1O Natapu foi ma Aviu, o atalii o Arona, ua taitasi ma ave lana ipu e faamu ai mea manogi, ma tuu ai le afi, ma tuu mea manogi i ona luga, ma avatu ai le afi ese i luma o Ieova, na ia le poloai mai ai ia te i laua.
2Ona alu ane ai lea o le afi mai luma o Ieova, ua mu ai i laua, ona la oti ai lea i luma o Ieova.
3Ona fai atu ai lea o Mose ia Arona, O le mea lenei ua fetalai mai ai Ieova, ua faapea mai, E faapaiaina lava a‘u e i latou uma o e faalatalata mai ia te au; e mamalu foi a‘u i luma o le nuu uma; ona faalologo ai lea o Arona.
4Ua valaau atu foi Mose ia Mesalu ma Elisafano, o atalii o Usialu, o le uso o le tamā o Arona, ua faapea atu ia i laua, Ina faalatalata mai ia, ina ave ese ia o oulua uso i luma o le mea paia a e ave i tua o le toag ālauapi.
5Ona lala faalatalata atu ai lea, ma la ave ia te i laua i o la ofu tino i tua o le toagālauapi, e pei ona fai atu ai o Mose.
6Ona fai atu ai lea o Mose ia Arona, ma Eleasaro, ma Itamaro ona atalii, Aua tou te to ese o outou pulou; aua ne‘i tou saeia foi o outou ofu, ina ne‘i oti outou, ina ne‘i oo mai ai le toasa i le faapotopotoga uma; a ia fetagisi o outou uso, o le aiga uma o Isaraelu, ona o le mu ua faamuina ai e Ieova;
7aua foi tou te o ese i le faitotoa o le fale fetafai o le faapotopotoga, ina ne‘i oti ai outou; auā o le uu o Ieova e uu a‘i o loo i luga ia te outou; ona latou fai ai lea e tusa ma le upu a Mose.
8Ua fetalai mai Ieova ia Arona, ua faapea mai,
9Aua e te inu le uaina po o le ‘ava, o oe lava, po o ou atalii, pe a outou o i totonu o le fale fetafai o le faapotopotoga, ne‘i oti ai outou; o le tulafono lea e faavavau i o outou tupulaga amuli;
10ina ia outou faailogaina mea paia ma mea e le paia, o mea leaga foi ma mea mamā;
11ma ia outou a‘oa‘o atu ai i le fanauga a Isaraelu i tulafono uma ua fetalai mai ai Ieova ia i latou ua aumaia e Mose.
12Ona fai atu ai lea o Mose ia Arona, ma Eleasaro, ma Itamaro o ona atalii ua totoe, Ia outou ave le taulaga i mea e ‘ai ua toe i le taulaga e fai ia Ieova i le afi, ma aai ai ma areto e le faafefeteina i tafatafa o le fata faitaulaga; auā o le mea lea e sili ona paia.
13Tou te aai ai lava i le mea paia, auā o lou tufaaga lea, ma le tufaaga o ou atalii o le taulaga e fai ia Ieova i le afi; auā ua faapea ona poloai mai ai ia te au;
14o le fatafata foi e lulu, ma le ālagālima e sii, tou te aai ai i se mea mamā, o oe, ma ou atalii, ma ou afafine faatasi ma oe; auā o ou tufaaga ia, ma tufaaga o ou atalii, ua tuuina atu ia te outou i taulaga faafetai a le fanauga a Isaraelu.
15O le ālagālima e sii, ma le fatafata e lulu, latou te au mai ai faatasi ma taulaga e fai i le afi i ga‘o, e lulu ai, o le taulaga lulu lea i luma o Ieova; e ia te oe lava lea ma ou atalii faatasi ma oe, o le tulafono e faavavau; pei ona poloai mai ai o Ieova.
16Ua matuā saili foi e Mose le ‘oti o le taulaga mo le agasala, faauta foi, ua susunuina; ona ita ai lea o ia ia Eleasaro ma Itamaro, o atalii ia o Arona o totoe, ua faapea atu ai,
17O le a le mea ua outou le aai ai le taulaga mo le agasala i le mea paia, auā e sili ona paia ia, ua tuuina atu ai ia te outou, ina ia faamagaloina ai le agasala a le faapotopotoga, e fai ai le togiola mo i latou i luma o Ieova?
18Faauta mai, ua le aumaia lava lona toto i totonu o le mea paia; ana outou aai ai i le mea paia po ua tatau ai, e pei ona ou fai atu ai.
19Ona fai mai ai lea o Arona ia Mose, Faauta mai, ua avatua e i laua i le aso nei la la taulaga mo le agasala, ma la la taulaga mu i luma o Ieova; ua oo mai foi ia te au mea faapea; ana ou ‘ai i le taulaga mo le agasala i le asō, e talia ea i luma o Ieova?
20Ua faalogo ai foi Mose, ona loto malie ai lea o ia.
Who We AreWhat We EelieveWhat We Do
2025 by iamachristian.org,Inc All rights reserved.
