1Ke tlaa opela
ka ga mautlwelobotlhoko a ga
Jehofa ka bosakhutleng;
ka molomo wa me
ke tlaa itsise boikanngo jwa gago
mo tshikatshikeng tsotlhe.
2Gonne ke rile:
Boutlwelobotlhoko bo tlaa agela
ruri ka bosakhutleng;
boikanngo jwa gago o tlaa bo
tlhomamisa le mo magodimong tota.
3“Ke golaganye le moitshenkedwi wa
me ke ikanetse
Dafite motlhanka wa me.
4 Ka re: ‘Losika lwa gago ke tlaa lo
tlhomamisa ka bosakhutleng,
ke tlaa agela ruri
setulo sa gago sa bogosi,
go ya ditshikeng tsotlhe fela.’ ” Sela.
5Magodimo a tlaa baka
dikgakgamatso tsa gago, Jehofa;
boikanngo jwa gago le jone
mo phuthegong ya baitshepi.
6Gonne, e ka nna mang mo maaping
yo o ka tshwantshiwang le Jehofa?
E mang mo go bomorwa bathata
yo o tshwanang le Jehofa?
7E le Modimo o o boitshegang
thata mo lekgotleng la baitshepi;
e le o o nang le go sisimogwa
bogolo go botlhe
ba ba o dikanyeditseng?
8Jehofa Modimo wa masomosomo,
ana ke mang yo o leng mothata
jaaka wena, wena Jehofa?
O bile o dikanyeditswe
ke boikanngo jwa gago.
9O a tle o buse
boikgodiso jwa lewatle;
e re dintelo tsa lone di rwalelesega
o di didimatse.
10O thubagantse Rahabe,
jaaka mongwe yo o bolailweng;
o gasagasitse baba ba gago
ka letsogo la thata ya gago.
11Magodimo ke a gago,
lefatshe le lone ke la gago;
lobopo o lo theile
le botlalo jwa lone.
12Ke wena o tlhodileng
botsheka le borwa;
Tabore le Heremone
di itumela mo ineng la gago.
13O na le letsogo le le thata thata;
seatla sa gago se thata,
seatla sa gago se se siameng
se goletsegile.
14Tshiamiso le katlholo ke motheo
wa setulo sa gago sa bogosi;
boutlwelobotlhoko
bo eteletse sefatlhogo sa gago pele
bo na le boammaaruri.
15Go sego batho ba ba itseng
tumo e, ya boitumelo;
ba bo ba tsamaya mo leseding
la sefatlhogo sa gago, Jehofa.
16Ba tlhola letsatsi lotlhe
ba itumela mo ineng la gago;
ba golediwa mo tshiamong ya gago.
17Gonne o kgalalelo ya thata ya bone,
lonaka lwa rona lo tlaa golediwa
mo tlhogonolofatsong ya gago.
18Gonne thebe ya rona ke ya ga
Jehofa; le kgosi ya rona
ke ya Moitshepi wa Iseraele.
19Gape o kile wa bua
le baitshepi ba gago
mo ponatshegelong, wa re:
“Ke beile thuso mo go mongwe
yo o thata thata;
ke goleditse mongwe
yo o itshenketsweng mo bathong.
20 Ke bonye Dafite motlhanka wa me;
ke mo tloditse ka lookwane lwa me
lo lo boitshepo.
21Ke yo seatla sa me
se tlaa tlhomamang mo go ene;
letsogo la me le lone
le tlaa mo thatafatsa.
22Mmaba ga a ketla a mo tseela sepe
ka patiko;
le fa e le morwa boikepo
ga a ketla a mo tlhokofatsa.
23Ke tlaa thubaganyetsa baba
ba gagwe fa fatshe,
ke gaila ba ba mo ilang.
24Boikanngo jwa me
bo tlaa nna le ene,
le jone boutlwelobotlhoko jwa me;
lonaka lwa gagwe lo tlaa goletsega
mo ineng la me.
25Le gone ke tlaa baya
seatla sa gagwe mo lewatleng;
le seatla sa gagwe
se se siameng mo dinokeng.
