1Kalatia valea e, o ai ea na ia pelogia outou, ina ia le anaana outou i le upu moni, ua tusia ia te outou i o outou lava luma o Iesu Keriso ua faasatauroina?
2Ua na o le mea nei ou te fia iloa ia te outou, pe na maua e outou le Agaga i galuega o le tulafono, po o le taulogologo atu i le faatuatua?
3Tou te faapea ea ona valelea? Na amataina outou i le Agaga, pe faaiuina nei ea outou i le tino?
4Pe na tigaina fua ea outou i ia mea e tele lava? pe afai e moni ua tigaina fua.
5O le ua avatu ia te outou le Agaga, ma na faia vavega ia te outou, o galuega ea o le tulafono ua ia fai ai, po o le taulogologo atu i le faatuatua?
6Faapei o Aperaamo na faatuatua i le Atua, ona ta‘ua ai lea ia te ia e fai ma amiotonu.
7O lenei, ia iloa e outou, o e faatuatua o atalii i latou o Aperaamo.
8Na iloa foi anamua i le Tusi, o le faatuatua e ta‘uamiotonuina ai nuu ese e le Atua, na ia folafolaina ai anamua le tala lelei ia Aperaamo, ua faapea, E manuia nuu uma lava ia te oe.
9O lenei, ua manuia e ua faatuatua faatasi ma Aperaamo le na faatuatua.
10Auā o i latou uma o e faalagolago i galuega o le tulafono, ua faafanoina i latou; auā ua tusia, Ia faafanoina i latou uma o e le tumau i mea uma lava ua tusia i le tusi o le tulafono ia faia.
11A ua iloa lelei, e le ta‘uamiotonuina se tasi i luma o le Atua i le tulafono; auā, E ola le tagata amiotonu i le faatuatua.
12E le aiā le faatuatua i le tulafono; a e peitai, O le tagata na te faia ia mea e ola ai lava ia.
13Na faatauina mai i tatou e Keriso ai le faafanoga o le tulafono, ina ua faafanoina o ia mo i tatou; auā ua tusia, E faafanoina i latou uma o e ua faatautauina i le laau;
14ina ia oo ai i nuu ese le manuia o Aperaamo ia Keriso Iesu, ina ia tatou maua i le faatuatua le na folafolaina o le Agaga lea.
15Le au uso e, (o upu a tagata ou te fai atu ai nei,) e ui lava na o le feagaiga a le tagata, afai ua faamauina e leai se na te tatalaina, pe na te faaopoopoina ai se mea.
16Na fetalaia mai folafolaga ia Aperaamo, ma so lana fanau; e lei faapea mai, O le fanau, peiseai e toatele, a e toatasi, O so lau fanau, o Keriso lava lea.
17Ia, o la‘u upu lenei; o le feagaiga na faamauina anamua e le Atua ia Keriso, e le mafai ona tatalaina lea e le tulafono na mulimuli ai i ona tausaga e fagalau ma le tolugafulu, ina ia faaleaogaina ai le mea na folafolaina.
18Auā afai ua ala mai le tofi i le tulafono, ua le ala mai i le upu na folafolaina; a e peitai na foaifuaina atu e le Atua ia Aperaamo i le mea na folafolaina.
19O lenei, se a le aoga o le tulafono? Na faaopoopo mai lea ona o solitulafono, ina seia maliu mai le fanau na folafola i ai, sa saunia e agelu na aumaia e le tautuu upu.
20A e leai se tautuu upu pe a na o le toatasi, a e toatasi le Atua.
21Lenei foi, e ‘au ese ea le tulafono i mea na folafolaina e le Atua? Aua ne‘i faapea. Auā, afai ana tuuina mai se tulafono e mafai ona faaolaina ai, po ua oo mai lava le amiotonu i le tulafono.
22A e peitai ua punitia e le Tusi tagata uma lava i le agasala, ina ia foaiina mai i e faatuatua le mea na folafolaina e maua i le faatuatua ia Iesu Keriso.
23A o lei oo mai le faatuatua, na taofia i tatou i le pule a le tulafono, sa punitia ina seia faaalia le faatuatua a oo mai.
24O lenei, ua fai mo tatou ta‘ita‘itama le tulafono, na te ta‘ita‘iina i tatou ia Keriso, ina ia ta‘uamiotonuina i tatou i le faatuatua.
25A ua oo mai le faatuatua, o lenei ua le toe pule ia te i tatou le ta‘ita‘itama;
26auā o atalii o le Atua outou uma lava i le faatuatua ia Keriso Iesu.
27Auā o outou uma lava na papatisoina ia Keriso ua outou oofu ia Keriso;
28e le o i ai se Iutaia po o se Eleni, e le o i ai se pologa po o se sa‘oloto, e le o i ai se tane po o se fafine; auā ua tasi lava outou uma ia Keriso Iesu.
29Afai foi e o Keriso outou, e moni, o le fanau outou a Aperaamo, o suli foi e tusa ma le mea na folafolaina.
Who We AreWhat We EelieveWhat We Do
2025 by iamachristian.org,Inc All rights reserved.
