1O le au faitaulaga o sa Levī, ma le itu aiga uma o Levi, e leai so latou fanua po o se tofi faatasi ma Isaraelu; o taulaga e fai i le afi ia Ieova, o lona tofi lea, latou te aai ai.
2E leai foi sona tofi faatasi ma ona uso; o Ieova o lona tofi o ia, e pei ona fetalai mai ai o ia ia te ia.
3O mea nei e tatau ona maua e le au faitaulaga mai le nuu, mai ia i latou o e fai taulaga, po o se povi po o se mamoe; ia latou avatu i le faitaulaga o le alagālima, ma alafau e lua, ma le puta.
4O le faapolopolo o lau saito, o lau uaina, ma lau suāuu, atoa ma selega muamua o fulufulu o au mamoe, ia e avatua, ia mea ia te ia.
5Auā ua filifilia o ia e Ieova lou Atua mai ou itu aiga uma, e tu ma auauna i le suafa o Ieova, o ia ma ona atalii i aso uma lava.
6Afai foi e sau se sa Levī ai se tasi o au aai i Isaraelu uma, sa āumau ai o ia; a sau ma le manao atoatoa o lona loto i le mea e filifilia e Ieova;
7ona auauna lea o ia i le suafa o Ieova lona Atua, e pei o ona uso uma o sa Levī, o e tutū i lea mea i luma o Ieova.
8E tutusa tufaaga latou te aai ai, a e ese lava le faatau o mea sa i ona tamā.
9A ē oo atu i le nuu ua foaiina mai e Ieova lou Atua ia te oe, aua ne‘i e faaa‘oa‘o ona fai e pei o mea inosia a ia nuu.
10Aua ne‘i iloa ia te oe se tasi na te faaui ane lona atalii po o lona afafine i le afi, o se fai togafiti faataulāitu, o se iite i ao o le lagi, po o se saili faailoga, po o se taulāitu,
11po o se ‘apele, po o se fesili atu i aitu, po o se ua i ai le aitu vavalo, po o se saili atu i e ua oti.
12Auā e inosia e Ieova o i latou uma o e faia na mea; e tulia foi i latou e Ieova lou Atua ai ou luma ona o na mea e inosia.
13Ia sao lau amio i luma o Ieova lou Atua.
14Auā o nuu nei, o le a e fai mou, ua faalogo i latou i e iite i ao o le lagi, ma e fai togafiti faataulāitu; a o oe, e le mafai Ieova lou Atua ona e faia faapea.
15E faatuina e Ieova lou Atua mai ia te oe, o so lou au uso, se perofeta mo oe e pei o a‘u nei; tou te faalogo ia te ia;
16e tusa ma mea uma lava na e manao i ai ia Ieova lou Atua i Horepa i le aso o le faapotopotoga, na faapea mai, Aua ne‘i ou toe faalogo atu i le siufofoga o Ieova lo‘u Atua, pe toe vaai atu i lena afi tele, ne‘i ou oti.
17Ona fetalai mai lea o Ieova ia te au, Ua lelei a latou na latou fai mai ai.
18Ou te faatuina mo i latou, o so latou uso, se perofeta e pei o oe; ou te tuuina atu foi a‘u upu i lona gutu, e fai atu foi e ia ia te i latou o mea uma lava ou te fai atu ai ia te ia.
19O le tagata foi e le faalogo i a‘u upu, e fai atu ai e ia i lo‘u igoa, o a‘u nei, ou te taui atu ia te ia.
20A o le perofeta e faamaualuga ma tautala i se upu i lo‘u igoa, ou te lei fai ane ia te ia e tautala atu ai, pe tautala ia i igoa o atua ese, e oti lea lava perofeta.
21Afai foi e te faapea ifo i lou loto, Pe faapefea ona matou iloa o le upu e lei fetalaia e Ieova?
22A tautala se perofeta i le suafa o Ieova, afai e le oo le mea, e le taunuu foi, o le upu lea ua le fetalaia mai e Ieova; o le faamaualuga o lea perofeta ua tautala ai o ia; aua e te fefe ia te ia.
Who We AreWhat We EelieveWhat We Do
2025 by iamachristian.org,Inc All rights reserved.