26O tlaa goela kwa go nna, a re:
‘Ke wena rre, Modimo wa me,
le lefika la poloko ya me.’
27 Le nna ke tlaa mo dira
ngwana wa motsalwapele wa me,
mogolo wa dikgosi tsa lefatshe.
28Boutlwelobotlhoko jwa me
ke tlaa bo mmolokela
ka bosaengkae, le kgolagano ya me
e tlaa tlhomama nae.
29Le lone losika lwa gagwe
ke tlaa lo dira gore lo eme
ka bosakhutleng,
le setulo sa gagwe sa bogosi
jaaka malatsi a legodimo.
30E tlaa re fa bana ba gagwe
ba tlogela molao wa me,
mme ba sa tsamaye
mo dikatlholong tsa me;
31fa ba senya melao ya me,
ba sa boloke ditaolo tsa me;
32e dira gone ke tlaa kgophololang
tlolo ya bone ka thupa,
le boikepo jwa bone ka dinteo.
33Le fa go ntse jalo
boutlwelobotlhoko jwa me
ga nketla ke bo tlosetsa ruri
mo go ene, le fa e le go leseletsa
boikanngo jwa me go tlhaela.
34Kgolagano ya me ga nketla
ke e tlola le fa e le go fetola sone
se se duleng ka dipounama tsa me.
35Ke ikanne gangwe fela
ka boitshepo jwa me;
ga nketla ke aketsa Dafite; ka re:
36Losika lwa gagwe
lo tlaa ema ka bosakhutleng,
le setulo sa gagwe sa bogosi
se tlaa ema jaaka letsatsi
fa pele ga me.
37Se tlaa tlhomamisiwa ka
bosakhutleng jaaka kgwedi,
le jaaka mosupi
yo o ikanyegang mo loaping.”
Sela.
38Mme o latlhile, o ganne, o ntse
o galefetse motlodiwa wa gago.
39O fedisitswe pelo
ke kgolagano ya motlhanka wa gago;
o tlhapaditse serwalo sa gagwe
sa bogosi, go ya fela mo mmung.
40O rutlile dikgoro tsa gagwe tsotlhe
fela; dikago tsa gagwe tse di thata
o di ntshitse marope fela.
41Botlhe ba ba fetang ka tsela
ba a mo thopa;
o bile o dule sekgobo
mo go ba o bapileng nabo.
42O goleditse seatla se se siameng
sa baganetsi ba gagwe;
o itumedisitse baba botlhe ba gagwe.
43Ee, bogale jwa tšhaka ya gagwe
o bo phetsotse, wa ba wa se ka
wa mo emisa mo tlhabanong.
44O khutlisitse go phatsima ga gagwe,
le setulo sa gagwe sa bogosi
o se digetse fa fatshe.
45Malatsi a bokau jwa gagwe
o a khutsafaditse;
o mmipile ka ditlhong. Sela.
46E tlaa nna goleele go le kaye Jehofa?
A o tlaa iphitlha ka bosakhutleng?
Bogale jwa gago bo tlaa tuka
jaaka molelo goleele go le kaye?
47A ko o gakologelwe motlha wa me,
gore o mokhutshwane jang!
Kana bana botlhe ba batho
o ba bopetse lefela jang!
48Ana motho ke ofe
yo o tlaa tshelang
mme a se ketla a bona loso?
Yo o tlaa gololang mowa wa gagwe
mo thateng ya Bobipo e mang?
49Morena, mautlwelobotlhoko
a gago, a jale, a kwa kae,
a o kileng wa ikanela Dafite
mo boikanngong jwa gago?
50Morena, gakologelwa kgobo
ya batlhanka ba gago;
ka fa ke tshotseng kgobo ya batho
botlhe ba ba thata thata
mo sehubeng sa me ka gone;
51e baba ba gago Jehofa,
ba kgobileng ka yone,
e ba kgobileng dikgato
tsa motlodiwa wa gago ka yone.
52A go bakwe Jehofa ka bosakhutleng.
A go nne jalo, fela jalo.
Who We AreWhat We EelieveWhat We Do
2025 by iamachristian.org,Inc All rights reserved.
