1Ua iloa e Ioapo le tama a Seruia, ua loto atu le tupu ia Apisaloma;
2ona avatu lea o le feau a Ioapo i Tikoa, ua aami mai ai le fafine poto, ua fai atu ia te ia, Ia e faatagā faanoanoa, ma e ofu i ofu faanoanoa, aua foi e te uu oe, a ia e faapei o se fafine ua faanoanoa i aso e tele ona o le ua oti.
3E te alu atu foi i le tupu, ma e fai atu ia te ia i upu faapenei; ona tuutaliga atu lea e Ioapo o upu ia te ia.
4Ua fai atu le fafine Tikoa i le tupu, ma faapaūfaō i le eleele, ua ifo ia te ia, ma fai atu, Fesoasoani mai ia, le tupu e!
5Ua fai mai le tupu ia te ia, O le a ea? Ua fai mai o ia, O a‘u lava le fafine nofo fua, ua oti la‘u tane.
6Sa i lau auauna fafine tama tane e toalua, sa la femisai i le vao, ua leai se na te pupulu ia te i laua; ona fasia lea o le tasi e le tasi, ua fasioti lava ia te ia.
7Faauta mai foi, ua tutu mai le aiga uma i lau auauna fafine, o loo faapea mai i latou, Tuu mai ia o le na fasia lona uso, ina ia matou fasiotia o ia e sui a‘i lona uso na ia fasia; matou te fasiotia lava le ua i ai le tofi; ona latou tineia lea o la‘u malala ola o loo toe, e le tuu mai i la‘u tane se igoa ma se toe tagata i le fogāeleele.
8Ua fai mai le tupu i le fafine, Alu ia oe i lou fale; a o a‘u, ou te fai atu ia te i latou i lau mea.
9Ua fai mai le fafine Tikoa i le tupu, Lo‘u alii e, le tupu, ia ia te au le sala atoa ma le aiga o lo‘u tamā, a ia sao le tupu ma lona nofoālii.
10Ona fai atu lea o le tupu, Ai se fai atu ia te oe, au mai o ia ia te au, ona le toe tago atu lea o ia ia te oe.
11Ua fai mai le fafine, Ia manatu le tupu ia Ieova lou Atua, ma ia le faaopoopo i le na te taui i le toto e faaumatia ai, ina ia latou le fasioti i la‘u tama. Ua fai atu o ia, O loo soifua Ieova, e le paū lava i le eleele se lauulu o lau tama.
12Ua fai mai le fafine, Se‘i fai atu le upu a lau auauna fafine i lo‘u alii le tupu. Ua fai atu o ia, Ina fai mai ia.
13Ona fai mai lea o le fafine, O le a le mea ua e manatu ai faapea i le nuu o le Atua? Ua fetalai mai foi le tupu i lenei mea peiseai o le ua sese, ina ua le faafoisia mai e le tupu le na tulia e ia.
14Auā e oti lava i tatou, e tusa foi ma le suāvai ua faamaligiina i le eleele, e le ma faapotopotoina; e lei fasiotia foi o ia e le Atua, a ua na manatua se mea ia le tulia ai nai ia te ia le ua tulia.
15O lenei, ua ou sau e tautala atu i lo‘u alii le tupu i nei mea, auā na faamatau le nuu ia te au; ona fai atu lea o lau auauna fafine, Ou te tautala atu lava i le tupu; atonu e faia e le tupu le mea e fai atu ai lana auauna fafine.
16Auā e faafofoga mai le tupu, na te laveai mai i lana auauna fafine ai le lima o le tagata ua fia faaumatia a‘u atoa ma la‘u tama ai le tofi o le Atua.
17Na faapea foi lau auauna fafine, E fai ma faamatalaloto le fetalaiga a lo‘u alii le tupu; auā e pei o se agelu a le Atua, o loo faapea lo‘u alii le tupu e faafofoga i le lelei ma le leaga; ona i ai lea ia te oe o Ieova lou Atua.
