1Le Atua e, ua faalogo o matou taliga, ua talatalaina e o matou tamā ia te i matou le galuega na e faia i ona po sa i ai latou i aso anamua.
2O oe lava na e tulia i lou aao o nuu ese, a e totōina ai i latou; ua e faatigaina foi ia nuu, a ua e faatuputeleina i latou.
3Auā e lei maua e i latou le fanua i a latou pelu, e lei faaolaina foi i latou i o latou lima; a o lou aao taumatau, o lou aao lava, ma le malamalama o ou fofoga, auā na e fiafia ia te i latou.
4Le Atua e, o oe lava lo‘u Tupu; ia e fetalai ia faaolaina Iakopo.
5O oe lava matou te tulei ai i e ita mai ia te i matou; o lou suafa foi matou te soli ai i e laga mai ia te i matou.
6Auā ou te le faatuatua i la‘u aufana, e le faaolaina foi a‘u i la‘u pelu.
7Auā ua e faaola lava ia te i matou i e ita mai ia te i matou; ua e faamasiasi foi i e ‘ino‘ino mai ia te i matou.
8Matou te vivii atu pea lava i le Atua, matou te faaneenee foi e faavavau i lou suafa. Selā.
9A e peitai ua e lafoaiina ma faamaina i matou; ua e le ‘au faatasi foi ma la matou itu taua.
10Ua e faaliutuaina i matou i luma o e ita mai; ua vetea foi a matou mea e i latou o e ‘ino‘ino mai ia te i matou.
11Ua e tuuina atu i matou e pei o mamoe a ‘aina; ua e faataapeapeina i matou i nuu ese.
12Ua e faatau atu i lou nuu a e leai se oloa ua maua; e lei faateleina foi au oloa i le tau na faatau ai i latou.
13Ua e faia i matou ma gao a ē matou te tuaoi, o ulaga ma tauemuga a ē vagavagai mai ia te i matou.
14Ua e faia i matou ma upu faatusa i nuu ese; ua lialiai ai ulu o tagata.
15Ua ou lumanai pea le mea ou te masiasi ai; ua ufitia foi a‘u i le mea e mā ai o‘u mata,
16ona o le leo o le ua gaogao mai ma faifai mai; ona o lē ita mai, atoa ma le ua taui ma sui.
17Ua oo mai ia te i matou ia mea uma; a e peitai matou te lei faagalogalo ia te oe, matou te lei pepelo foi i lau feagaiga.
18E lei tuumuli o matou loto; e lei liliu ese foi o matou vae i lou ala;
19ina ua e tu‘imomomoina i matou i le mea o i ai tanimo, ma ua e ufitia i matou i le ata o le oti.
20Pe afai ua matou faagalogalo i le suafa o lo matou Atua, afai foi ua faaloaloa ane o matou lima i se atua ese;
21e le suesue ea lenei mea e le Atua? Auā o ia lava na te silafia mea lilo o i le loto.
22Ona o oe lava ua fasiotia i matou i aso uma; ua faatatauina i matou e pei o mamoe a fāsia.
23Le Alii e, ia e tulai mai, se a le mea ua e tofa ai? Ia e maleifua mai, aua e te lafoai ia te i matou e faavavau.
24Se a le mea ua e ‘alo ai ou fofoga, ma faagalogalo i lo matou tiga ma lo matou sauaina?
25Auā ua faano‘uno‘u ifo i matou i le efuefu; ua pipii o matou manava i le eleele.
26Ina tulai mai ia e fai ma fesoasoani ia te i matou; ma ia e laveai ia te i matou ona o lou alofa.
Who We AreWhat We EelieveWhat We Do
2025 by iamachristian.org,Inc All rights reserved.
