GALUEGA, 22 - Samoan Old Version Bible

O LE MATAUPU XXII.O le lauga a Paulo, ua ita ai Iutaia.

1Sema e, le au uso e, ma tamā, faafofoga mai ia i la‘u nei faatonu atu ia te outou.

2(Ua faalogo i latou o loo tautala mai o ia ia te i latou i le upu Eperu, ona atili ai lea ona lologo o i latou; ona fai atu lea o ia.)

3O a‘u lava o le tagata Iutaia, na fanau i Taso i Kilikia, na tausia a‘u i lenei aai, ua a‘oa‘oina i le a‘oga a Kamalielu i le tonu o le tulafono a o tatou tamā, sa ou maelega i la le Atua, pei o outou uma lava i lenei aso.

4Na ou saua atu i lenei lotu ina ia oti i latou, sa ou fusifusia ma tuuina atu i fale puipui o tane atoa ma fafine;

5pei ona molimau mai foi ia te au nei e le faitaulaga sili, atoa ma toeaina uma; sa ou maua mai ai foi tusi i le au uso, ma ou alu atu i Tamaseko e fusifusi i e o i ai, ma ta‘ita‘i mai ia te i latou i Ierusalema ina ia faasalaina i latou.

6Ua ou alu a‘u, ma ua latalata i Tamaseko, o le tutonu o le la ua faafuasei ai ona pupula faataaliolio mai ia te au o le malamalama tele mai le lagi.

7Ona ou paū lea i lalo i le eleele, ma ou faalogo atu i le siufofoga, ua faapea mai ia te au, Saulo, Saulo e, se a le mea ua e saua mai ai ia te au?

8Ona ou tali atu lea, Le Alii e, o ai ea oe? Ua fetalai mai o ia ia te au. O a‘u lava o Iesu le Nasareta, ua e saua mai i ai.

9Ua iloa lava e i latou sa ia te au le malamalama, ua matatau ai; a ua le lagona e i latou le siufofoga o le na fetalai mai ia te au.

10Ona ou fai atu lea, Le Alii e, se a le mea ou te faia? Ona fetalai mai lea o le Alii ia te au. Tulai ia oe, ina alu i Tamaseko, e ta‘uina atu ai ia te oe o mea uma lava ua tofia ia te oe e te faia.

11Ua ou le toe vaai ona o le pupula o lea malamalama; ona ta‘ita‘iina ai lea o a‘u e i latou sa ia te au, ua ou oo atu i Tamaseko.

12O le tasi tagata, o Anania, o le tagata amio Atua e tusa ma le tulafono, ma ua ta‘uleleia e Iutaia uma ua mau ai,

13na sau o ia ia te au, ua tu mai, ma faapea mai, Lo‘u uso e, Saulo, ina toe vaai ia. Ona ou vaai atu lea ia te ia i lea lava itu aso.

14Na fai mai foi o ia, Ua tofia oe e le Atua o tatou tamā, ia e iloa lona finagalo, ma e vaaia lē Amiotonu, ma ia e faalogo atu i lona siufofoga.

15Auā e fai oe māna molimau i tagata uma lava i ia mea na e vaaia ma e faalogo i ai.

16O lenei foi, se a le mea e te faatuai ai? Tulai ia, ma ia papatisoina oe, ma ia fufulueseina au agasala i lou valaau i le suafa o le Ali.

17Na ou foi atu i Ierusalema, sa ou tatalo i le malumalu, ona faalia mai ai lea ia te au;

18na ou iloa atu o ia ua fetalai mai ia te au, Ia vave, ma e taalise alu ese i Ierusalema, auā latou te le talia lau molimau ia te au.

19Ona ou fai atu lea, Le Alii e, ua iloa lava e i latou sa ou masani ina tuu i fale puipui ma sasa i lea sunako ma lea sunako i e faatuatua ia te oe;

20sa maligi foi le toto o lau molimau o Setefano, sa tu ai foi a‘u, ma loto gatasi i lona fasiga, sa ou leoleo foi i ofu o e na fasioti ia te ia.

21Ona fetalai mai lea o ia ia te au, Alu atu ia; auā o a‘u, ou te auina atu oe i nuu ese e mamao.

22Ua faalogo mai i latou ia te ia ua oo i lena upu, ona alalaga mai lea o i latou, ua faapea mai, Ave ese ia lena tamaloa i le lalolagi; auā e le tatau ona ola o ia.

23O latou o pisapisao, ma lafo i lalo o latou ofu, ma lafo ae le efuefu i luga,

24ua fai atu le alii e pule i ‘au ia ave ia te ia i le ‘olo, ua fai atu foi ia inoino ia te ia ma sasa, ina ia iloa e ia le mea ua latou alalaga mai ai faapea ia te ia.

25Ua noanoa ia te ia i fusi, ona fai atu lea o Paulo i le ta‘ita‘i o le toaselau o le na tu mai E le ua sa ea ia te outou ona sasa le tagata Roma ua le faasalaina?

26Ua faalogo atu le ta‘ita‘i o le toaselau, ona alu lea o ia ma ta‘u atu i le alii e pule i ‘au, ua faapea atu, Ia oe i le mea a e faia; auā o le tagata Roma lena.

27Ona sau ai lea o le alii e pule i ‘au, ua faapea mai ia te ia, Fai mai ia te au, o le Roma ea oe? Ua fai atu o ia, E.

28Ona tali mai lea o le alii e pule i ‘au E tele tupe na faatau a‘i e a‘u ia faia a‘u ma tagata o lea nuu. A ua fai atu e Paulo, O a‘u na fanau ai.

29Ona o ese loa lea ia te ia o e na fai a inoino ia te ia; na fefe foi le alii e pule i ‘au, ina ua iloa o le Roma o ia, ma ua na noanoa ia te ia.

30O le taeao ua fia iloa ai le faamaoni o le mea na molia ai o ia e Iutaia, ona tatala lea o ia o ona noanoaga, ma poloai atu i faitaulaga sili ma la latou fono uma ia o mai; ona ta‘ita‘i ifo lea o ia ia Paulo, ma tuu atu ia te ia i o latou luma.