BAROMA 4 - SetswanaTswana 1908/1992（TSW08NO）

Sesupo ka ga Aberahame le tumelo ya gagwe

1Jaana re tlaa re Aberahame rraetsho ka fa nameng o bonye eng?

2Gonne fa Aberahame a na a siamisiwa ka ditiro, o na le se o ka ikgantshang ka sone; mme e be e se fa pele ga Modimo.

3 Gonne lokwalo lwa reng? Lwa re: “Aberahame a dumela Modimo, mme a go balelwa tshiamo.”

4Jaana mo go ene yo o dirang, tumelo ga e ke e kaiwa go re ke mpho, fa e se go re, ke molato fela o o tshwanetseng go lefiwa.

5Mo go ene yo o sa direng, mme a dumela mo go ene yo o siamisang moleofi, tumelo ya gagwe yone, e kaiwa fa e le tshiamo.

6Jaaka le ene Dafite a rile:

“Go sego motho

yo Modimo o mmalelang tshiamo

kwa ntle ga ditiro;”

a ba a re:

7 “Go sego ba maleo a bone

a itshwaretsweng,

le ba dibe tsa bone di bipilweng.

8Go sego motho

yo Morena o se ketlang a mmalela

boleo gope.”

9Jaana lesego le, a le bolelwa fa e le la ba ba rupileng, kgotsa le gone la ba ba sa rupang? Gonne ra re: Mo go Aberahame tumelo ya gagwe e ne ya kaiwa fa e le tshiamo.

10E kailwe jang? A ke a sena go rupa, kgotsa a ise a rupe? Ga se a rupile, ke a ise a rupe;

11 mme a tshola sekao sa thupo, e le lotshwao lwa tshiamo ya tumelo, e o ne a na nayo a ise a rupe; gore a tle a nne rra botlhe ba ba dumelang, le fa ba sa rupa, gore tshiamo e balelwe kwa go bone;

12le gore a nne rraabo ba ba rupileng, e seng ke go rupa go le gosi, e bile e le ka gobo ba sepela mo motlhaleng wa tumelo ya ga rraetsho Aberahame, e o ne a na nayo a ise a rupe.

Tsholofetso e bonwa ka tumelo

13 Gonne polelo ya tsholofetso e e neilweng Aberahame le losika lwa gagwe ya go re o tlaa nna moruaboswa wa lefatshe, o ne a sa e newa ka fa molaong, mme e le ka fa tshiamong ya tumelo.

14 Gonne e ka re fa ba e leng ba molao e le baruaboswa, tumelo e dirilwe lefela, le polelo ya tsholofetso e be e se na thuso;

15gonne molao o tsosa bogale; mme kwa go se nang molao, le tlolo le yone ga e yo.

16 Ke gone ka moo gotlhe go emeng ka fa tumelong, gore go nne ka fa tshegofatsong, gore polelo ya tsholofetso e tle e tlhomamele losika lotlhe; e seng lone loso lo e leng lwa molao, mme le lone lo e leng lwa tumelo ya ga Aberahame, yo e leng rraarona rotlhe,

17 fa pele ga one o ene o o dumetseng, e bong Modimo o o rudisang baswi, mme o bitse dilo tse di seyong, jaaka e kete ke dilo tse di leyong; jaaka go kwadilwe ga twe: “Ke go dirile rra merafe e le mentsi.”

18 Yo e rileng tsholofelo e se yo a dumela mo tsholofelong, gore a tle a nne rra merafe e le mentsi, ka fa lefokong le le kileng la buiwa, ga twe: “Losika lwa gago lo tlaa nna jalo.”

19 Mme a akanya mmele wa gagwe, o nama ya one e setseng e ntse jaaka e kete e sule, ka a le boemo jwa dinyaga e ka ne e le di le lekgolo, mme a akanya le go swa ga sebopelo sa ga Sara; mme a se ka a koafala mo tumelong.

20Ee, ya re ka a lebile polelo ya tsholofetso ya Modimo, a se ka a theekela ka go tlhoka go dumela, mme a thatafala mo tumelong, a galaletsa Modimo,

21a ikantse ka botlalo gore se o se mo solofeditseng, o bile o nonofile go se dira.

22E bile ke gone ka moo o go baletsweng fa e le tshiamo.

23Jaana lefoko le le reng: “O go baletswe,” la bo le sa kwalwa ka ntlha ya gagwe a le esi;

24le gone e le ka ntlha ya rona ba re tlaa go balelwang, e bong rona ba re dumelang mo go one o o tsositseng Jesu Morena wa rona mo losong,

25 yo o neng a neelwa losong ka ntlha ya ditlolo tsa rona, mme a tsosediwa tshiamiso ya rona.