1O loo fetalai mai Ieova, O ia ona po e au mai ai ivi o tupu o Iuta, ma ivi o ona alii, ma ivi o faitaulaga, ma ivi o perofeta, ma ivi o e nonofo i Ierusalema ai o latou tuugamau;
2latou te folasia ai foi i le la, ma le masina, ma ‘au uma a le lagi, o mea na latou loto i ai, ma latou auauna i ai, ma latou mulimuli atu i ai, ma latou sailiili i ai, ma latou ifo i ai; e le aofia ia ivi, e le tanumia foi, a e fai ma otaota i luga o le laueleele.
3E sili le fia oti i le fia ola i e totoe uma, o e totoe o lenei aiga leaga, o e totoe i mea uma o le a ou tulia ai i latou, o loo fetalai mai ai Ieova o ‘au.
4Ia e fai atu foi ia te i latou, O loo faapea ona fetalai mai o Ieova, Latou te pauu ea, a e le toe tutū mai? E liliu ese ea o ia, a e le toe liliu mai?
5Se a ea le mea ua liliu ese ai lenei nuu o Ierusalema ma le liliu ese e le aunoa? Ua latou taofi mau i mea pepelo, ma latou le mafafai ona toe liliu mai.
6Ua liliu atu o‘u taliga, ma ou faalogologo atu; ua latou le tautala faamaoni; e leai se tagata ua salamo i lana amio leaga, ua faapea mai, Se a le mea ua ou faia? Ua latou taitasi ma liliu atu i o latou taufetuliga, e pei ona oso atu o le solofanua i le taua.
7Ua iloa e le kasita i le lagi ona lava po; o le manutagi foi, ma le pe‘ape‘a, ma le akuru, ua latou tausia le tau latou te o mai ai; a ua le iloa e lo‘u nuu le faamasinoga a Ieova.
8Pe faapefea ona outou fai mai, Ua popoto i matou, ua ia te i matou foi le tulafono a Ieova? Faauta, e moni, ua na faia fua lava; o le peni a e tusiupu ua fai fua lea.
9Ua faamāina ē popoto, ua matatau i latou, ma ua maua; faauta, ua latou lafoai le afioga a Ieova; se a foi se poto ua ia te i latou?
10O le mea lea ou te avatu ai a latou avā i nisi, ma o latou fanua i e latou te tulia i latou; auā o tagatānuu atoa ma alii ua matapeapea i oloa i latou uma, o perofeta atoa ma ositaulaga ua amio pepelo i latou uma.
11Ua latou fofo faatauvaa le manua o le tama fafine a lo‘u nuu, ua faapea ane, E manuia, e manuia; a e leai se manuia.
12Ua latou mamā ea ona o le mea inosia ua latou faia? ua matuā le mamā lava i latou, ua latou le iloa lava le masiasi; o le mea lea e pauu ai i latou faatasi ma e ua pauu; o ona po e asiasia ai i latou latou te tausuai ai, o loo fetalai mai ai Ieova.
13Ou te matuā faaumatia i latou, ua fetalai mai ai Ieova; e leai ni fuifui i le vine, e leai foi ni mati i le mati, e mamae foi lau; o mea foi na ou foaiina atu ia te i latou e mavae ese ia ia te i latou.
14Se a ea le mea ua tatou nofonofo ai? Ia outou potopoto, ma tatou o i aai nofo ‘olo, ma tatou nofo faalologo ai; auā o Ieova lo tatou Atua ua faalologo ai i tatou, ua na faainumia foi i tatou i le vai oona, auā ua tatou agasala ia Ieova.
15Sa tatou faatalitali i le manuia, a e leai se lelei na maua; sa faatalitali foi i ona po e faamaloloina ai, faauta foi, o le mata‘u.
16Ua lagona mai i Tanu le faafogifogi o ona solofanua; o le leo o le tagi o ona solofanua malolosi ua gatete ai le laueleele uma; ua oo mai foi i latou, ua latou faaumatia le nuu, ma mea ua tumu ai, o le aai foi, ma e nonofo ai.
17Auā faauta, ou te aauina atu ia te outou o gata, o gata uogo, e le mafai ona faaoleoleina i latou, latou te feutia outou, o loo fetalai mai ai Ieova.
18Ua fai lo‘u olioli ma faanoanoa i totonu ia te au, ua vaivai lo‘u loto i totonu ia te au.
19Faauta, o le leo o le alaga o le tama fafine a lo‘u nuu ai nuu mamao. E le o i Siona ea Ieova? e le o i ai ea lona Tupu? Se a ea le mea ua latou faaonoono mai ai ia te au i a latou tupua ua te, ma mea ese e faatauvaa?
20Ua mavae ona po o le seleselegāsaito, ua uma le tausaga vevela, a e le faaolaina i tatou.
21Ua momomo lo‘u loto ona ua tu‘imomoia o le tama fafine a lo‘u nuu; ua ou faanoanoa; ua maua a‘u i le fememeai.
22E leai ea ni pulu pasama i Kiliata? e le o i ai ea se fomai? Se a foi le mea ua le faamaloloina ai le tama fafine a lo‘u nuu?
Who We AreWhat We EelieveWhat We Do
2025 by iamachristian.org,Inc All rights reserved.
