata poto, ua iloa faautauta, sa ia Hiramo lo‘u tamā.
14O le tama a le fafine o le fanauga a Tanu, a o lona tamā o le tagata o Turo, e poto i galuega i auro, ma ario, ma ‘apa memea, ma uamea, ma maa, ma laau, ma ie pāuli, ma le uliuli, ma le ie vavae, ma le ie mūmū; e togitogi foi mea uma e togitogi, ma le mafaufau i galuega faigata uma e tuuina atu ia te ia, e faatasi ma ou tagata popoto, ma tagata popoto o lo‘u alii o Tavita lou tamā.
15O lenei foi, o le saito, ma le karite, ma le suāuu ma le uaina, na fetalai mai ai lo‘u alii, ia aumaia i ana auauna.
16Matou te ta laau mai Lepanona e faatatau i mea uma ua e le maua; matou te momoli atu ia te oe faavaālaau i le sami i Iopa; ona e avae ai lea i Ierusalema.
17Ua faitauina e Solomona o tagata ese uma sa i ai i le nuu o Isaraelu, e mulimuli i le faitau na faitauina ai i latou e Tavita lona tamā; ua iloa ai e selau afe ma afe e lima sefulu ma le tolu o afe ma le ono o selau i latou.
18Ua tofia e ia le fitu sefulu o afe e ave avega, ma le valu sefulu o afe e talai maa i le mauga, ma le tolu o afe ma le ono o selau o e pule i le nuu ina ia latou faia le galuega.
Who We AreWhat We EelieveWhat We Do
2025 by iamachristian.org,Inc All rights reserved.
