PESALEMA 45 - SetswanaTswana 1908/1992（TSW08NO）

Sefela sa nyalo ya kgosiPesalema ya bomorwa Kora. Masekile. Sefela sa marato. Ya moopedi yo mogolo; e laeletswe Shošanime.

1Pelo ya me e penologa ka kgang

e e monate; ke bua dilo

tse ke di dirileng ka ga kgosi;

loleme lwa me ke sekwala sa

mokwadi yo o bofefo

mo go kwaleng.

2O montle thata

go gaisa bana ba batho;

bopelotshweu bo tshetswe

mo dipounameng tsa gago;

ke gone ka mo Modimo o go

segofaditseng ka bosakhutleng.

3Gatlha tšhaka ya gago ka fa nokeng

ya gago, wena senatla,

kgalalelo le borena ke tsa gago.

4Mo boreneng jwa gago o pagamela

pele ka go rangwa ke dilo,

ka ntlha ya boammaaruri,

le bopelonomi, le tshiamo;

seatla sa gago se segolo se tlaa

go ruta dilo tse di boitshegang.

5Metswi ya gago e bogale;

ditšhaba di wela fa tlase ga gago;

e mo pelong ya baba ba kgosi.

6 Setulo sa gago sa bogosi

se ntse ka bosenabokhutlo

le ka bosaengkae;

thobane ya bogosi jwa gago

ke thobane ya tekatekanyo.

7O ratile tshiamo, wa ila boikepo;

ke gone ka mo Modimo,

Modimo wa gago, o go tloditseng

ka lookwane lwa boitumelo,

go go fetisa dilekane tsa gago.

8Diaparo tsa gago tsotlhe di nkga

mura, le mokgapha, le kasia;

diletso tse di ditlhale

di tswa mo matlong a dinaka tsa

ditlou a kgosi,

di go jesitse monate.

9Bomorwadia dikgosi ba gone

mo basading ba ba tlotlegang

ba gaeno;

ka fa letsogong la gago le legolo

go ema mohumagadi wa kgosi

a apere gouta ya Ofira.

10Reetsa, morwadiaka,

mme o gopole,

o bo o sekege tsebe ya gago;

le gone o lebale bagaeno

le ntlo ya ga rraago.

11Jalo kgosi e tlaa eletsa bontle

jwa gago;

gonne ke ene morena wa gago;

o obamele ene.

12Le morwadia Ture

o tlaa bo a le gone a tshotse neo;

le ba e leng bahumi mo bathong

ba tlaa lopa letlhogonolo la gago.

13Morwadia kgosi mo teng ga ntlo

ya kgosi o galalela gotlhe:

diaparo tsa gagwe di logilwe

ka go tlhakanngwa le gouta.

14O tlaa isiwa kwa kgosing

a le mo diaparong tse di meroko

mentle;

le makgarebane, dilekane tsa gagwe

tse di mo etleetsang,

a tlaa isiwa kwa go wena.

15A tlaa isiwa ka boitumelo

le ka boipelo;

a tlaa tsena mo ntlong ya kgosi.

16Mo boemong jwa borraago

go tlaa nna bana ba gago,

ba o tlaa ba tlhomang go nna

dikgosana mo lefatsheng lotlhe.

17Ke tlaa dira leina la gago

gore le gakologelwe mo

ditshikatshikeng tsotlhe;

ke gone ka mo ditšhaba di tlaa go

ntshetsang malebogo

ka bosenabokhutlo le ka bosaengkae.