1O le manuia lenei, na faamanuia atu ai le fanauga a Isaraelu e Mose, le tagata o le Atua, a o lei oti o ia. Ua ia faapea atu, Na afio mai Ieova mai Sinai,
2na afio ae foi o ia i Seira ia te i latou; na pupula mai o ia mai le mauga o Parana, na ia afio mai foi ma le au paia e manomano; mai lona aao taumatau le afi o le tulafono mo i latou.
3E moni, ua alofa o ia i le nuu; o i lou lima lona au paia uma lava; ua latou nonofo i ou vae; e talia e i latou au afioga.
4Na tuuina mai e Mose le tulafono ia te i tatou, o le tofi lea mo le faapotopotoga o Iakopo.
5Na fai foi o ia ma tupu i Iesuruna, ina o faapotopotoina o alii sili o le nuu atoa ma itu aiga o Isaraelu.
6Ia ola Reupena, aua le oti; aua foi le toaitiiti ona tagata.
7O le upu lenei ia Iuta; na ia faapea mai ai, Ieova e, faafofoga mai ia i le leo o Iuta, ma e aumaia o ia i lona nuu; ia lima malosi lava o ia; ia fai foi oe ma fesoasoani ia te ia i e ita ia te ia.
8Na ia fapea mai foi ia Levi, Ia i ai lou Tumema ma lou Urima i lou tagata paia na e tofotofoina i Mase, na e finau ia te ia i le vai o Meripa;
9o le na fai atu i lona tamā ma lona tinā, Ua ou le ilo atu ia te ia; o le na le iloa foi ona uso, ua na le iloa foi ana fanau; auā ua latou tausi i lau afioga, ua latou taofi foi i lau feagaiga.
10Latou te a‘oa‘o atu ia Iakopo i au faamasinoga, ma Isaraelu i lau tulafono; latou te tuuina atu i ou luma o mea manogi, ma le taulaga mu uma i lou fata faitaulaga.
11Ieova e, ia e faamanuia ana oloa, ma e fiafia i le galuega a ona lima; ia e ta i papātua o e laga mai ia te ia, ma i latou o e ita mai ia te ia, ne‘i latou toe laga mai.
12Na ia faapea mai ia Peniamina, O le pele ia Ieova e nofo o ia ma le filemu faatasi ma ia; na te faamamalu ia te ia i le aso atoa; e nofo foi o ia i le va o ona tau‘au.
13Na ia faapea mai foi ia Iosefa, Ia faamanuia lona laueleele e Ieova i mea e sili ona lelei mai le lagi, o le sau, ma mea lelei mai le mea loloto o loo i lalo;
14ma mea e sili ona lelei e tutupu i le la, ma mea e sili ona lelei e tutupu i masina;
15ma mea e sili ona lelei i mauga o le vavau, ma mea e sili ona lelei o mauga iti o le faavavau,
16ma mea e sili ona lelei o le laueleele ma mea uma ua tumu ai, ma le finagalo alofa o le na nofo i le laau talatala, ia oo lava lea i luga o le ulu o Iosefa; ma le tumuai o le na sili i ona uso.
17O lona matagofie o le uluai tama a lana povi lea; o ona nifo o nifo o le rema ia; na te suatia ai nuu uma ia oo i tuluiga o le lalolagi; o mano ia o Efaraima, o afe foi ia o Manase.
18Na ia faapea mai foi ia Sepulona, Sepulona e, ia e olioli i lou alu atu; ma oe Isakara e, ia e olioli i totonu o ou fale ie.
19E valaau i laua i nuu e o mai i le mauga; latou te fai ai taulaga tatau; auā e maua mai e i laua le oloa tele mai le sami, ma le oloa ua lilo i le oneone.
20Na ia faapea mai foi ia Kato, Ia manuia le na te faalauteleina Kato. O loo taoto o ia e pei o se leona, ua saeia foi e ia le lima atoa ma le tumuai.
21Ua na vaaia foi le mea e sili mo ia, auā ua faamauina i lea mea o le tofi e le faipule; na latou o, o ia ma alii sili o le nuu; na ia faia mea tonu mai ia Ieova, ma ona faamasinoga faatasi ma Isaraelu.
22Na ia faapea foi ia Tanu, O Tanu o le leona taanoa ia, e oso mai o ia mai Vasana.
23Na ia faapea mai foi ia Nafatali, Nafatali e, ua e mălie i le alofa, ma ua tumu i le manuia mai ia Ieova; ia e fai mou le vai ma le itu i toga.
24Na ia faapea mai foi ia Asera, O Asera, e manuia o ia i ana fanau; ia fiafia ona uso ia te ia; ia fufui foi e ia lona vae i le suāuu.
25O ou faamau o uamea ma ‘apa memea ia; e pei o ou aso foi e faapea lou malosi.
26E leai lava se la te tutusa ma le Atua o Iesuruna, o loo tietie i le lagi e fai ma ou fesoasoani, e tietie foi i ao o le lagi i lona mamalu.
27O le mea e te nofo ai o le Atua o le faavavau lea; o i ou lalo foi aao o le faavavau; e tulia foi e ia i ou luma le ua ita mai; na te fetalai mai foi, Ia e faaumatia i latou.
28E nofo Isaraelu e toatasi ma le filemu; o le vaipuna o Iakopo e i ai lea i le nuu o saito ma uaina; o lona lagi foi e totō ifo ai le sau.
29Isaraelu e, amuia oe! O ai se nuu e tutusa ma oe? O le nuu ua faaolaina e Ieova! O le talita e fesoasoani ia te oe, o ia foi le pelu e mamalu ai oe! E faataga vivii ia te oe o e ita ia te oe, e te solia foi a latou mea maualuluga.
Who We AreWhat We EelieveWhat We Do
2025 by iamachristian.org,Inc All rights reserved.
