1Ieova e, faafofoga mai ia i la‘u tatalo, ma ia oo atu la‘u alaga ia te oe.
2Aua le ‘alo ou fofoga ia te au i le aso e puapuagatia ai a‘u; ia liliu mai ou fofoga ia te au; ia taalise ona e tali mai ia te au i le aso ou te valaau atu ai ia te oe.
3Auā ua mavae o‘u aso faapei o le asu, o o‘u ivi foi ua mu e pei o le motumotu.
4Ua sasaina ma ua magumagu lo‘u loto pei o le vao iti; o lea ua galo ai ia te au ona ‘ai i la‘u mea e ‘ai.
5O le leo o lo‘u mapuitiga ua pipii ai o‘u ivi i lo‘u aano.
6Ua tusa a‘u ma le kati o le vao; ua avea a‘u pei o le kusa i mea ua faatafunaina.
7O loo ou mataala, ma ua avea a‘u e pei o le manu itiiti e nofo toatasi i luga i le fale.
8O le aso atoa ua gaogao mai ai o e ita mai ia te au; o e ua faavalemalosi mai ia te au ua tauto i latou e agaleaga ia te au.
9Auā o loo ‘aina e a‘u o le lefulefu e pei o le mea e ‘ai, ua ou filogia foi la‘u mea e inu ma le tagi,
10ona o lou toatamai ma lou toasa; auā na e siitia a‘u i luga, na e lafotuina foi a‘u i lalo.
11O o‘u aso ua pei o le ata ua lafoia; o a‘u nei foi ua pei o le vao iti ona magumagu.
12A o oe, Ieova e, e afio oe e faavavau lava, ma le faamanatuga ia te oe, e āu tupulaga lava lea.
13E te tulai mai oe, e mutimuti vale lou alofa i Siona; auā ua oo mai ona po e alofaina ai o ia, ua oo lava i ona aso na tuupoina.
14Auā o loo fiafia au auauna i ona maa, o loo alolofa lava i lona efuefu.
15E matatau foi nuu ese i le suafa o Ieova, ma tupu uma o le lalolagi e matatau i lou mamalu.
16Auā e atiina ae Siona e Ieova, e iloa mai o ia i lona mamalu.
17E liuliualo mai o ia i le tatalo a le ua mativa, e le ‘ino‘ino foi o ia i la latou tatalo.
18E tusia lenei mea mo le tupulaga amuli; o le nuu foi e faia, latou te vivii atu ia Ioa.
19Auā ua silasila mai o ia mai luga i lona afioaga paia; ua silasila Ieova mai le lagi i le lalolagi;
20ina ia faafofoga o ia i le ōi o le ua noanoatia; ina ia tālaina e ia o e na tuu e oti;
21e ta‘uta‘u atu ai le suafa o Ieova i Siona, ma lona viiga i Ierusalema;
22pe a faapotopotoina faatasi o nuu ma malo e auauna ai ia Ieova.
23Na ia faavaivaia lo‘u malosi i le ala, na ia faaitiitiina foi o‘u aso.
24Na ou fai atu, Lo‘u Atua e, aua le aveeseina a‘u i le tautuluaga o o‘u aso; e āu tupulaga lava ou tausaga.
25O anamua na e faavaeina ai le lalolagi; o le lagi foi o le galuega lea a ou aao.
26E faaumatia ia mea, a o oe, e te tumau pea; e pala ia mea uma e pei o le ofu tele, e te liua ia e pei o le ofu, ona liua lava lea;
27a o oe, e faapea lava pea oe; e le iu lava ou tausaga.
28E nofo mau atalii o au auauna, o la latou fanau foi e faatumauina ia i ou luma.
Who We AreWhat We EelieveWhat We Do
2025 by iamachristian.org,Inc All rights reserved.
