1Le lagi e, uai mai ia ou taliga, ona ou tautala atu ai lea; le lalolagi e, faalogologo mai ia i upu a lo‘u gutu.
2O la‘u mataupu e sisina ifo ia e pei o le ua, o la‘u tautalaga e toto ifo lea e pei o le sau; e pei o timuga i le vao mu‘a, e pei o uaga foi i le vao iti;
3auā ou te valaau atu i le suafa o Ieova; ia outou vivii atu i le silisili ese o lo tatou Atua.
4O le Papa, e sao lava lana galuega; auā e tonu ona ala uma lava; o le Atua faamaoni, e le o ia te ia se amioletonu, o le amiotonu ma le amio sa‘o lava ia.
5Ua leaga i latou, e le o lana fanau, a o lo latou ila; o le tupulaga faapiopio ma le faa‘ole‘ole.
6Tou te faapea ea ona taui atu ia Ieova, le nuu valea e ma le le poto? E le o lou Tamā ea o ia sa faatauina mai ai oe? E le o ia ea na faia oe, ma na faatumauina oe?
7Ia e manatua aso o le vavau; mafaufau ia i tausaga o lea tupulaga ma lea tupulaga; fesili atu i lou tamā, na te ta‘u mai ai ia te oe; o outou toeaina foi, latou te fai mai ai ia te oe.
8O ona po na tofitofia ai e le Silisili ese o nuu, ma na faataapeapeina e ia le fanau a Atamu, na ia faia tuaoi o le nuu, e tusa ma le faitau o le fanauga a Isaraelu.
9Auā o le tofi o Ieova o lona nuu lea; o Iakopo o lona tofi lea ua fuafuaina.
10Na ia maua o ia i le vao, o le mea e le āina, e uio ai manu feai, ma ua gaogao; na ia siosio ia te ia, ma a‘oa‘o atu ia te ia, na ia leoleo ia te ia e pei o lona tamatamaimata.
11E pei o le aeto ona faaoso i ana tama, e faapepepepe i luga o ana tama, e fola ona apaau, e saposapo ia te i latou, e ave ia te i latou i luga i ona apaau;
12sa faapea Ieova e toatasi ona ta‘ita‘i ia te ia, sa leai foi se atua ese e toalua ma ia.
13Na ia faatietie ia te ia i mea maualuluga o le lalolagi, ina ia ‘ai foi o ia i fua o le fanua; na ia fafaga foi ia te ia i le meli mai le papa, ma le suāuu mai le papa alā;
14o suāsusu to‘a o povi, ma suāsusu o mamoe, o e pepeti foi o tamai mamoe, ma mamoe poa o Vasana, o ‘oti poa foi, ma le saito e sili ona lelei; na e inu foi i le suāvine totototo e le suia.
15Na puta Iesuruna, ma ua vaogata; ua e puta, ua e tino tele, ua e puta lava; ona tuulafoaiina lea e ia o le Atua na ia faia o ia, ma ua ‘ino‘ino o ia i le Papa o lona olataga.
16Na latou faatupuina lona fuā ona o atua ese; na latou faaonoono ia te ia i mea inosia.
17Na latou fai taulaga i temoni, e le o le Atua; o atua na le iloa e i latou; o atua fou, na se‘i tutupu, na le matatau i ai o outou tamā.
18Ua le manatua e oe le Papa na fanaua oe, ma ua e faagalogaloina le Atua na ia faia oe.
19Na silasila Ieova, ona ‘ino‘ino lea o ia ia te i latou, ona o le faaonoono mai o ona atalii ma ona afafine.
20Ona fetalai mai lea o ia, Ou te ‘alo o‘u mata ia te i latou, ia ou iloa pe se a lo latou iuga; auā o le tupulaga faapiopio i latou, o le fanau ua le o i ai se faamaoni.
21Ua faatupuina e i latou lo‘u fuā i le mea ua le se atua; ua faaonoono i latou ia te au i a latou mea faatauvaa; o au foi, ou te faatupuina lo latou fuā ia te i latou e le se nuu; ou te faaonoono ia te i latou i le nuu valea.
22Auā ua si‘a le afi i lo‘u ita, e mu ifo foi ia e oo lava i seoli e maulalo lava; e faaumatia ai le lalolagi ma ona fua, e mu ai foi faavae o mauga.
23Ou te faaputuina i luga ia te i latou mea leaga; ou te faauma atu a‘u u fanafana ia te i latou.
24E tinovavale i latou i le oge, e faaumatia foi i le ma‘i vevela, ma le mala e fano ai; ou te auina foi manu feai īa te i latou, ma mea oona o gata o le eleele.
25O le pelu i tua o le aai, ma le mata‘u i totonu, e faumatia ai taulelea ma taupou, o tama meamea ma tagata ulusinā.
