1O le masina o Nisani, o le lua o sefulu o tausaga o Aretaseta le tupu, ua i ona luma le uaina; na ou avae foi le uaina ma avatu i le tupu. E lei mata faanoanoa foi a‘u i ona luma anamua.
2Ona fai mai lea o le tupu ia te au, Se a le mea ua e mata faanoanoa ai, a e leai sou ma‘i? ua na o le faanoanoa lava o le loto lena. Ona ou matuā fefe ai lava lea,
3ma ou faapea atu i le tupu, Ia soifua e faavavau le tupu; se a le mea ou te le faanoanoa ai, o loo faatafunaina le aai, o le mea o i ai tuugamau o o‘u tamā, ma ona puipui ua faaumatia i le afi?
4Ona faapea mai lea o le tupu ia te au, Se a ea le mea e te manao ai? Ona ou tatalo atu lea i le Atua o le lagi.
5Ona ou fai atu lea i le tupu, Pe afai e lelei i le tupu, afai foi e te alofa i lau auauna, ia e auina atu a‘u i Iuta, i le aai o i ai tuugamau o o‘u tamā, ia ou toe faia.
6Ona fai mai lea o le tupu ia te au, (o loo nofo foi i ona tafatafa lana masiofo,) Pe fia ea po o lau malaga? E te toe foi mai foi afea? Ua lelei foi i le tupu, ona ia auina mai lea o a‘u; na ou tŭu po foi ia te ia.
7Ua ou fai atu foi i le tupu, Afai e lelei i le tupu, ia au mai ni tusi ia te au i alii e pule i ona tala atu o le vaitafe, ia latou momoli atu ia te au seia ou oo i Iuta;
8ma se tusi ia Asafo, le leoleo o le vao o le tupu, ia au mai ia te au o laau e fai a‘i faalava o faitotoa o le ‘olo o le fale, ma le pa o le aai, atoa ma le fale ou te alu ane i ai. Ona tuu mai lea e le tupu ia te au, e tusa ma le aao alofa o lo‘u Atua na ia te au.
9Ua ou oo atu i alii e pule i ona tala atu o le vaitafe, ona ou avatua lea ia te i latou o tusi a le tupu. Ua aauina mai foi ma a‘u e le tupu o e ave ‘au, ma ‘au e tietie i solofanua.
10Ua faalogo Sanepalata o le Horono, ma Tovia le auauna, o lo sa Amonī, ua sau le tagata e saili i se lelei mo le fanauga a Isaraelu, ona matuā tiga tele lava lea o i laua.
11Ua ou oo i Ierusalema, na ou i ai i po e tolu.
12Ona matou tulai ai lea i le po, o a‘u ma nai tagata e toaitiiti na ia te au; na ou le ta‘u atu foi i se tagata le mea na tuu mai e lo‘u Atua i lo‘u loto e faia i Ierusalema; ua leai foi se manu ia te au, na o le manu lava na ou tietie ai.
13Ona ou alu atu lea i le po i le faitotoa o le vanu, ma luma o le vaipuna o le tanimo, ma le faitotoa o le otaota, ma ou matamata i pa o Ierusalema ua sŏloia, ma ona puipui ua faaumatia i le afi.
14Ona ou alu atu lea i le faitotoa o le vaipuna, ma le vailepa o le tupu, a e leai se mea e sao atu ai le manu na ou tietie ai.
15Ona ou ui ae lea i le alia i le po, ma ou matamata i le pa, ona ou toe foi mai lea, ma ulu atu i le faitotoa o le vanu; ona ou foi ai lea.
16E lei iloa foi e faipule le mea na ou alu atu ai, ma le mea na ou faia; ou te lei ta‘u atu foi i na ona po i sa Iutā, po o faitaulaga, po o alii, po o faipule, po o e na totoe sa fai le galuega.
17Ona ou fai atu ai lea ia te i latou, Ua outou silafia le malaia ua ia te i tatou, ua faatafunaina Ierusalema, ma ona puipui ua susunu i le afi; o mai ia, ina tatou faia le pa o Ierusalema, aua ne‘i faalumaina pea i tatou.
18Ua ou ta‘u atu foi ia te i latou i le aao o lo‘u Atua sa lelei lava i luga ia te au, atoa ma upu a le tupu na ia fai mai ia te au. Ona faapea mai lea o i latou, Ina tulai ia, ina tatou faia ia. Ona latou faamalolosi ai lea i lenei galuega lelei.
19Ua faalogo ai Sanepalata o le Horono, ma Tovia le auauna, o lo sa Amonī, ma Gesemu le Arapi, ona latou tauemu mai lea ia te i matou, ma ‘ino‘ino mai ia te i matou, ma ua faapea mai, Se a ea lenei mea tou te faia? Pe tou te fouvale ea i le tupu?
20Ona ou tali atu lea ia te i latou, ma ou faapea atu ia te i latou, O le Atua o le lagi, o ia lava na te faamanuia mai ia te i matou; o le mea lea e tulai ai o i matou ana auauna, ma faia le galuega; a o outou, e leai so outou tofi, po o se pule, po o se faamanatuga, i Ierusalema.
Who We AreWhat We EelieveWhat We Do
2025 by iamachristian.org,Inc All rights reserved.
