1Ua mavae ia mea, mona ua faatumauina ai, ona sau ai lea o Sanerivi le tupu o Asuria, ua oo mai i Iuta, ma to lauapi i aai nofo ‘olo, ma ua manatu o ia e lepeti ai e fai mona.
2Ua iloa e Esekia ua sau Sanerivi, ma faasaga mai o ia e tau ma Ierusalema,
3ona filifili lea o ia ma alii ua ia te ia ma ana fitafita e pupuni i vaipuna ua i tua o le aai; ua latou fesoasoani foi ia te ia.
4Ona faapotopoto ai lea o tagata e toetele, ma ua latou pupuni i vaipuna uma, ma le alia ua tafe i totonu o le nuu, ua faapea ane, E o mai i se a tupu o Asuria, ma latou maua o vai e tele?
5Ua faamalosia o ia e ia, ma ua toe fai le pa uma ua solo, ma ua ati ae ia oo i ‘olo, ma le tasi pa i tua, ua ia faamalosia foi o Milo i le aai a Tavita, ma ua faia tao ma talita e tele;
6ona tofia lea e ia o alii e taulia taua e pule i le nuu, ma ua faapotopotoina i latou i le malae i le faitotoa o le aai, ma ua faamafanafana atu ia te i latou, ua faapea atu,
7Ia outou faamalosi ma loto tetele, aua le fefefe, aua foi tou te matatau ona o le tupu o Asuria, ona o le vao tagata uma foi ua faatasi ma ia; auā e toatele o ia te i tatou, a e toaitiiti o ia te ia.
8O ia te ia le lima o le tagata, a o ia te i tatou Ieova lo tatou Atua e fesoasoani mai ia te i tatou, ma tau ai o tatou taua. Ua faalagolago foi le nuu i upu a Esekia le tupu o Iuta.
9Ua mavae ia mea, ona aauina atu lea e Sanerivi le tupu o Asuria o ana auauna i Ierusalema, (a o ia ma lana itu taua uma sa ia te ia, na tau ma Lakisa,) ia Esekia le tupu o Iuta, atoa ma Iuta uma sa i Ierusalema, ua faapea atu,
10O loo faapea ona fetalai mai o Sanerivi le tupu o Asuria, Pe se a se mea ua outou faatuatua i ai tou te nonofo ai i le ‘olo i Ierusalema?
11E le o faaosoina ea outou e Esekia ia outou tuuina outou ia oti i le oge, ma le fia inu, o loo faapea atu, O Ieova lo tatou Atua na te laveai ia te i tatou ai le lima o le tupu o Asuria?
12E le ua aveeseina ea e lea lava Esekia ana mea maualuluga, ma ona fata faitaulaga, ma ua fai atu ia Iuta ma Ierusalema, ua faapea atu, Tou te ifo i luma o le fata faitaulaga e tasi, ma faamu ai mea manogi i ona luga?
13Tou te le o iloa ea o mea na faia e a‘u ma o‘u tamā i tagata uma o isi nuu? Ua mafaia ea e atua o ia nuu ona laveai i o latou nuu ai lo‘u lima?
14Po o ai se tasi o atua uma o ia nuu na faaumatia e o‘u tamā, ua mafaia ona laveai lona nuu ai lo‘u lima, ina ia mafaia e lo outou Atua ona laveai ia te outou ai lo‘u lima?
15O lenei, aua ne‘i olegia outou e Esekia, ma faaosoina outou faapena, aua foi tou te faatuatua ia te ia; auā e le mafaia e se atua o nuu uma ma malo, ona laveai lona nuu ai lo‘u lima, ma lima o o‘u tamā; a e maise foi lava lo outou Atua na te le laveaiina outou ai lo‘u lima.
16A ua faaopoopoina e ana auauna ona fai upu ia Ieova le Atua, ma Esekia lana auauna.
