1O le aso foi e luafulu ma le fa o lea masina sa faapotopotoina ai le fanauga a Isaraelu, ua anapopogi, ma lavalava ie talatala, ma le eleele i luga ia te i latou.
2Ona vavaeeseina lea o le fanau a Isaraelu i tagata ese uma, ma ua latou tutū ma ta‘u atu a latou agasala, ma amio leaga a o latou tamā.
3Ua latou tutū i luga i le mea na latou i ai, ma ua latou faitau i le tusi o le tulafono a Ieova lo latou Atua o le tasi ona vaega e fa o le aso; o le isi ona vaega e fa foi ua latou ta‘u atu a latou agasala, ma ifo atu ia Ieova lo latou Atua.
4Ona tutū lea i luga i le tulaga o sa Levī, o Iosua, ma Pani, o Katameeli, o Sepania, o Puni, o Serepeia, o Pani, ma Kanani, ua latou alalaga ma le leo tele ia Ieova lo latou Atua.
5Ona faapea atu lea o sa Levī, o Iosua, ma Katameeli, o Pani, o Hasepenia, o Serepeia, o Hotia, o Sepania, ma Petakia, Ina tutū ia outou i luga, ina faamanu atu ia Ieova lo outou Atua mai le vavau e oo i le faavavau; ia faamanuina lava lou suafa mamalu ua silisili i faamanu ma viiga uma.
6O oe, na o oe lava o Ieova; na e faia le lagi o le lagi o lagi, ma ‘au uma o i ai, o le lalolagi ma mea uma o i ai, o le sami ma mea uma o i ai, ua e faaola foi ia te i latou uma; ua ifo foi ia te oe ‘au a le lagi.
7O oe lava o Ieova le Atua, o le na filifilia Aperamo, ma au mai ia te ia ai Uro i Kaletaia, ma e faaigoa ia te ia i le igoa o Aperaamo;
8na e silafia foi lona loto sa faamaoni i ou luma, na e faia le feagaiga ma ia e foai mai le nuu o sa Kananā, o sa Hetī, o sa Amorī, ma sa Perisē, ma sa Iepusē, ma sa Kirekasē, e foai mai i lana fanau; ua e faataunuu foi au afioga; auā o oe o le amiotonu;
9na e silafia foi le puapuaga o matou tamā i Aikupito, na e faafofogaina foi la latou alaga i le sami Ulaula;
10na e faia foi faailoga ma vavega ia Farao, ma ana auauna uma, ma tagata uma o lona nuu; auā na e silafia ua latou faamaualuga ia te i latou. Sa faapea ona e maua le viiga e pei ona fai i le aso nei.
11Na e vavaeina foi i o latou luma le sami, ia latou ui atu i totonu o le sami i le iliti tai matutu; a o e na tuliloa ia te i latou, na e lafoina i le loloto, e pei o se maa i le sami sousou.
12O le ao faaniutu na e ta‘ita‘iina ai i latou i le ao, o le afi faaniutu foi i le po, e faamalamalama a‘i ia te i latou i le ala latou te o atu ai.
13Na e afio ifo foi i luga i le mauga o Sinai, ma fetalai ma i latou mai le lagi, na e tuu mai foi ia te i latou faamasinoga tonu, ma tulafono faamaoni, o sauniga ma poloaiga lelei.
14Na e faailoa mai foi ia te i latou o lou sapati paia, ma ua poloai mai ia te i latou o poloaiga, ma sauniga, ma tulafono ia Mose lau auauna.
15Na e foai mai foi ia te i latou le mea e ‘ai mai le lagi i lo latou fia aai, ma faapuna mai ia te i latou le vai mai le papa i lo latou fia inu, ua fetalai mai foi ia te i latou, latou te o atu e fai mo latou le nuu na e sii atu ai lou aao e te foaiina mai ia te i latou.
16A o i latou ma o matou tamā, na latou faamaualuga, ma faamaaa i o latou ua, ma ua latou le faalogo i au poloaiga,
17ma ua latou le mafafai ona usiusitai, ua latou le manatua foi i ou vavega na e faia ia te i latou; a ua latou faamaaa i o latou ua, o lo latou fouvale foi ua latou tofia ai le ta‘ita‘i e foi atu ai i latou ia nofo pologa. A o oe o le Atua o lē faamagaloina sala, o lē alofa fua, ma lē alofa mutimuti vale, e tele gese lou toasa, ma ua tele lou alofa, ua e le lafoaiina foi i latou.
18E moni, ua latou faia mo i latou le tamai povi auro, ma ua latou fai atu, O lou atua lea o le na aveina ae ia te oe mai Aikupito; ma latou faia mea faaonoono e tele;
19a o oe, o lou alofa mutimuti vale e tele, na e le tuua ai i latou i le vao; ua le te‘a ma i latou le ao faaniutu i le ao, e ta‘ita‘iina i latou i le ala; ma le afi faaniutu i le po, e faamalamalama a‘i i latou i le ala latou te o atu ai.
20Na e foai mai foi lou Agaga lelei e a‘oa‘o ia te i latou, na e le taofia foi lau manai ai o latou gutu, na e foai mai foi ia te i latou le vai i lo latou fia inu.
