1Ua valaau e le perofeta o Elisaia le tasi soo o le au perofeta, ua faapea atu i ai, Ina fusi ia lou sulugātiti, ma ave i lou lima lenei fagu uu, ma e alu i Ramota-Kiliata;
2a ē oo foi i ai ia e sailia Ieu le atalii o Iosefatu le atalii ia o Nimesi, i le e ulu atu, ma fai atu ia te ia ia tulai ai luma o ona uso, i le ave ia te ia i se afeafe tuloto;
3ona e tago ai lea i le fagu uu, ma liligi ifo ai i lona ulu, ma fai atu, O loo faapea ona fetalai mai o Ieova, Ua ou faauu ia te oe e fai ma tupu o Isaraelu. I le ē toina le puipui, ma e sola, aua lava ne‘i e faatali.
4Ona alu ai lea o le taulealea, o le perofeta foi le taulealea, i Ramota-Kiliata.
5Ua oo atu ia, faauta, o nonofo mai alii e pule i ‘au; ona fai atu ai lea o ia, Le alii e, o la‘u feau ia te oe. Ona fai mai ai lea o Ieu, O se fea ea o i matou nei uma? Ona fai atu ai lea o ia, Le alii e, o oe lava.
6Ona tulai ai lea o ia, ua ulu atu i fale; ona liligi ifo lea e ia o le uu i lona ulu, ua fai atu ai ia te ia, O loo faapea ona fetalai mai o Ieova le Atua o Isaraelu, Ua ou faauu ia te oe e fai ma tupu o le nuu o Ieova, o Isaraelu.
7E te fasia le aiga o Aapo lou alii, ina ia ou taui ma sui ia Iesepela le toto o a‘u auauna le au perofeta, atoa ma le toto o auauna uma a Ieova.
8Auā o le a fano le aiga uma lava o Aapo; ou te faaumatia foi i sa Aapō o se tulai atu i se aupa, o le pologa atoa ma le saoloto ua i Isaraelu;
9ou te faatatau foi le aiga o Aapo i le aiga o Ierepoamo le atalii o Nepata, ma le aiga o Paasa le atalii o Akia;
10e ‘aina foi e ulī Iesepela i le fanua o Isereelu, e leai foi se na te tanumia o ia. Ona toina lea e ia o le puipui, ua sola.
11Ona toe alu atu ai lea o Ieu i auauna a lona alii. Ona fai mai lea o le tasi ia te ia, Pe ni malie pe ni tamai? O le a le mea na sau ai lea vale ia te oe? Ona fai atu ai lea o ia ia te i latou, Ua outou iloa le tagata atoa ma lana feau.
12Ona latou tali mai ai lea, Ua pepelo. Ina ta‘u mai ia ia te i matou. Ona fai atu ai lea o ia, Ua faapea ma faapea lana upu ia te au, ua fai mai, O loo faapea ona fetalai mai o Ieova, Ua ou faauu ia te oe e fai ma tupu o Isaraelu.
13Ona faataalise ai lea o i latou, ua taitasi ma tago i lona ofu, ma tuu i lalo ia te ia i luga lava o le ala faaapefai, ua faasasau pu, ma faapea atu, Ua fai Ieu ma tupu.
14Ona foua ai lea o Ioramo e Ieu le atalii o Iosefatu, le atalii ia o Nimesi. (Na leoleo foi e Ioramo Ramota-Kiliata, o i latou ma Isaraelu uma, ona o Asaeli le tupu o Suria.
15A ua foi atu le tupu o Ioramo i Isereelu e fofo ai ona manua na manua ai o ia ia Suria i le taua ma Asaeli le tupu o Suria.) Ona fai atu lea o Ieu, Afai e tatau ia te outou, aua ne‘i sola se tasi i le aai nei e alu e ta‘u atu i Isereelu.
16Ona tietie ai lea o Ieu i le kariota, ua alu i Isereelu, auā na taoto ai Ioramo; ua alu ifo foi Aasaia le tupu o Iuta e o‘oo‘o ia Ioramo.
17Ua tu foi le tagata vaai i luga o le ‘olo i Isereelu; ona iloa atu ai lea e ia o le vao tagata o Ieu o loo alu atu; ona fai atu ai lea, Ua ou iloa atu le vao tagata. Ona fai mai lea o Ioramo, Ina au atu ia o se tietie i se solofanua na te faafetaiaiina i latou, ma fai ane i ai, Pe filemu ea?
18Ona alu ai lea o le tietie i le solofanua e faafetaiai ia te ia, ua faapea atu, O loo faapea ona fetalai mai o le tupu, Pe filemu ea? Ona fai mai ai lea o Ieu, Ona a se‘i filemu lava lea? Ina sau ia oe i o‘u tua. Ona fai atu ai lea o le tagata vaai, ua faapea atu, Ua oo atu ia te i latou le na auina, a ua le toe foi mai.
