1Ua faalogo tupu uma o sa Amorī sa i le itu o Ioritana i sisifo, ma tupu uma o sa Kananā e lata ane i le sami, ua faamateina e Ieova le vai o Ioritana i luma o le fanauga a Isaraelu ua tatou sopoia mai ai, ona faavaivaia ai lea o latou loto, ua le toe ai se malosi ia te i latou, ona o le fanauga a Isaraelu.
2O ona po ia na fetalai mai ai Ieova ia Iosua, Ia e faia ma oe polo fatu, ma toe faaperitomeina le fanauga a Isaraelu, o le atu lua lea.
3Ona faia lea e Iosua o polo fatu, ma faaperitomeina le fanauga a Isaraelu i Kipeaaralota.
4O le mea foi lenei na fai ai e Iosua le faaperitomeina; o tane o le nuu uma, na o mai mai Aikupito, o ‘au uma o le taua, ua oti i latou i le vao i le ala ina ua latou o mai mai Aikupito.
5Auā sa faaperitomeina le nuu uma na o mai mai Aikupito; a o le nuu uma na fanau i le vao i le ala ina ua latou o mai mai Aikupito na le faaperitomeina i latou.
6Auā na savavali le fanauga a Isaraelu i le vao i tausaga e fagafulu, ua oo ina faaumatia le nuu uma, o ‘au o le taua, o e na o mai mai Aikupito, auā na latou le faalogo i le siufofoga o Ieova; o i latou na tauto ai Ieova na te le mafaia ona faailoa atu ia te i latou le nuu na tauto ai Ieova i o latou tamā e foai mai ia te i tatou, o le nuu o tafe ai le suāsusu ma le meli.
7O a latou fanau na faatupuina e ia e fai mo latou sui, na faaperitomeina i latou e Iosua; sa le peritomeina i latou, auā na latou le faaperitomeina i latou i le ala.
8Ua uma ona faaperitomeina o le nuu uma, ona latou nonofo ai lea i mea e nonofo ai i latou i le toagālauapi, seia malolo ai i latou.
9Ona fetalai mai ai lea o Ieova ia Iosua, O le aso nei ua ou aveeseina ai le luma o Aikupito ia te outou; o le mea lea ua faaigoa ai le igoa o lea mea o Kilikala, ua oo i le aso nei.
10Ua to lauapi le fanauga a Isaraelu i Kilikala, ma ua latou faia le paseka i le aso e sefulu ma le fa o le masina i le afiafi, i le eleele laugatasi o Ieriko.
11Ua latou aai foi i mea na tutupu i le fanua i le aso e aupito atu i le paseka, o areto e le faafefeteina, ma saito tunua i lea lava aso.
12E le toe ai ni manai i le aso e aupito ane i le aso na latou aai ai mea na tutupu i le fanua; e lei toe maua lava ni manai e le fanauga a Isaraelu; a ua latou aai i fua o le laueleele o Kanana i lea tausaga.
13Ua latalata ane Iosua i Ieriko, ua vaavaai atu o ia, ua ilo atu, faauta, ua tu faafeagai ma ia le tagata o i lona lima lana pelu ua se‘i; ona alu atu ai lea o Iosua ia te ia, ua faapea atu ia te ia, Pe tatou te ‘au ma i matou, pe e te ‘au ese?
14Ona tali mai ai lea o ia, E leai, a o a‘u, o le ave ‘au a Ieova na ou sau ai nei. Ona faapaūfao ai lea o Iosua i le eleele, ma ifo atu, ua faapea atu ia te ia, Le Alii e, se a se mea e te fetalaia mai i lau auauna?
15Ona fetalai mai ai lea o le ave ‘au a Ieova ia Iosua, Ia e to ese lou seevae i lou vae; auā ua sa lava le mea e te tu ai na. Ona faapea lea e Iosua ona fai.
Who We AreWhat We EelieveWhat We Do
2025 by iamachristian.org,Inc All rights reserved.
