IOSUA, 18 - Samoan Old Version Bible

O LE MATAUPU XVIII.Ua vaevaeina e Iosua le laueleele o totoe.

1Ua faapotopotoina le faapotopotoga uma o le fanauga a Isaraelu i Sailo, ona faatuina ai lea e i latou o le fale fetafai o le faapotopotoga. Ua toilalo foi le nuu ia te i latou.

2Na totoe i le fanauga a Isaraelu o itu aiga e fitu o e na le maua e i latou o latou tofi.

3Ona fai atu ai loa o Iosua i le fanauga a Isaraelu, Tou te faavaivai seia afea ina ua le o atu e fai mo outou le nuu ua foaiina atu ia te outou e Ieova le Atua o outou tamā?

4Ina tofia mai ia e outou ni tagata e taitoatolu i itu aiga; ou te auina atu foi i latou, latou te tulai atu, ma feoai i le nuu, ma latou tusia e tusa ma o latou tofi; ma latou o mai ia te au.

5E vaevaeina foi e i latou i vaega e fitu; e tumau Iuta i lona tuaoi i le itu i toga; ma le aiga o Iosefa, e tumau i latou i lo latou tuaoi i le itu i matu.

6A ia outou tusia le nuu i vaega e fitu, ma au mai le tusi ia te au iinei, ina ia ou faia le vili mo outou i le mea nei i luma o Ieova lo tatou Atua.

7Auā o sa Levī e leai so latou tofi faatasi ma outou; auā o le faiva o faitaulaga ia Ieova o lo latou tofi lea; o Kato foi, ma Reupena, ma le tasi vaega o le itu aiga o Manase, ua maua e i latou o latou tofi i le la itu o Ioritana i sasae, na avatu e Mose le auauna a Ieova ia te i latou.

8Ona tulai atu lea o ia tagata, ma latou o; ua fai atu foi Iosua i e a ō ia tusia le nuu, ua faapea atu. Ina o ia, ma feoai i le nuu, ma tusi ai, i le tou foi mai ia te au, ina ia ou faia le vili mo outou i le mea nei i luma o Ieova i Sailo.

9Ona o ai lea o ia tagata, ma latou ui ai i le nuu, ma latou tusia aai i le tusi, i vaega e fitu, ona latou o mai ai lea ia Iosua i le toagālauapi i Sailo.

10Ona faia lea e Iosua o le vili mo i latou i Sailo i luma o Ieova; ua tofia foi mo i latou i lea mea e Iosua le nuu mo le fanauga a Isaraelu, e tusa ma o latou vaega.

11Ua faasaga le vili i le itu aiga o le fanauga a Peniamina, e tusa ma o latou aiga; ua alu atu foi le tuaoi o lo latou tofi i le va o le fanauga a Iuta, ma le fanauga a Iosefa.

12Ua fai lo latou tuaoi i le itu i matu e afua mai i Ioritana; ona alu ae lea o le tuaoi i tafatafa o Ieriko i le itu i matu, ma alu ae i le atu mauga i sisifo; o lona gataaga o le vao o Petavene.

13Ona ui atu ai lea o le tuaoi ai lea mea i Lusa, i tafatafa o Lusa, o Peteli lea, i le itu i toga; ona alu ifo ai lea o le tuaoi i Atarota-atara, e lata ane i le mauga o i le itu i toga o Peteorana i lalo.

14Ua tusia ai le tuaoi, ona afe ane lea i le itu i sisifo i le itu i toga, e afua mai i le mauga o loo feagai ma Peteorana i le itu i toga; o lona gataaga o Kiriata-paala, o Kiriata-iarima lea, o le aai o le fanauga a Iuta. O le itu i sisifo lea.

15O le itu i toga, ua afua mai i le mea e gata mai ai Kiriata-iarima, ona alu atu lea o le tuaoi i sisifo, ma alu atu i le vaipuna o Nafatoa;

16ona alu ifo ai lea o le tuaoi i le mea e gata mai ai le mauga o loo feagai ma le vanu o le atalii o Hinoma, o i le vanu o sa Rafā i le itu i matu, ona alu ifo ai lea i le vanu o Hinoma i tafatafa o Iepuse i le itu i toga, ma alu ifo i Enerokelu;

17Ua tusia e afua mai i le itu i matu, ma alu atu i Enesemesa, ma alu atu i Kelilota o loo feagai ma le aega i Atumema, ma alu ifo i le maa o Poana le atalii o Reupena;

18ona ui ai lea e faatafatafa ane, o feagai ma Arapa i le itu i matu, ma alu ifo i Arapa;

19ona ui ai lea le tuaoi i tafatafa o Peteokelu i le itu i matu; o lona gataaga o le tuaoi o le faga i le itu i matu o le sami Oona, i le mea e gata mai ai Ioritana i le itu i toga. O le tuaoi i le itu i toga lea.

20O Ioritana o lona tuaoi lea i le itu i sasae. O le tofi lea o le fanauga a Peniamina, ma ona tuaoi e faataaliolio ai, e tusa ma o latou aiga.

21O aai foi nei o le itu aiga o le fanauga a Peniamina e tusa ma o latou aiga; o Ieriko, ma Peteokelu, ma le vanu o Kisesa,

22ma Petearapa, ma Semaraima, ma Peteli,

23ma Gavima, ma Para, ma Ofira,

24ma Kifaamoni, ma Ofini, ma Kipea; o aai e sefulu ma le lua, ma o latou faoa aai.

25O Kipeona, ma Rama, ma Perota,

26ma Mesepa, ma Kafira, ma Mosa,

27ma Rekema, ma Irefelu, ma Taralu,

28ma Sela, ma Elifa, ma Iepuse, o Ierusalema lea, o Kipiata, ma Kiriata; o aai e sefulu ma le fa, ma o latou faoa aai. O le tofi lea o le fanauga a Peniamina, e tusa ma o latou aiga.