1Ua toeaina lava Tavita, ma ua tuu tulu‘i lona ola, ona faia lea e ia o Solomona lona atalii ma tupu o Isaraelu.
2Ua faapotopotoina e ia o alii uma o Isaraelu, atoa ma le au faitaulaga, ma sa Levī.
3Ua faitauina sa Levī, e afua mai i e ua tolu sefulu o latou tausaga, ma e ua matutua ai; o le faitau aofai o tagata, e tolu sefulu o afe ma afe e valu.
4Sa tofia e pule i le galuega o le fale o Ieova e lua sefulu ma le fa o afe o i latou, ma le ono o afe e fai ma faipule ma faamasino;
5o le fa o afe e fai ma leoleo faitotoa, ma le fa o afe ua vivii atu ia Ieova, i laau pese na ou faia e vivii ai.
6Ua vaevaeina i latou e Tavita i vasega i atalii o Levi, o Keresona, o Koato, ma Merari.
7O sa Keresonā; o Latana, ma Semi.
8O atalii o Latana; o le alii sili o Ieielu, i le ma Setama, ma Ioelu, e toatolu ia.
9O atalii o Semi; o Salome, ma Asielu, ma Arana, e toatolu ia. O matai sili ia o Latana.
10O atalii o Semi, o Iata, o Sesa, ma Iuso, ma Peria. O atalii o Semi, e toafa ia.
11O Iata o le alii sili ia, ma Sesa o le aupito ane i ai; a o Iuso, ma Peria ua le toatele ni a laua fanau; o le mea lea sa faitauina faatasi ai i laua ma le aiga o laua tamā.
12O atalii o Koato; o Amaramo, o Isara, o Heperona, ma Usialu, e toafa ia.
13O atalii o Amaramo; o Arona, ma Mose; ua vavaeeseina Arona na te faapaiaina mea e sili ona paia, o ia ma ona atalii e faavavau, e faamu ai mea manogi i luma o Ieova, e auauna ia te ia, ma faamanuia atu i le nuu i lona suafa e faavavau.
14A o Mose le tagata o le Atua, sa ta‘ua ona atalii i le itu aiga o Levi.
15O atalii o Mose; o Keresona, ma Eliesera.
16O atalii o Keresona; o Sepuelu o le sili ia.
17O le atalii o Eliesera; o Reapea o le sili ia. Sa leai se tasi atalii ia Eliesera; a o atalii o Reapea ua matuā toatele i latou.
18O atalii o Isara; o Salome, o le sili ia.
19O atalii o Heperona; o Ieria o le sili, o Amaria le toalua, o Iaaseelu le toatolu, ma Ikamamo le toafa.
20O atalii o Usialu; o Mika le sili, ma Isea le toalua.
21O atalii o Merari; o Maali, ma Musi. O atalii o Maali; o Eleasaro, ma Kiso.
22Ua oti Eleasaro, a ua leai ni ona atalii, na o afafine; ua fai avā foi ia te i latou o atalii o Kiso, o latou lava aiga.
23O atalii o Musi; o Maali, ma Eteru, ma Ieremota, e toatolu.
24O atalii ia o Levi i le aiga o latou tamā, o matai sili e faatatau i le faitauina o i latou i le faitau aofai o latou igoa, e na faia le galuega e auauna ai i le fale o Ieova, e afua mai i e ua luafulu o latou tausaga ma e ua matutua ai.
25Auā na fai atu Tavita, O Ieova le Atua o Isaraelu, ua avatua e ia le filemu i lona nuu, e mau foi i Ierusalema e faavavau.
26O sa Levi foi, latou te le toe tauave le malumalu, atoa ma mea uma e fai a‘i ana sauniga.
27Auā sa faitauina le fanauga a Levi e tusa ma upu mulimuli a Tavita, e afua i e ua luafulu o latou tausaga ma e ua matutua ai;
28aua o lo latou tofi lea e auauna i atalii o Arona i le galuega i le fale o Ieova, i lotoā, ma potu, ma le faamamaina o mea paia uma, ma le faiga o le galuega i le fale o le Atua;
29ma le areto e laulauina i luma, ma le falaoa lelei mo le taulaga i mea e ‘ai, ma areto manifinifi e le faafefeteina, ma uamea salalafa, ma mea e palua, atoa ma fua faaofuofu uma, ma fua faaloloa;
30e tutu foi i taeao uma e faafetai ma vivii atu ia Ieova, e faapea foi i afiafi;
31e osi foi taulaga mu uma ia Ieova i sapati, ma masina faatoa vaaia, ma tausamiga, e le aunoa i luma o Ieova, e pei o le faitau, e pei ona faatonuina ia te i latou;
32latou te anaana foi i le tausiga o le fale fetafai o le faapotopotoga, ma le tausiga o le malumalu, ma le tausiga o atalii o Arona o latou uso, i le galuega i le fale o Ieova.
Who We AreWhat We EelieveWhat We Do
2025 by iamachristian.org,Inc All rights reserved.
