1Ua auina Natano e Ieova ia Tavita, ona alu atu lea o ia ia te ia, ua faapea atu i ai, O tagata e toalua sa i le tasi aai, e mauoa le tasi, a e mativa le tasi.
2Sa i le mauoa o mamoe ma povi e tele lava.
3A e leai se mea a le mativa, ua na o le tamai mamoe fafine itiiti e tasi, na ia faatau, ma faasaoina, ua tupu faatasi ma i latou ma lana fanau; o si ana fāsi mea na ‘ai ai, o lana ipu na inu ai, sa taoto foi i lona fatafata, ua pei se afafine lava ia te ia.
4Na alu ane le tagata alu malaga i le mauoa; na ia le mafaia ona ave sana mamoe, po o sana povi, e sauni mā le malaga ua alu atu ia te ia; a ua ave le tamai mamoe a le tagata mativa, ua sauni ai ma le tagata ua alu atu ia te ia.
5Ona matuā tupu ai lea o le ita o Tavita i lea tagata; ua fetalai mai o ia ia Natano, O loo soifua Ieova, e oti lava le tagata ua na faia lea mea;
6a o le tamai mamoe, na te taui atu lea i mamoe e fa, ina ua na faia lena mea, ma ua le alofa.
7Ona fai atu lea o Natano ia Tavita, O oe lava le tagata. O loo faapea ona fetalai mai o Ieova le Atua o Isaraelu. O a‘u lava na ou faauuina oe e fai ma tupu o Isaraelu; o a‘u foi, na ou laveai ia te oe ai le lima o Saulo;
8na ou avatu ia te oe le fale o lou alii, ma avā a lou alii i lou fatafata; na ou avatu foi ia te oe le aiga o Isaraelu ma Iuta; ana itiiti lea, po ua ou faaopoopoina ia te oe o lea ma lea;
9se a le mea ua e ‘ino‘ino ai i le afioga a Ieova, ua e fai ai le mea leaga i ona luma? Ua e fasioti ia Uria le sa Hetī i le pelu, ua e aumai foi lana avā e fai mau avā, a o ia ua e fasia i le pelu o le fanauga a Amoni.
10O lenei, e le mavae le pelu ai lou aiga e faavavau, auā ua e faalemigao ia te au, ma ua e aumaia le avā a Uria le sa Hetī e fai mau ava.
11O loo faapea ona fetalai mai o Ieova, Faauta, o le a a‘u faatupu le leaga ia te oe ai lou lava aiga; ou te ave au avā i ou luma, ma ou avatu ai i le tasi tagata, e moe o ia ma au avā i le mumū o lena la;
12auā o oe na e fai faalilolilo; a o a‘u, ou te faia lenei mea i luma o Isaraelu uma i le mumū o le la.
13Ona fai mai lea o Tavita ia Natano, Ua ou agasala lava ia Ieova. Ua fai atu Natano ia Tavita, Ua aveeseina lau agasala e Ieova, e te le oti ai;
14na o lenei, ua e faatupu mai le ‘ino‘ino o e ita ia Ieova i lenei mea, o le mea lea e oti ai lava le tama ua fanau mai ia te oe.
15Ona alu lea o Natano i lona fale, a ua taia e Ieova le tama sa fanau mai e le avā a Uria ia Tavita, ona ma‘i lava lea o ia.
16Ua tatalo Tavita i le Atua ona o le tama, ua anapogi Tavita, ua alu foi ua ao lava le po o taoto i le eleele.
17Ona tulai atu lea o toeaina o lona aiga e faatu ia te ia nai le eleele; a ua le mafai o ia, ma ua le aai ma i latou.
18Ua oo i le aso fitu, ona oti ai lea o le tama; ua fefefe auauna a Tavita e ta‘u atu ia te ia, ua oti le tama; auā ua faapea i latou, Faauta, na tatou tautala atu ia te ia ina o ola le tama, a e lei faafofoga mai o ia ia te i tatou; e le atili ai ea ona tiga o ia, pe a tatou fai atu ia te ia ua oti le tama?
19Ua vaai atu Tvita ua femusuai ana auauna, ona masalo lea o Tavita ua oti le tama; ona fesili atu lea o Tavita i ana auauna, Po ua oti ea le tama? Ua fai mai i latou, Ua maliu.
20Ona tulai lea o Tavita nai le eleele, ua taele, ma uu, ma sui ona ofu; ona alu atu lea o ia i le fale o Ieova, ma ifo, i le sau ai i lona fale, ua fai atu ia te i latou, ona latou laulau mai lea ni mea e ‘ai, ona ‘ai ai lea o ia.
21Ua fai mai ana auauna ia te ia, O le a ea lenei mea ua e faia? Na e anapogi ma tutulu, a o soifua le tama; a o lenei, ua maliu le tama, ona e tulai lea, ma taumafa.
22Ona tali atu ai lea o ia, Na ou anapogi ma tagi ina o ola le tama, auā na ou faapea, E iloa e ai, pe alofa mai Ieova ia te au, ia ola le tama.
23A o lenei ua oti o ia, se a le mea ou te anapogi ai? Ou te mafaia ea ona toe faafoisia mai o ia? Ou te alu ia te ia, a e le foi mai o ia ia te au.
24Ona faamatalaloto lea o Tavita ia Patesepa lana avā, ma na alu atu ia te ia, ua la momoe ma ina; ona fanau mai lea o lana tama tane, ua ia faaigoa ia te ia, o Solomona. Ua alofa Ieova ia te ia.
25Ua ia auina atu foi Natano le perofeta, ma faaigoa ia te ia, o Ietitaia, ona o Ieova.
26Ua tau Ioapo ma Rapa o le aai a le fanauga a Amoni, na ia aea le aai a le tupu.
27Ona auina atu lea e Ioapo o le sāvali ia Tavita ua faapea atu, Na matou tau ma Rapa, ua ou aea foi le aai o vai.
28O lenei, ia e faapotopoto le nuu ua totoe, ma e sii mai le taua i le aai, ma e aea ai, ina ne‘i maua e a‘u o le aai, ona faaigoa ai lea i lo‘u nei igoa.
29Ona faapotopoto lea e Tavita o le nuu uma, ua alu atu i Rapa; ua tau ai le taua, ona ia aea ai lea o le aai.
30Ona ave lea o le palealii a lo latou tupu ai lona ao, (o lona mamafa, o le taleni o auro ma maa tāua,) ua faaee ai i le ao o Tavita; na ia ave foi le vete o le aai, ua tele lava.
31A o le nuu sa i ai ua ia ta‘ita‘i atu i latou, ma tuu atu i ‘ili, ma tui uamea, ma to‘i uamea, ma na tuu atu i latou ia o atu i le mea e tunu ai maaomea; ua faapea ona fai e ia i aai uma o le fanauga a Amoni; ona foi atu lea o Tavita ma le nuu uma i Ierusalema.
Who We AreWhat We EelieveWhat We Do
2025 by iamachristian.org,Inc All rights reserved.
