1O le fa galau ma le valu o sefulu o tausaga talu ona o mai o le fanauga a Isaraelu ai le nuu o Aikupito, o lona fa o tausaga o le nofoaiga a Solomona i Isaraelu, o le masina o Sefa, o le masina e lua lea, ua amata ai e ia ona fai o le fale o Ieova.
2O le fale foi na faia e le tupu o Solomona mo Ieova e ono sefulu o kupita o lona umi, ma le lua sefulu o lona lautele, a e tolu sefulu o kupita o lona maualuga lea.
3O le faapaologa foi i luma o le fale o le malumalu e lua sefulu kupita o lona umi, ua tusa ma le lautele o le fale; e sefulu kupita o lona lautele i luma o le fale.
4Ua faia foi e ia o faamalama faalava punimau.
5Ua faia foi e ia i tuafafo o le pa o le fale o potu i itu e soo ai; o le pa o le fale e soo ai le malumalu ma le mea e fetalai mai ai. Ua faia e ia o potu e soo ai.
6O le potu aupito i lalo, e lima kupita o lona lautele; o le tuloto, e ono kupita o lona lautele; o lona tolu, e fitu kupita o lona lautele; auā ua ia faalauitiina le pa o le fale i lona tuafafo e soo ai, ina ne‘i faamauina laau faalava i le pa o le fale.
7O le fale foi ina o faia, ua faia i maa na aumaia ua uma ona teua, ua le lagona foi se samala, po o se mātau, po o se tasi lava mea uamea i le fale ina o faia.
8O le faitotoa e alu ae i le potu e tuloto, sa i ai lea i le itu taumatau o le fale; o le ala faataamilomilo foi ua latou o ae ai i le potu e tuloto; ua o ae foi ai le tuloto i lona tolu.
9Ua faia foi e ia le fale, ma ua faaumaina; ua tăpapa foi e ia le fale i faalava ma laupapa arasi.
10Ua faia foi e ia o na potu i itu uma o le fale, e lima kupita ona maualuga; ua faasooina foi le fale i laau arasi.
11Ua tŭlei mai le afioga a Ieova ia Solomona, ua faapea mai,
12O la‘u upu i le fale nei ua e faia; afai e te savali i a‘u tulafono, ma e faia a‘u faamasinoga, ma tausi i a‘u poloaiga uma, ma savali i ai; ona ou faataunuuina ai lea ia te oe o a‘u upu ua ou fai atu ai i lou tamā o Tavita.
13Ou te nofo foi faatasi ma le fanauga a Isaraelu, ou te le tuulafoai foi lo‘u nuu o Isaraelu.
14Ua faia e Solomona le fale, ma ia faaumaina.
15Ua faia e ia o pa o le fale i totonu i laupapa arasi, e afua ae i lalo o le pa o le fale e oo i ona luga; ua tăpapa e ia i totonu i laau, ua tăpapa foi e ia le lotofale i laupapa perosi.
16Ua faia foi e ia kupita e lua sefulu i itu o le fale i laupapa arasi, e afua ae i lalo o le pa e oo i ona luga; ua faia foi e ia i totonu e fai ma mea e fetalai mai ai, o le mea e sili ona paia.
17O le fale foi, o le malumalu i luma lea, e fagafulu ona kupita.
18Ua togitogiina arasi i totonu o le fale i vine vao, atoa ma fua o laau ua mātala; o arasi uma, ua le iloa mai se maa,
19Ua ia saunia foi le mea e fetalai mai ai i totonu o le fale, e tuu ai le atolaau o le feagaiga a Ieova.
20O le mea e fetalai mai ai, e lua sefulu o kupita o lona umi lea i luma, e lua sefulu foi o kupita o lona lautele, e lua sefulu foi o kupita o lona maualuga; ua ia ufitia foi i le auro lelei; ua ia ufitia ai foi le fata faitaulaga arasi.
21Ua ufitia e Solomona i totonu o le fale i le auro lelei; ua puipui foi e ia i maea auro i luma o le mea e fetalai mai ai, ua ia ufitia ai foi i le auro.
22Ua ufitia e ia o le fale uma i le auro, ua oo ina atoaina le fale uma; ua ia ufiufi foi i le auro le fata faitaulaga sa lata ane i le mea e fetalai mai ai.
23Ua ia faia foi i totonu o le mea e fetalai mai ai o kerupi e lua, i le laau o le olive, e sefulu o kupita o la maualuga.
24E lima foi kupita le apaau o le tasi kerupi, e lima foi kupita le apaau o le tasi kerupi; e afua mai i le tasi pito apaau e oo atu i le tasi pito apaau ua sefulu kupita.
25E sefulu kupita foi o lona lua o kerupi; e tasi lo la fua, ua tino faatasi foi kerupi e lua.
26E sefulu kupita o le maualuga o le tasi kerupi; e faapea foi lona lua o kerupi.
27Ua tuu foi e ia o kerupi i lotofale o le fale i totonu; ua faaloaloa apaau o kerupi; ua pai atu le apaau o le tasi i le tasi pa o le fale, ma le apaau o le isi kerupi ua pai atu i le isi pa o le fale, ma ua fepaiai o la apaau i le taulotoaiga o le fale.
28Ua ia ufitia foi kerupi i le auro.
29Ua ia togitogiina foi o pa uma o le fale e soo ai i kerupi ua togitogiina, ma pama, ma fua o laau ua mātala, i tua atoa ma luma.
30Ua na ufitia foi le lotofale i le auro i tua atoa ma luma.
31Ua ia faia puipui mo le faitotoa o le mea e fetalai mai ai i laau o olive vao; o le faalava ma pou o le faitotoa ua faatāfalima ia.
32O puipui e lua ua ia faia i laau o olive vao; ua ia togitogiina ai o kerupi ua togitogiina, ma pama, ma fua o laau ua mātala; ua ia ufitia foi i le auro; ua na folasia le auro i kerupi ma pama.
33Ua faapea foi ona faia e ia o pou mo le faitotoa o le malumalu i laau o olive vao e faatāfafa.
34O puipui foi e lua o laau o perosi ia; o itu e lua o le tasi puipui ua feafeai, ma itu e lua o le isi puipui ua feafeai.
35Ua ia togitogiina ai foi o kerupi, ma pama, ma fua o laau ua mātala; ua ia ufitia foi i le auro ua faatatauina i mea na togitogiina.
36Ona ia faia lea o le lotoā aupito i totonu i le atu maa talai ua sāutuatolu ma le atu laau faalava o arasi ua talai.
37O le fa o tausaga, o le masina o Sefa na faavaeina ai le fale o Ieova;
38o le sefulu ma le tasi o tausaga, o le masina o Pula, o le valu lea o masina, na uma ai ona fai o le fale ma mea uma ua i ai, e tusa foi ma mea uma ua faatusa mai. E fitu tausaga o fai ai e ia.
Who We AreWhat We EelieveWhat We Do
2025 by iamachristian.org,Inc All rights reserved.