19Ona auina atu ai lea e ia o le tietie i le solofanua o le atu lua lea; ua oo atu o ia ia te i latou, ua faapea atu, O loo faapea ona fetalai mai o le tupu, Pe filemu ea? Ona tali mai ai lea o Ieu, Ona a se‘i filemu lava lea? Ina sau ia oe i o‘u tua.
20Ona fai atu ai lea o le tagata vaai, ua faapea atu, Ua oo lava ia ia te i latou, a ua le toe foi mai; o le faamomo‘e foi, e faapei o le faamomo‘e a Ieu le atalii o Nimesi, auā e soona tele‘a‘i ona faamomo‘e e ia.
21Ona fai ane lea o Ioramo, Ina sauni ia. Ona sauni ai lea o lona kariota. Ona o ai lea o Ioramo le tupu o Isaraelu, atoa ma Aasaia le tupu o Iuta, taitasi ma lona kariota, ua la o e faafetaiai ia Ieu; ua latou fetaiai foi ma ia i le fanua o Napota le Isereelu.
22Ua iloa Ieu e Ioramo, ona fai atu ai lea o ia, Ieu e, e filemu ea? Ona fai mai ai lea o ia, Se a se filemu, ona le ua tele ea o faitaaga a lou tinā o Iesepela, ma ana togafiti faataulāitu?
23Ona liliu ai lea o Ioramo, ma sola, ua faapea atu ia Aasaia, Aasaia e, o le fouvale le mea nei.
24Ona lo‘u gase lea e Ieu o le aufana, ua fana ua lavea ai Ioramo i le vaitau‘au, ua ati le u i lona fatu; ona paū ai lea o ia i totonu o lona kariota.
25Ona fai atu ai lea o Ieu ia Pitika o lana ave ‘au, Ina avae ia o ia, ina lafo i le fāsi fanua o Napota le Isereelu, auā ia e manatua sa ta o toalua o tietie i le kariota, ma mulimuli atu i lona tamā o Aapo, ona tuuina atu ai lea e Ieova o lena avega ia te ia;
26o loo fetalai mai Ieova, Na ou iloa lava ananafi le toto o Napota ma le toto o ona atalii; o loo fetalai mai Ieova, Ou te taui atu foi ia te oe i lenei fanua. O lenei, ina ave ia e lafo ia te ia i le fanua, e tusa ma le afioga a Ieova.
27Ua iloa e Aasaia le tupu o Iuta, ona sola ai lea o ia i le ala i le fale ua i le fanua. Ona tuliloa lea o Ieu ia te ia, ua fai atu foi, ia fasi foi ia te ia i le kariota. Ona fasia lea o ia i le aega i Kuru o i Ipelamo. Ona sola ai lea o ia i Mekito, ua oti ai.
28Ona ave ai lea o ia e ana auauna i le kariota i Ierusalema, ua tanu ia te ia i lona tuugamau faatasi ma ona tamā i le aai o Tavita.
29O le tausaga e sefulu ma le tasi o Ioramo le atalii o Aapo na fai ai Aasaia ma tupu e pule ia Iuta.
30Ua oo Ieu i Isereelu, ona lagona lea e Iesepela, ona vali ai lea e ia ona mata, ma teuteu lona ulu, ua vaai mai i le faamalama.
31Ua ulu atu Ieu i le faitotoa, ona fai mai ai lea o ia, Pe na manuia ea Semeri, o le na fasioti i lona alii?
32Ona tepa ae ai lea o ia i le faamalama, ua faapea atu, O ai ea e ‘au ia te au? Po o ai? Ona vaai mai ai lea ia te ia o auauna sili e toalua pe toatolu.
33Ona fai atu ai lea o ia, Ia outou lafo ifo ia ia te ia. Ona latou lafo ifo ai lea ia te ia; ua pisia foi le pa ma solofanua i lona toto; ona soli ai lea o ia ia te ia.
34Ua ulufale atu o ia, ua ‘ai foi ma inu, ona fai atu ai lea, Ina asiasi ia i lena fafine malaia, ma tanu ia te ia; auā o ia o le afafine o le tupu.
35Ona latou o ai lea e tanu ia te ia; ua na o lona ulupoo, ma ona tapuvae, ma ona tapulima na latou maua.
36Ona latou foi mai ai lea, ua ta‘u mai ia te ia. Ona fai atu ai lea o ia, O le afioga a Ieova lea, na fetalai mai ai i lana auauna o Elia le Tisepi, e faapea mai, E ‘aina e ulī le tino o Iesepela i le fanua o Isereelu;
37e i ai foi le tino o Iesepela i luga o le laueleele i le fanua o Isereelu pei o otaota; latou te le faapea ane foi, O Iesepela lenei.
Who We AreWhat We EelieveWhat We Do
2025 by iamachristian.org,Inc All rights reserved.
