ESOTO 35 - Samoan Old Version Bible

O LE MATAUPU XXXV.O poloaiga i le sapati; o taulaga mo le malumalu.

1Ona faapotopoto mai lea e Mose o le faapotopotoga uma o le fanauga a Isaraelu, ua fai atu ia te i latou, O mea nei ua poloai mai ai Ieova ia faia.

2E ono aso e fai ai galuega, a o le aso fitu e paia lea ia te outou, o le sapati e malolo ai ia Ieova; ai se fai galuega ai e fasiotia lava ia.

3Aua ne‘i mu se afi i so outou fale i le aso sapati.

4Ua fai atu foi Mose i le faapotopotoga uma o le fanauga a Isaraelu, ua faapea atu, O le mea lenei, ua poloai mai ai Ieova, ua faapea mai,

5Ina fai ia e outou se taulaga ia Ieova, e taitoatasi o lē manatu i ai i lona loto, ia au mai e ia le taulaga ia Ieova, o le auro, ma le ario, ma le ‘apa memea,

6ma le ie uli, ma le pāuli, ma le mūmū, ma le ie vavae, ma fulufulu ‘oti,

7ma pa‘u mamoe poa faalanu ulaula, ma pa‘u takesa, ma le laau o le setima;

8o le suauu foi e mu a‘i le afi, o mea manogi e manogi a‘i le uu e faauu a‘i, e fai a‘i foi le mea manogi lelei e mu,

9o maa soama, ma maa e teu ai i le efota ma le ufifatafata.

10O i latou uma foi o ia te outou ua popoto, ia latou o mai, ma latou faia mea uma lava ua poloai mai ai Ieova;

11o le malumalu, o lona fale fetafai, ma lona ufiufi, o ona faamau, o ona laupapa, o ona faalava, o ona pou, ma ona lago;

12o le atolaau, ma ona amo, o le nofoa o le alofa, ma le ie puipui;

13o le laoai, ma ona amo, ma ana mea uma lava, ma la areto e laulauina i luma;

14ma le tuugālamepa, e mu ai le afi, ma ana mea, ma ona lamepa, ma le suāuu e mu a‘i le afi;

15ma le fata e mu ai mea manogi, ma ona amo, ma le uu e faauu a‘i, ma le mea manogi lelei e mu, ma le ie puipui o le faitotoa e pupuni ai le malumalu;

16o le fata e fai ai taulaga mu, ma lona taigaafi ‘apa memea, o ona amo, ma ana mea uma; o le tanoa e mulumulu ai ma lona tulaga;

17o ie puipui mo le lotoā, o ona pou, ma ona lago, ma le ie puipui mo le faitotoa o le lotoa;

18o faamau mo le malumalu, ma faamau mo le lotoā, ma ona maea;

19o ie o mea e fai ai tapuaiga e auauna ai i le mea paia, o ofu sa mo le faitaulaga o Arona, ma ofu o ona atalii, e fai ai le faiva o ositaulaga.

20Ona tuua lea o le faapotopotoga uma o le fanauga a Isaraelu nai luma o Mose;

21ona latou o mai lea, o i latou uma o e ua uai i ai o latou loto, ma i latou uma o e ua manatu i ai o latou loto, ua latou aumaia le taulaga ia Ieova mo le galuega o le fale fetafai o le faapotopotoga mo ona sauniga uma, atoa ma ofu sa.

22Ua latou o mai, o tane atoa ma fafine; o i latou uma lava o e na manatu i ai o latou loto, ua latou aumaia o mama, ma mama o taliga, ma mama o lima, ma asoa auro, ma mea auro uma, e taitoatasi uma lava o e na fai taulaga, ua fai ai le taulaga auro ia Ieova.

23E taitoatasi uma foi ua i ai se ie uli, ma le pāuli, ma le mūmū, ma le ie vavae, ma fulufulu ‘oti, ma pa‘u mamoe poa faalanu ulaula, ma pa‘u takesa, ua latou aumaia.

24E taitoatasi uma o e na faitaulaga i le ario, ma le ‘apa memea, ua au mai e ia le taulaga ia Ieova; e taitasi uma foi na i ai laau o le setima e aoga i se mea o le galuega, ua aumaia.

25O fafine taitoatasi uma foi ua atamamai, ua milo i o latou lima, ma au mai o mea na milo, o le ie uli, ma le pāuli, ma le mūmū, ma le ie vavae.

26O fafine uma foi na uai i ai o latou loto ma le poto, ua milo e i latou fulufulu ‘oti.

27O alii foi, ua au mai e i latou o maa soama, ma maa e teu ai i le efota ma le ufifatafata;

28ma le mea manogi, ma le suāuu e mu a‘i le afi, ma le uu e faauu a‘i, atoa ma le mea manogi lelei e mu.

29E taitoatasi uma o tane atoa ma fafine e na manatu i ai i o latou loto, ua aumaia mea e fai a‘i galuega uma lava na poloai mai ai Ieova ia Mose ia faia; ua aumaia ma le loto e le fanauga a Isaraelu ia Ieova.

30Ona faapea atu lea o Mose i le fanauga a Isaraelu, Faauta, ua valaauina e Ieova i lona lava igoa o Pesaleli, o le atalii o Auri, o le atalii lea o Huro, o le itu aiga o Iuta;

31ua faatumuina foi o ia i le Agaga o le Atua i le poto, ma le faautauta, ma le iloa lelei, e fai ai galuega uma lava;

32ina ia mafaufau o ia i galuega faigata, e galue o ia i le auro, ma le ario, ma le ‘apa memea;

33e togitogi foi i maa e faamau ai, e togitogi foi i laau, e fai ai galuega faigata uma lava.

34Ua ia tuuina i lona loto ia mafai ona a‘oa‘o atu, o ia atoa ma Aliavu, o le atalii o Aisamako, o le itu aiga o Tanu.

35Ua na faatumuina foi i laua i le poto e fai galuega uma a le tufuga togitogi mea, ma le galuega a le tufuga poto, ma lē lalaga ie lanu eseese, o le ie uli, ma le pāuli, ma le mūmū, ma le ie vavae, atoa ma le galuega a ē lalaga mea, ma mata galuega eseese, ma galuega a e mafaufau i galuega faigata.