1Lepanona e, ina to mai ia ou puipui, e susunuina ai i le afi ou arasi.
2Ina uio ia le perosi e, auā ua paū le arasi, auā ua fanoia laau sili; uio ia, aluna o Vasana e, auā ua paū le vao na le masaofia.
3O i ai le leo o le uio o leoleo mamoe, auā ua faaumatia lo latou matagofie; o i ai le leo o le fetagisi o leona taanoa, auā ua faaumatia le matagofie o Ioritana.
4O loo faapea ona fetalai mai o Ieova lo‘u Atua, Ia e leoleo i le lafu mamoe o le a fasia.
5O e o latou le lafu, latou te fafasi ia te i latou, a e le nofo sala ai i latou; o e faatau foi ia te i latou, ua taitasi o i latou ma fai ane, Faafetai ia Ieova, auā ua faatamaoaigaina a‘u; o latou leoleo mamoe foi, latou te le alolofa ia te i latou.
6Auā ou te le toe alofa i e nonofo i le nuu na, ua fetalai mai ai Ieova; faauta foi, ou te tuuina atu tagata o le tasi i le lima o le tasi, ma le lima o lona tupu; latou te tu‘ipalaina le nuu, a e ou te le laveai ia te i latou ai o latou lima.
7Ua ou leoleoina le lafu mamoe o le a fasia, o le lafu mamoe e matuā malaia; ua ou ave foi ma‘u tootoo e lua; ua ou faaigoaina le tasi, o Matagofie; a o le tasi ua ou faaigoaina, o Noataga; ona ou leoleo ai lea i le lafu mamoe.
8Ua ou faaumatia leoleo mamoe e toatolu i le masina e tasi; ua tiga lo‘u loto ia i latou, ua ‘ino‘ino foi o latou loto ia te au.
9Ona ou fai atu ai lea, Ou te le leoleo ia te outou; o lē a mate ina mate ia; o lē a faaumatia, ia faaumatia lava ia; a o e ua totoe ia taitasi ma ‘ai le tino o le tasi.
10Ona ou tago ai lea i lo‘u tootoo, o Matagofie lea, ma ou gausia; ina ia tatala la‘u feagaiga na matou osia ma nuu uma;
11ona tatalaina ai lea i lea aso; ona iloa lelei ai lea e le lafu mamoe malaia, o e ua usiusitai mai ia te au, o le afioga lava lea a Ieova.
12Ona ou fai atu lea ia te i latou, Afai e lelei ia te outou, aumaia o lo‘u taui; a e afai e leai, soia; ona latou fua mai ai lea o lo‘u taui, o tupe e fuatolu.
13Ona fetalai mai lea o Ieova ia te au, Ina lafo atu ia i lē fai ipu omea; se tau e lelei naua, ua faatusaina ai a‘u e i latou! Ona ou tago ai lea i tupe e fuatolu, ma ou lafoia atu i le fale o Ieova i lē fai ipu omea.
14Ona ou gausia lea o le tasi o‘u tootoo, o Noataga lea, ina ia ou motusia le tauusoga o Iuta ma Isaraelu.
15Ua fetalai mai foi Ieova ia te au, Ina e toe ave ia o mea a le leoleo mamoe valea;
16auā faauta, o a‘u ou te faatuina se leoleo mamoe i le nuu, na te le asiasi i e a fano; na te le sailia le ua sē; na te le fōia le ua gau; o le ua tu na te le fagaina; a o le tino o le ua peti na te ‘aina lava lea, mo latou atigivae na te tafa‘ieseina.
17Oi talofa i le leoleo mamoe le aoga, na te tuua le lafu mamoe! e i ai le pelu i lona lima atoa ma lona mata taumatau; e matuā gase lava lona lima, ma lona mata taumatau e matuā puaoa lava lea.
Who We AreWhat We EelieveWhat We Do
2025 by iamachristian.org,Inc All rights reserved.
