1 Jaana Naamane molaodi wa ntwa ya kgosi ya Siria, e ne e le kala e kgolo ya mong wa gagwe, a tlotlega, gonne Jehofa o ne a neile Basiria phenyo ka ene; e bile e le seganka se se pelokgale, mme a bo a le molepero.
2Basiria ba bo ba kile ba bolola bonokwane ba le ditlhopha, mme ba ne ba tsile ba lerile setshwarwana kwa lefatsheng la Iseraele, e le morweetsana; mme a bo a direla mosadi wa ga Naamane.
3A raya mohumagadi wa gagwe a re: “A bo morena wa me a ka bo a le kwa go moperofeti yo o kwa Samaria! O ne a tlaa fola mo leperong la gagwe.”
4Mme mongwe a tsena, a bolelela morena wa gagwe, a re: “Morweetsana yo e leng wa lefatshe la Iseraele o buile jaana le jaana.”
5Kgosi ya Siria ya re: “Tloga o tsamaye, ke tlaa romela lokwalo kwa kgosing ya Iseraele.” Mme a tsamaya; a tshola dipapetla di le 30 000 tsa selefera, le dipapetla di le 6 000 tsa gouta, le dipaka di le some tsa diaparo.
6A isa lokwalo kwa kgosing ya Iseraele, a re: “Mme jaana, e tlaa re lokwalo lo lo fitlha koo go wena, o bo o bona, ke romile Naamane motlhanka wa me koo go wena, gore o mo alafe lepero la gagwe a fole.”
7Ga dirala ya re kgosi ya Iseraele e sena go bala lokwalo, ya ikgagola diaparo, ya re: “A ke Modimo, wa go bolaya le go tshedisa, fa e tlaa bo ne ne monna yo a roma kwa go nna, a re ke alafe motho lepero la gagwe a fole? Ke a lo rapela, lo gopoleng, lo bone jaaka a senka ka fa o ka omanang le nna ka gone.”
8Ga dirala, e rile Eliša monna wa Modimo a utlwa fa kgosi ya Iseraele e ikgagotse diaparo, a roma kwa kgosing a re: “O ikgagoletseng diaparo? A a tle kwano go nna, mme o tlaa itse fa go na le moperofeti mo Iseraele.”
9Jalo Naamane a tla ka dipitse tsa gagwe le ka dikara tsa gagwe, a fitlha a ema fa mojakong wa ntlo ya ga Eliša.
10Eliša a roma motho kwa go ene, a re: “Ya o tlhape gasupa mo Joretane, mme nama ya gago e tlaa ba e boela mo go wena, o tlaa ntlafala.”
11Mme Naamane a nna bogale, a tsamaya, a re: “Bona, ke itheile ka re, ruri o tlaa tswela kwa go nna, a ema, a bitsa leina la ga Jehofa Modimo wa gagwe, a fokela felo fa go botlhoko ka letsogo la gagwe, a alafa molepero a fola.
12Abana le Farepare, dinoka tsa Damaseko, a ga di molemo bogolo go metsi otlhe a Iseraele? A ga ke kake ka tlhapa mo go tsone ka ntlafala?” Mme a retologa, a tsamaya a le bogale.
13Batlhanka ba gagwe ba atamela ba bua nae, ba re: “Rra wee, fa moperofeti a ka bo a go laotse gore o dire sengwe se segolo, a o ne o se ketla o se dira? Bogolo jang ka e le fa a go raya a re: ‘Tlhapa, mme o ntlafale?’ ”
14Foo a fologa a ikina gasupa mo Joretane, jaaka polelo ya monna wa Modimo; mme nama ya gagwe ya bowa, ya tshwana le nama ya ngwanyana fela, a ntlafetse.
15A boela kwa monneng wa Modimo, ene le lekoko lotlhe la gagwe, a fitlha a ema fa pele ga gagwe; a re: “Bona, jaana ke a itse fa go se na Modimo ope mo lefatsheng lotlhe, fa e se mo Iseraele; ke gone ke a go rapela ka re, amogela mpho mo motlhankeng wa gago.”
16Mme a re: “Jaaka Jehofa a tshedile, yo ke emang fa pele ga gagwe, ga nketla ke amogela epe.” Mme a mo emelela gore a e amogele; mme a gana.
17Naamane a re: “Fa go sa nne jalo, le fa go ntse jalo, ke a go rapela, a motlhanka wa gago a newe mmu o le merwalo e le mebedi ya bommoulo, gonne motlhanka wa gago ga a ketla a tlhola a isetsa medimo epe a sele tshupelo e e fisiwang le fa e le tlhabelo, fa e se Jehofa fela.
18A Jehofa a itshwarele motlhanka wa gago mo selong se; e tlaa re fa mong wa me a ya mo ntlong ya ga Rimone, a ya go obamela gone, mme a ikaega mo tsogong la me, mme ke ikoba mo ntlong ya ga Rimone, a Jehofa a itshwarele motlhanka wa gago mo selong se.”
19A mo raya a re: “Tsamaya ka kagiso.” Jalo a tloga fa go ene a tsamaya sebakanyana.
20Gehasi motlhanka wa ga Eliša monna wa Modimo a ithaya a re: “Bona, mong wa me o rekegetse Naamane wa Mosiria yo, ka a se ka a amogela mo seatleng sa gagwe se o ne a tsile naso; jaaka Jehofa a tshedile ke tlaa mo sianela, ke ya go amogela sengwe mo go ene.”
21Gehasi a latela Naamane. E rile Naamane a bona mongwe a mo sianetse, a pagologa mo kareng ya gagwe, a ya go mo kgatlhantsha, a re: “A go siame gotlhe koo?”
22A re: “Go siame gotlhe. Mong wa me o nthomile, a re: Bona, makau a le mabedi bomorwa baperofeti, ba nkgorogetse jaana fela jaana, ba tswa lefatsheng la Eferaime la makgabana; ke a go rapela, a ko o ba neye dipapetla di le 3 000 tsa selefera, le dipaka di le pedi tsa diaparo.”
23Naamane a re: “Itumele o tseye dipapetlana tsa selefera di le 6 000.” A mo emelela, a bofelela dipapetlana di le 6 000 tsa selefera mo dikgetseng di le pedi, le dipaka di le pedi tsa diaparo, a di rwesa batlahanka ba gagwe ba le babedi; ba tsamaya ba di rwele fa pele ga gagwe.
24E rile a fitlha mo thabaneng, a di tsaya mo seatleng sa bone, a di tsenya mo ntlong; a naya banna bao tsela, ba tsamaya.
25Mme ene a tsena, a ya a ema fa pele ga mong wa gagwe. Eliša a mo raya a re: “O tswa kae Gehasi?” A re: “Motlhanka wa gago ga a ise a ye gope.”
26A mo raya a re: “A pelo ya me ga e a tsamaya nao, ka monna yole a boa kwa kareng ya gagwe a tla go go kgatlhantsha? A ke lobaka lwa go amogela madi, le go amogela diaparo, le masimo a matlhware, le masimo a mafine, le dinku le dikgomo, le batlhanka le malata?
27Ka re, lepero la ga Naamane le tlaa go ngaparela, le losika lwa gago ka bosakhutleng.” Mme a tswa fa pele ga gagwe a le molepero a le mosweu jaaka kapoko.
Who We AreWhat We EelieveWhat We Do
2025 by iamachristian.org,Inc All rights reserved.