21O tausaga foi e fagafulu na e tausia ai i latou i le vao, ua le matitiva i latou, e lei pala o latou ofu, o latou vae foi e lei fulafula.
22Na e foaiina foi ia te i latou o malo ma nuu, na e vaevaeina foi i latou i itu nuu; ua latou fai foi mo i latou le nuu o Sekono, ma le nuu o le tupu o Hesepona, ma le nuu o Oko le tupu o Vasana.
23O a latou fanau foi na e faatoateleina i latou e pei o fetu o le lagi, ua e faaoo foi ia te i latou i le nuu na e fetalai mai ai i o latou tamā, latou te oo i ai e fai mo latou.
24Ua oo mai foi le fanau, ua fai foi mo i latou le nuu, na e faatoilaloina foi i o latou luma o e sa mau i le nuu, o sa Kananā, na e tuuina mai foi i latou i o latou lima, o latou tupu atoa ma tagata o le nuu, ia fai i latou ia te i latou e tusa ma o latou loto.
25Ua faoa e i latou o aai nofo ‘olo, ma laueleele lafulemu, ua latou fai foi mo i latou o fale sa tutumu i mea lelei uma, o vaieli ua elia, o tovine, ma toolive, ma laau ‘aina e tele; ua latou aai, ma ua maoona, ua puputa foi i latou, ma ua latou fiafia i lou alofa tele.
26A ua latou vaogatata, ma latou fouvale ia te oe, ua latou lafoaiina foi au tulafono i o latou tua, ua latou fasioti foi au perofeta o e na aoai ia te i latou ia latou foi mai ia te oe, ua faia lava e i latou mea faaonoono e tele.
27O le mea lea na e tuuina atu ai i latou i lima o e ita mai ia te i latou, ua latou faatiga foi ia te i latou; o ona po o lo latou tiga, ua latou alalaga atu ai ia te oe, ona e faafofoga mai lea mai le lagi; ma e foaiina ia te i latou o faitoaga e tusa ma lou alofa mutimuti vale ua tele, na latou faaolaina foi i latou ai lima o e ita mai ia te i latou.
28Ua maua e i latou le filemu, ona latou toe faia lea o amio leaga i ou luma; ona e tuua lea o i latou i lima o e ita mai ia te i latou, na latou faatoilaloina ai i latou; a ua latou toe foi, ma alalaga atu ia te oe, ona e faafofoga mai lea ai le lagi, ma laveai soo ia te i latou e tusa ma lou alofa mutimuti vale;
29na e aoai foi ia te i latou, ina ia e faafoi mai ia te i latou i lau tulafono; a ua latou faamaualuga, ma ua latou le faalogo i au poloaiga, ua latou agasala foi i au faamasinoga, (a anaana i ai se tagata e ola ai lava ia;) a ua ‘alo o latou tau‘au, ma ua latou faamaaa i o latou ua, ma ua latou le faalogo.
30A e tele tausaga na e onosai ai ia te i latou, ma aoai ia te i latou e lou Agaga na i au perofeta; a ua latou le faalogo; ona e tuu atu ai lea ia te i latou i lima o tagata o ia nuu.
31A ona o lou alofa mutimuti vale ua tele, na e le matuā faaumatia ai i latou, ma e le tuulafoai ia te i latou; auā o oe o le Atua alofa fua ma le alofa mutimuti vale.
32O lenei, lo matou Atua e, o le Atua silisili, o lē mana, ma le matautia, o lē tausi le feagaiga ma le alofa, aua ne‘i e manatu ua itiiti le tiga uma ua oo mai ia te i matou, ma o matou tupu, ma o matou alii, ma a matou faitaulaga, ma a matou perofeta, ma o matou tamā, ma lou nuu uma, talu ona po o tupu o Asuria ua oo mai i lenei aso.
33A o oe, ua tonu lava oe i mea uma ua oo mai ia te i matou; auā ua e faamaoni, a o i matou, ua matou amio leaga;
34e lei faia foi lau tulafono e o matou tupu, o matou alii, o a matou faitaulaga, ma o matou tamā, ua latou le faalogo foi i au poloaiga ma au faatonuga, na e faatonu mai ai ia te i latou.
35Auā na latou le auauna ia te oe i lo latou malo, ma lou alofa tele na e foai mai ai ia te i latou, ma le nuu tele ma le lafulemu na e tuuina mai i o latou luma, ma ua latou le foi mai i a latou amio leaga.
36Faauta, o pologa i matou i le aso nei; o le nuu foi na e foai mai i o matou tamā e aai i ona fua ma ana mea lelei, faauta, o pologa i matou i ai;
37e tutupu mai ai foi mea e tele mā tupu ua e tuuina mai e pule ia te i matou ona o a matou agasala; ua latou pule foi i o matou tino, ma a matou manu, i lo latou faitalia, e tele foi lo matou puapuaga.
38Ona o ia mea uma foi ua matou fai ai le feagaiga moni, ma tusi ai; ua faamaufaailogaina foi e o matou alii, ma o matou tagata sa Levī, ma a matou faitaulaga.
Who We AreWhat We EelieveWhat We Do
2025 by iamachristian.org,Inc All rights reserved.
