I. SAMUELU, 26 - Samoan Old Version Bible

O LE MATAUPU XXVI.Ua toe faasaoina Saulo e Tavita a o moe o ia.

1Ua o atu tagata o Sifi ia Saulo i Kipea, ua faapea atu, E le o lafi ea Tavita i le mauga o Hakila i luma o Iesimoni?

2Ona tulai lea o Saulo, ua alu ifo i le vao o Sifi; ua ia te ia foi tagata o Isaraelu e na filifilia e tolu gaafe, e saili ia Tavita i le vao o Sifi.

3Ua to lauapi e Saulo i le mauga o Hakila, ua i luma o Iesimoni i le ala; a o Tavita, ua nofo o ia i le vao, ua iloa e ia ua mulimuli mai Saulo ia te ia i le vao.

4Ua aauina atu e Tavita ni matavao; ua ia iloa ai, e moni lava ua sau Saulo.

5Ona tulai atu lea o Tavita, ua alu atu i le mea ua to ai lauapi a Saulo; ua vaai atu Tavita i le mea ua taoto ai Saulo, o Apineru foi le atalii o Neru, le alii e pule i ana ‘au; ua taoto Saulo i le ‘olo, a o le nuu ua to lauapi i latou e siosio ai ia te ia.

6Ona fai atu lea o Tavita, ua faapea atu ia Aimeleka le sa Hetī, ma Apisai le tama a Seruia, le uso o Ioapo, ua faapea, O ai ea ma te o ifo ma a‘u ia Saulo i le togālauapi? Ua fai mai Apisai, O a‘u, ta te o ifo ma oe.

7Ona o atu lea o Tavita ma Apisai i le nuu i le po; faauta ia Saulo ua taoto, o loo moe i le ‘olo, ma lona tao ua sunui i le eleele i tafatafa o lona ulu; o Apineru foi ma le nuu, o loo taooto i latou e faasiosio ai ia te ia.

8Ona fai mai lea o Apisai ia Tavita, Ua tuuina mai e le Atua i le po nei le ua ita ia te oe; o lenei, seia ou tutu‘i faatasi ia te ia i le tao e oo i le eleele, ou te le tutu‘i faalua ia te ia.

9Ona fai atu lea o Tavita ia Apisai, Aua e te fasioti ia te ia; auā po o ai ea na te faaoo lona lima i le ua faauuina e Ieova, a e le nofo sala ai o ia?

10Ua fai atu foi Tavita, O loo soifua Ieova, e fasia lava o ia e Ieova, pe oo i ona aso e oti ai, pe alu ifo i se taua e fano ai.

11Ia faamamao e Ieova ia te au, ina ne‘i faaoo lo‘u lima i le ua faauuina e Ieova; a ia e tago i le tao o loo i tafatafa o lona ulu, ma le fagu vai, i le ta o ai i taua.

12Ua ave e Tavita le tao ma le fagu vai sa i tafatafa o le ulu o Saulo, ona o lea o i laua; ua le vaai mai se tasi, ua leai se iloa, ua leai foi se ala, auā ua momoe i latou uma, ona o le moe gase mai ia Ieova ua oo ia te i latou.

13Ona alu ane ai lea o Tavita i le tasi itu, ua tu i le tumutumu o le mauga, e mamao atu, e tele se mea ua va a‘i i latou.

14Ona valaau ai lea o Tavita i le nuu atoa ma Apineru le atalii o Neru, ua faapea, E te le tali mai ea, Apineru? Ua tali mai Apineru, ua faapea mai, O ai ea oe, e te valaau i le tupu?

15Ona fai atu lea o Tavita ia Apineru, E te le se toa ea oe? O ai se lua te tusa ma oe i Isaraelu? O le a le mea e te le leoleo ai lou alii le tupu? Auā na alu atu le tasi tagata e fasioti i lou alii te tupu.

16E le lelei lenei mea ua e faia; o loo soifua Ieova, o tagata e tatau ona oti outou, auā na outou le leoleo i lo outou alii le ua faauuina e Ieova; o lenei foi, ina iloilo po o fea le tao o le tupu, ma le fagu vai sa i tafatafa o lona ao?

17Ua iloa e Saulo le leo o Tavita, ona fai mai lea o ia, O lou leo ea lea, lo‘u atalii e Tavita? Ua fai atu Tavita, O lo‘u leo lava, lo‘u alii e le tupu.

18Ua fai atu foi, O le a ea lenei, lo‘u alii e, ina ua e tulituliloa mai i lau auauna? Auā se a se mea ua ou faia? Po o le a ea le leaga o loo ia te au?

19O lenei, ia faafofoga mai lo‘u alii e le tupu, i upu a lau auauna; afai ua ului atu oe e Ieova ia te au, ia faalauleleiina lona finagalo i se taulaga; a e afai o tagata, ia malaia i latou mai luma o Ieova, auā ua latou tuli ese ia te au i nei ona po, ina ia a‘u le faatasi atu i le tofi o Ieova, o loo faapea mai i latou, Alu ia, ina auauna i atua ese.

20O lenei, aua ne‘i masaa ifo lo‘u toto i le eleele i luma o Ieova; auā ua maliu mai le tupu o Isaraelu e saili se ‘utu fiti, peiseai ua tuli e se tasi le koli i mauga.

21Ona fai mai lea o Saulo, Ua ou agasala; ina foi mai ia, lo‘u atalii e Tavita, auā ou te le toe agaleaga ia te oe, auā ua e faapelepeleina lo‘u ola i lenei po; faauta, ua ou amio faavalea, ma ou sese tele lava.

22Ona tali atu lea o Tavita, ua faapea atu, Faauta, o le tao o le tupu, ia sau se taulealea na te avatu ai.

23A o Ieova na te taui atu i tagata taitasi i lana amiotonu ma lona faamaoni; auā na tuuina mai oe e Ieova ia te au i lenei po, a ua ou le mafai ona faaoo lo‘u lima i le ua faauuina e Ieova.

24Faauta, pei ona faapelepeleina lou ola i lenei po e a‘u, ia faapea ona faapelepeleina lo‘u ola e Ieova, ma ia laveai ia te au ai puapuaga uma.

25Ona fai mai lea o Saulo ia Tavita, Ia manuia oe lo‘u atalii e Tavita, e te faia e oe mea e sili, ma e malo pea lava. Ona alu ai lea o Tavita i lona ala, a e foi Saulo i le mea e nofo ai o ia.