1Faauta i la‘u auauna, ou te taofia o ia i luga; o le na a‘u filifilia ua fiafia i ai lo‘u loto; ua ou tuuina atu lo‘u Agaga i ona luga; na te avatua le faamasinoga mo nuu ese.
2Na te le alaga, na te le leo tele, e le lagona foi lona leo i le ala.
3O le u gapēpē na te le gausia; o le vavae ua mu itiiti na te le tineia; o le faamaoni na te avatu ai le faamasinoga.
4E le mu itiiti o ia, e le gapēpē foi o ia, seia na faatuina le faamasinoga i le lalolagi; e faatalitali foi nuu tu matafaga i lana tulafono.
5O loo faapea ona fetalai mai o le Atua o Ieova, o le na faia le lagi, ma na faamafolafolaina ai; o le na fofola le lalolagi ma mea e tutupu mai ai; o le ua foai le mānava i nuu o i ai, ma le agaga i e o savavali i ai.
6O a‘u o Ieova, na ou valaauina oe i le amiotonu; ou te taofimauina lou lima, ma a‘u leoleo ia te oe, ou te avatua foi oe e fai ma feagaiga a le nuu, o le malamalama o nuu ese;
7e faapupula i mata o e tauaso, e aumaina i fafo nai le fale puipui le ua fusifusia, atoa ma e ua nonofo i le pogisa ia aumaia i latou nai le fale ua taofiina ai.
8O a‘u o Ieova, o lo‘u igoa lea; o lo‘u mamalu foi ou te le avatua lea i se tasi, ma lo‘u viiga ou te le avatua i tupua ua ta.
9O mea muamua, faauta, ua oo mai ia; o mea fou foi o loo ou te ta‘uina atu; ua ou faailoa atu ia te outou, a o lei tutupu mai.
10Pepese ia Ieova i le pese fou, o lona viiga mai le tuluiga o le lalolagi, outou o e ō ifo i le sami, atoa ma e o tumu ai; outou nuu tu matafaga, ma e o nonofo ai.
11E leo tele mai le vao ma ona aai, o faoa aai e nofo ai Kitara; e alalaga e o nonofo i le papa; latou te faataio mai tumutumu o mauga.
12Latou te avatu le faaneeneega ia Ieova, ma latou ta‘u atu lona viiga i nuu tu matafaga.
13E afio atu Ieova pei se toa, e pei o le tagata tau na te faatupuina lona maelega; e alaga o ia, e ū‘ū‘ū, na te manumalo i e ua ita ia te ia.
14Ua leva lo‘u faalologo; ua ou le gagana, ua ou onosai; ou te uio e pei o le fafine ua faatiga; ou te gaegae ma ou mapusela faatasi.
15E moana ia te au atu mauga ma mauga; e mamago ia te au o latou laau ‘aina uma lava; ou te liua vaitafe ma nuu tuloto; ou te faapa‘umatuina vailepa.
16Ou te ta‘ita‘iina e ua tauaso i le ala sa latou le iloa; ou te aumaia i latou i magaala sa latou le iloa; ou te liua le pouliuli i le malamalama i o latou luma, ma ala piopio e fai ma ala sa‘o; o mea lava ia ou te faia ia te i latou, ou te le lafoaiina foi i latou.
17Ua liutuaina i latou, ua matuā mamā e ua faatuatua i tupua ua ta, o e ua fai ane i tupua uamea, O matou atua lava outou.
18Outou o e tutuli, ina faalogo mai ia; ma outou e ua tauaso, ina vaavaai ia ina ia iloa.
19O ai ea ua tauaso, ua na o la‘u auauna? pe tutuli e pei o le sāvali na tuuina e a‘u? o ai ea ua tauaso e pei o le ua atoatoa ona lelei? pe tauaso e pei o le auauna a Ieova?
20Ua e vaaia mea e tele, a ua e le anaana i ai; o loo pūpū taliga, a e le faalogo.
21Ua finagalo mălie Ieova ona o lana amiotonu; na te ta‘uleleia le tulafono, ma faamamaluina ai.
22A o i latou nei o le nuu ua vetea ma ua faoa a latou mea; ua maileia i latou uma i lua, ua lilo foi i latou i fale puipui; ua fai ma vete i latou, a e leai se laveai; ua fai foi ma e ua faoa a latou mea, a e leai se fai ane, Ina toe tuu mai ai.
23O ai ea so outou e uai mai ona taliga i lenei mea? ma faasaga mai, ma faalogo mai i mea amuli?
24O ai ea na tuuina atu Iakopo ia faoa ana mea, o Isaraelu foi i e vete mea? E le o Ieova ea? o ia na tatou agasala i ai; a e le mafafai i latou ona savavali i ona ala; ua latou le faalogo foi i lana tulafono.
25Ona ia sasaa mai lea ia te ia o le tele o lona toasa, ma le mamafa o le taua; ua faamu faataaliolioina ai o ia, a e le iloa e ia; ua mu ai o ia, a e le mafaufau i ai.
Who We AreWhat We EelieveWhat We Do
2025 by iamachristian.org,Inc All rights reserved.
