IOPU, 36 - Samoan Old Version Bible

O LE MATAUPU XXXVI.O upu a Eliu.

1Ua toe fai mai foi Eliu, Ia e onosai mai pea teisi ia te au,

2ou te faaali atu ai ia te oe, auā ua totoe pea upu mo le Atua.

3Ou te aumaia lo‘u poto ai le mea mamao, ou te ta‘uamiotonuina foi le na faia a‘u.

4Auā e moni lava, e le pepelo a‘u upu; ua ia te oe le tasi ua faamaoni lona poto.

5Faauta, ua silisili ese le Atua, a e le ‘ino‘ino o ia i se tasi, ua silisili ese le malosi o lona finagalo.

6Na te le faaola i le ua amio leaga; a e faia e ia le faamasinoga mo e ua puapuagatia.

7Na te le ‘alo ona fofoga i e ua amiotonu; a e silasila i tupu i nofoālii; na te faatumauina foi i latou e faavavau, ua faasilisiliina foi i latou.

8Afai foi ua noanoatia i latou i maea uamea, ma lavelavea i latou i maea o le puapuaga,

9ona faaali ai lea e ia ia te i latou o mea ua latou faia, ma o latou solitulafono, ina ua tele lava.

10Ua ia faafaalogoina foi o latou taliga i aoaiga; ma fetalai atu, ia latou foi mai nai le amio leaga.

11Afai latou te faalogo ma auauna ia te ia, ona faauma ai lea o latou aso o manuia, ma o latou tausaga o fiafia.

12A e afai latou te le faalogo, ona faaumatia ai lea o i latou i le tao, e oti foi i latou e le popoto.

13A o e ua loto faalematau, ua latou faaputuina le toasa; latou te le alalaga ia te ia pe a noanoatia i latou e ia.

14E oti i latou a o taulelea; e iu foi o latou ola faatasi ma e ua faasotoma.

15Na te laveaiina le ua puapuagatia nai ona puapuaga; na te faafaalogoina foi o latou taliga a o sauaina i latou.

16E faapea foi ona ia ta‘ita‘ieseina o oe ai le mea va apiapi i le mea lautele e le o i ai se va apiapi; o le mea foi e laulauina i lau laoai e soona lololo lea.

17A ua e faaatoatoaina le faamasinoga a e amio leaga; e mulimuli le faasala i le faamasinoga.

18Auā ua i ai le toasa, ia oe, ne‘i aveesea oe e ia i le sasa; ona le faasaoina ai lea oe i se togiola tele.

19Na te finagalo ea i au oloa? Na te le finagalo lava i auro, po o faulaigāoa uma lava.

20Aua e te manao i le po, e avae ai nuu ai le mea o loo latou i ai.

21Ia oe, ne‘i e loto atu i le amio leaga; auā ua sili lou loto i lea mea i lou loto i le puapuaga.

22Faauta, ua silisili ese le Atua i lona malosi; o ai na te a‘oa‘o e faapei o ia?

23Po o ai ua togia ia te ia lona ala? O ai foi na te fai atu, Ua e faia amioletonu?

24Ia e manatua ona vivii i ana galuega o loo vaai i ai tagata;

25ua matamata i ai tagata uma lava, ua iloa mamao atu e tagata.

26Faauta, ua silisili ese le Atua, tatou te le iloa foi o ia; e le masino foi le faitau o ona tausaga.

27Auā e aveina ae e ia faaafuafu o vai; e totō ifo le ua e sui a‘i lona ausa, e mauluulu mai ai i ao;

28e totō tele mai ai i luga o tagata.

29E iloa foi ea se tasi ona fofola o le ao, ma le taalili mai o lona fale apitaga?

30Faauta, ua ia fofola i ona luga lona malamalama; ua ia ufiufi foi le iliti tai.

31Auā o ia mea ua ia faasalaina ai nuu; ua ia foai mai ai foi mea e ‘ai e tele.

32Ua ia ufitia ona aao i le uila, na te poloai i ai i se mea e paū i ai.

33Ua ia faailoa mai lona faititili i luga o tagata, i luga o lafu atoa ma mea e tutupu.