17Ua ia tusi mai foi o tusi e faifai ai ia Ieova le Atua o Isaraelu, ma faaleaga ia te ia, ua faapea, E pei o atua o tagata o isi nuu, ua le mafaia ona laveai o latou nuu ai lo‘u lima, e faapea ona le laveaiina e le Atua o Esekia lona nuu ai lo‘u lima.
18Ona valaau lea o i latou ua leo tele i le gagana a Iuta i tagata o Ierusalema sa i luga o le pa, e faamatau ia te i latou, ma faaatuatuvale ia te i latou, ina ia maua e i latou le aai.
19Ua latou upu leaga i le Atua o Ierusalema, e pei ona upu leaga i atua o nuu o le lalolagi na faia e lima o tagata.
20Ona tatalo atu ai lea o Esekia le tupu, ma Isaia le perofeta le atalii o Amota, ma la alalaga atu i le lagi ona o lenei mea.
21Ona auina mai ai lea o Ieova o le agelu, ma ua faaumatia e ia o toa malolosi uma, ma ta‘ita‘i, ma alii ave ‘au sa i le toagalauapi a le tupu o Asuria; ona toe foi atu lea o ia ma le mā i lona nuu. Ua ulufale atu o ia i le fale o lona atua, ona fasia lea o ia i lea mea e ana lava fanau i le pelu.
22Ua faasaoina e Ieova o Esekia, ma e ua nonofo i Ierusalema ai le lima o Sanerivi le tupu o Asuria, ma lima o nuu uma, ma ua leoleo ia te i latou i itu uma.
23E toatele foi na au mai taulaga ia Ieova i ierusalema, ma oloa tāua ia Esekia le tupu o Iuta. Sa mamalu foi o ia i luma o nuu uma talu mai ai.
24O ia ona po sa ma‘i ai Esekia ua tāli oti, ma ua tatalo atu o ia ia Ieova; ona fetalai mai ai lea o ia ia te ia, ma na tuuina mai ia te ia se faailoga.
25A ua le toe avatu e Esekia e tusa ma le mea alofa na faia ia te ia; auā na faamaualuga lona loto; sa oo ai le toasa ia te ia, ma Iuta, ma Ierusalema.
26A ua toe faamaulalo Esekia ona o le faamaualuga o lona loto, o ia atoa ma e ua nonofo i Ierusalema, ona le oo mai ai lea o le toasa o Ieova ia te i latou i ona po o Esekia.
27Sa ia Esekia le oloa ma le mamalu, e matuā tele lava; na ia faia foi mo ia o mea e teu ai ario, ma auro, ma maa tāua, ma mea manogi, ma talita, ma teuga matagofie uma;
28o fale foi e tuu ai saito, ma uaina, ma suāuu; ma mea e nonofo ai manu eseese uma, ma mea e nonofo ai lafu manu.
29Ua ia faia foi aai mona, ma lafu mamoe, ma lafu povi e tele; auā na foaiina mai e le Atua ia te ia o mea e matuā tele lava.
30O Esekia lenei na pupuni le vaipuna aupito i luga i Kiona, ma ua ta‘i tonu ifo i le itu i sisifo o le aai a Tavita. Sa manuia foi Esekia i mea uma na ia faia.
31A e peitai o le sāvali a alii o Papelonia, na latou auina mai ia te ia e fesili i le vavega sa faia i le nuu, sa tuua ai o ia e le Atua ina ia tofotofo ia te ia, ia iloa ai mea uma ua i lona loto.
32O toe o mea sa faia e Esekia, ma lona agalelei, faauta, ua tusia i le faaaliga ia Isaia le perofeta, le atalii o Amota, ma le tusi i tupu o Iuta ma Isaraelu.
33Ua taoto foi Esekia faatasi ma ona tamā, ma latou tanumia o ia i le aega i tuugamau o le fanauga a Tavita. Sa faaneenee ia te ia o Iuta uma ma e ua nonofo i Ierusalema i lona oti. Ona soloai ane ai lea o Manase lona atalii e fai ma tupu.
Who We AreWhat We EelieveWhat We Do
2025 by iamachristian.org,Inc All rights reserved.
