1Ona tali mai ai lea o Ieova ia Iopu mai le afā, ua faapea mai,
2O ai ea lenei ua na faapouliuligia la‘u pule i upu e le o i ai le poto?
3Ina fusi ia lou sulugatiti e pei o le tagata malosi; ou te fesili atu foi ia te oe, ina e faailoa mai ia ia te au.
4O ifea sa e i ai ina o ou faavaeina le lalolagi? Ina faaali mai ia pe afai ua e iloa mafaufau.
5O ai ea na ia fuafuaina ai, pe afai ua e iloa? O ai foi ua na faataoto i ai le fua?
6Ua tuuina ea ona faavae i luga o le a? O ai ea foi na na tuuina ifo lona maa tulimanu;
7ina o pepese faatasi fetu o le taeao, ma alalaga fiafia atalii uma o le Atua.
8 O ai foi na ia pupuni le sami i puipui ina ua oo mai e peiseai na sau mai le manava?
9Ina ua ou faia le ao mona ofu, ma le pogisa ma mea e aui ai;
10ina ua ou tuu atu i ai foi ona tuaoi, ma avane i ai faamaufaalava ma puipui;
11ma ou fai atu i ai, E te oo mai iinei, ae e te le sopoia; o iinei foi e pau mai ai ou galu faamaualuluga.
12Talu le amataga o ou aso ua e pule ea i le taeao? Ua e faasino atu ea i le tafa o ata le mea e aliali mai ai,
13ina ia tago atu i tuluiga o le lalolagi, ma ia lulueseina ai o e amio leaga?
14E liua o ia e pei o le omea i le faamaufaailoga, ona latou tutū mai ai lea e pei se ofu.
15E aveesea foi i e amio leaga lo latou malamalama, ua gauia foi le lima o le ua faamaualuga.
16Ua e oo atu ea i puna o le sami? Po ua e fealualuai ea i mea loloto o le moana?
17Ua faaalia ea ia te oe faitotoa o le oti? Po ua e iloa ea faitotoa o le ata o le oti?
18Ua e mafaufau ea i le lautele o le lalolagi? Ina faaali mai ia, pe afai ua e iloa ia mea uma.
19O ifea le ala i le mea e nofo ai le malamalama? O le pouliuli foi o ifea le mea e mau ai ia,
20ina ia e momoli atu ai i lona tuaoi, ina ia e iloa foi le ala i lona fale?
21Ua e iloa ea ia mea ina ua fanau mai oe i ia ona po, ina ua tele foi le faitau o ou aso?
22Ua e ulu atu ea i mea e teu ai le kiona? Ua e vaaia ea foi mea e teu ai le uato‘a?
23O mea ia ua ou tuu ma ona po o le puapuaga, ma le aso e tau ai le taua.
24O i fea le ala e vaevaeina atu ai le malamalama, e faasalalauina ai le matagi mai sasae i luga o le lalolagi?
25O ai ua vaevaeina o alāvai mo uaga, ma le ala mo le uila o le faititili?
26Ina ia to mai le ua i le laueleele, e le o iai se tagata; ma le vao, e le āina e tagata,
27ina ia mălie ai le mea ua taaligoligoa ma le mea ua gaogao; ina ia faatupuina ai foi le vaoiti.
28E ai ea se tamā o le ua? Po o ai ua fanaua le suāsau?
29E sau ea le vaito‘a mai le manava o ai? O le sauto‘a foi mai le lagi o ai ea na na fanaua?
30Ua ufitia le vai e peiseai se maa, ua to‘a foi le fogātai.
31E te mafai ea ona nonoa i noataga o Kima? Pe te mafaia foi ona tatala i fusi o Kisila?
32E te mafaia ea ona faaooina mai o Masarota i ona lava po? Pe te mafaia foi ona ta‘ita‘iina o Asa faatasi ma lana fanau?
33Ua e iloa ea tulafono i le lagi? Pe na e tuuina atu ea lana pule i le lalolagi?
34E te mafaia ea ona faaooina atu lou leo i ao, ia lofia ai oe i vai e tele?
35E te mafaia ea ona aauina atu o uila, latou te o ai, ma latou fai mai ia te oe, Faauta, o i matou nei?
36O ai ea ua tuuina atu le poto i totonu o le tagata? Po ai foi ua na avatu le mafaufau i le loto?
37O ai na te mafaia ona faitau o ao i lona poto? Po ai foi na te mafaia ona liligi ifo o fagu o le lagi,
38pe a liu palapala le efuefu, ma ua pipii faatasi le eleele?
39E te mafaia ea ona tuli o se manu ia saeia mā le leona? Pe e te faamaoona i leona taanoa,
40ao latou faapuna i o latou ana, ma nofo lamalama i mea latou te fale ai?
41O ai ea na te sauni mā le oreva lana mea e ‘ai, pe a fetagisi atu ana tama i le Atua, ao sē i latou ina ua leai se mea e ‘ai?
Who We AreWhat We EelieveWhat We Do
2025 by iamachristian.org,Inc All rights reserved.