18Ona fai atu ai lea o le tupu, ua faapea atu i le fafine, Aua lava e te nā ia te au le mea ou te fesili atu ai ia te oe. Ua fai mai le fafine, Se‘i fetalai mai ia lo‘u alii le tupu.
19Ona fai atu lea o le tupu, E le ‘au ea oulua ma Ioapo i lenei mea uma? Ua tali mai le faine, ua faapea mai, Ua e soifua oe lo‘u alii e, le tupu, e le ‘alo se tasi i le itu taumatau, po o le itu tauagavale ai mea uma ua fetalai mai ai lo‘u alii le tupu; auā o lau auauna o Ioapo, o ia lava na fai mai ia te au, o ia foi na tuutaliga nei upu uma i lau auauna fafine;
20ua saunia ai nei upu e lau auauna o Ioapo, ina ia faaoo ai i lenei mataupu; ua poto foi lo‘u alii, pei ona poto o se agelu a le Atua, e silafia ai mea uma i le lalolagi.
21Ona fai atu lea o le tupu ia Ioapo, Faauta ea, ua ou faia lenei mea; alu ia oe, ma e amia le taulealea o Apisaloma.
22Ona faapaū faō ai lea o Ioapo i le eleele, ua ifo, ma faafetai i le tupu; ua fai mai foi Ioapo, O le aso nei ua iloa ai e lau auauna ua alofagia a‘u e oe lo‘u alii le tupu, ina ua faia e le tupu le mea na fai atu ai lau auauna.
23Ona tulai lea o Ioapo, ua alu atu i Kasuri, ua na aumaia Apisaloma i Ierusalema.
24Ua fai ane le tupu, Alu ane ia i lona fale, a e aua ne‘i ma feiloai. Ona alu ane ai lea o Apisaloma i lona fale, a ua le feiloai ma le tupu.
25Sa leai se tagata i Isaraelu uma e pei o Apisaloma ona aulelei; sa matuā viia ai lava o ia; e afua mai i ona alofivae e oo i lona tumuai, e leai se pona ia te ia.
26A sele lona lauulu, (auā o le gataaga o tausaga fai soo na ia sele ai; auā sa mafatia ai o ia, ona sele ai lea,) na ia fuatia le lauulu o lona ulu, e lua selau sekeli i le fua a le tupu.
27Na fanau atalii o Apisaloma e toatolu, ma le afafine e toatasi, o lona igoa o Tamara; o ia le fafine lalelei lava.
28Ua nofo Apisaloma i Ierusalema i tausaga e lua, a e la te lei feiloai lava ma le tupu.
29Ona feauina lea e Apisaloma o Ioapo, ina ia na auina atu o ia i le tupu; a e le mafai ona sau o ia ia te ia. Ona toe feau faalua lea ia te ia, a e le mafai ona sau o ia.
30Ona fai atu lea o ia i ana auauna, Faauta, o le fanua o Ioapo o loo tatou tuaoi; o i ai foi ana karite, ō ia outou, ina faamu ai i le afi. Ona faamuina lea e auauna a Apisaloma o le fanua i le afi.
31Ona tulai lea o Ioapo, ua alu ane ia Apisaloma i lona fale, ua fai mai ia te ia, O le a le mea ua faamu ai e au auauna lo‘u fanua i le afi?
32Ona fai atu lea o Apisaloma ia Ioapo, Faauta, na ou feau atu ia te oe, ua faapea, Sau ia, ou te auina atu oe i le tupu, ia faapea, Se a le mea na ou sau ai nai Kaseri? E lelei lava ana a‘u iai pea; o lenei, se‘i ma feiloai ma le tupu; afai foi o ia te au se agasala, ia fasiotia a‘u e ia.
33Ona alu atu lea o Ioapo i le tupu, ua ta‘u atu ai ia te ia; ona aami ai lea e ia o Apisaloma, ua ia alu atu i le tupu, ma ifo toele i luma o le tupu; ona sogi atu lea o le tupu ia Apisaloma.
Who We AreWhat We EelieveWhat We Do
2025 by iamachristian.org,Inc All rights reserved.