26Na ou fai ane, Ou te faataapeape ia te i latou, ou te faateaeseina lo latou faamanatuga i tagata;
27ana ou le fefe i le faaonoono o e ita mai, ne‘i le iloa e o latou fili, ne‘i latou faapea ane, O tatou lima malosi, a e le o Ieova na faia o nei mea uma.
28Auā o le nuu i latou e le o i ai ni pulega, ua leai foi se faautauta ia te i latou.
29E, ana latou popoto, ana latou iloa lenei mea! Ina ia latou mafaufau i o latou iuga.
30Pe faapefea ona tulia e le toatasi le toaafe, ma tutuli e le toalua o afe e sefulu, ane le faatauina atu i latou e lo latou Papa, ma tuuina atu i latou e Ieova?
31(Auā e le pei o lo tatou Papa lo latou papa, ua fai foi o e ita mai ia te i tatou ma faamasino i ai.)
32Auā o lo latou vine mai le vine o Sotoma lea, mai fanua o Komoro foi; o latou fua o vine o vine oona ia, e oona foi o latou fuifuivine;
33o le mea ‘ona o gata o latou uaina, ma le mea matuā ‘ona o asipi.
34E le teua ea lenei mea e au, ma faamauina faatasi ma a‘u oloa?
35O ia te au le taui ma sui, atoa ma le taui atu i ona po e mapeva ai o latou vae; auā ua lata mai le aso latou te malaia ai, o loo faataalise mai foi mea a oo ia te i latou.
36Auā e faamasinoina e Ieova lona nuu, e salamo foi o ia ona o ana auauna, pe a silafia e ia ua mavae lo latou malosi, ma ua le toe se pologa po o se saoloto.
37Ona fetalai mai lea o ia, O fea o i ai o latou atua, o le papa na latou faatuatua i ai,
38o e na aai i ga‘o o a latou taulaga, o e na inu le uaina o a latou taulaga i mea e inu? Ia latou tutū mai, ma fesoasoani ia te outou, ia fai i latou ma lafitaga mo outou.
39O lenei, ia outou iloa o a‘u, o a‘u lava o ia, e leai foi se atua e toalua ma a‘u; ou te fasiotia, ma ou faaolaina; ou te taia, ma ou faamaloloina; e leai foi se na te laveai mai ai lo‘u lima.
40Auā ou te sii lo‘u lima i le lagi, ma ou faapea ane, Ou te ola e faavavau.
41Afai ou te faamaai la‘u pelu pupula, ma tago lo‘u lima i le faamasinoga, ou te taui ma sui i e o fai a‘u ma fili, ma ou taui atu i e o ‘ino‘ino mai ia te au.
42Ou te faainu ia onā a‘u u fanafana i le toto, e ‘ai foi la‘u pelu i tino o tagata; o le toto o e ua fasia, ma e ua faatagataotaua, o alii sili o e ita mai.
43Outou nuu ese e, ina olioli ia faatasi ma lona nuu; auā na te taui ma sui le toto o ana auauna, na te tuuina atu foi le taui i e o fai o ia ma fili; e togiolaina foi e ia le laueleele o lona nuu.
44Ua alu atu Mose, ma fai atu i upu uma o lenei pese a o faalogologo mai le nuu, o i laua ma Iosua le atalii o Nuno.
45Ua uma foi ona fai atu e Mose nei upu uma ia Isaraelu uma lava;
46ona ia fai atu lea ia te i latou, Ia outou manatunatu i upu uma ou te ta‘u atu ia te outou i le aso ne‘i; tou te poloai atu ai i a outou fanau ia anaana e faia upu uma o lenei tulafono.
47Auā e le se upu faatauvaa lea ia te outou, auā o i ai lo outou ola; o lenei mea foi tou te faafualoa ai o outou aso i le laueleele, tou te sopoia atu ai Ioritana e fai mo outou.
48Ua fetalai mai foi Ieova ia Mose i lea lava aso, ua faapea mai,
49Ina alu ae ia oe i lena mauga, o Aperima, o le mauga o Nepo, o i le nuu o Moapi, o loo fesagai ma Ieriko; ma e vaai atu i le nuu o Kanana ua ou foaiina atu i le fanauga a Isaraelu e fai mo latou.
50E te oti foi i le mauga e te alu ae i ai, e faatasiina atu foi oe i lou nuu, e faapei ona oti o Arona lou uso i le mauga o Horo, ua faatasiina atu foi i lona nuu;
51auā na agasala mai oulua ia te au i luma o le fanauga a Isaraelu i le vai o Meripa-katesa i le vao o Tisina; auā na le faapaiaina o a‘u e oulua i luma o le fanauga a Isaraelu.
52E vaai atu oe i le nuu o i ou luma, a e te le oo i le nuu ua ou foaiina atu i le fanauga a Isaraelu.
Who We AreWhat We EelieveWhat We Do
2025 by iamachristian.org,Inc All rights reserved.
