1Jakobe a bitsa bomorwawe a re: “Phuthegang, gore ke tle ke lo bolelele se se tlaa lo diralelang mo metlheng e e tlaa tlang.
2“Phuthegang, lo utlwe,
lona bomorwa Jakobe;
lo reetse Iseraele rraeno.
3Rubene,
ke wena wa ntlha wa me;
nonofo ya me
le tshimologo ya thata ya me;
tlotlomalo ya bogolo,
tlotlomalo ya bonatla.
4Ka go kgaphea kgaphea
jaaka metsi,
ga o ketla o nna le tlotlomalo:
ka go bo o kile wa tlhatlogela
kwa bolaong jwa ga rraago;
wa bo leswefatsa;
a ya mo diphateng tsa me.
5Simeone le Lefi
ke bana ba monna;
ditšhaka tsa bone
ke dibolao tsa thubakanyo.
6Ao, mowa wa me,
o se ka wa tsena
mo maomeng a bone;
kgalalelo ya me,
o se ka wa kopana
le phuthego ya bone;
gonne ba bolaile banna
ka bogale jwa bone,
le mo go itaoleng ga bone
ba kgaola dipholo mesifa.
7A go hutsege bogale jwa bone
gonne bo ne bo le bolau;
le tšhakgalo ya bone,
gonne e ne e le bolalome;
ke tlaa ba kgaoganya
mo go Jakobe,
ke ba phatlalatsa mo go Iseraele.
8Juta, wena bomorwa rraago
ba tlaa go baka;
seatla sa gago se tlaa nna
mo thamong
tsa baba ba gago.
Bomorwa rraago
ba tlaa ikoba fa pele ga gago.
9 Juta ke ngwana wa tau;
morwaaka,
o tlhatlogile mo setotong,
a inama, a namalala jaaka tau,
le jaaka tau e namagadi;
o tlaa tsosiwa e mang?
10Thobane ya bogosi
ga e ketla e tloga mo go Juta,
le fa e le lore lwa molaodi
go tloga fa gare ga dinao tsa gagwe,
go bo go tle go tsamaye
Shilo a tle pele.
Go utlwa ga ditšhaba
go tlaa nna kwa go ene.
11Ka a golegelela petsana ya gagwe
mo mofineng,
le eselana ya gagwe mo mofineng
o o tlhophegileng:
o tlhatswitse diaparo tsa gagwe
mo bojalweng jwa mofine,
le kobo ya gagwe mo mading
a loungo lwa mofine.
12Matlho a gagwe a tlaa hubidiwa
ke bojalwa jwa mofine,
le meno a gagwe
a tlaa sweufadiwa ke maši.
13Sebulone o tlaa aga
kwa bogorogelong jwa lewatle;
o tlaa nna bogorogelo jwa dikepe.
Molelwane wa gagwe
o tlaa tshwaragana le Sitone.
14Isakare ke esela e e thata,
e namaletse fa gare
ga maraka a dinku,
15mme a bona felo gongwe
ga boikhutso fa go le molemo,
le lefatshe fa le ne le le monate;
a sekegela lerudi la gagwe go sikara,
a tswa motlhanka yo o nnang
mo tirong e o e patikelwang.
16Dane o tla atlhola batho ba gagwe,
jaaka lotso longwe lwa Iseraele.
17Dane o tlaa nna noga mo tseleng;
le šaušawane e e lomang
magwejana a pitse,
mopalami a wele kwa morago.
18Jehofa, ke ntse ke lebeletse
poloka ya gago.
19Gate, setlhopha sa bonokwane
se tlaa mo pitlaganyetsa:
ene o tlaa ba pitlaganyetsa
ba hulere.
20Mo go Ašere,
dijo tsa gagwe di tlaa nna mahura,
o tlaa tswa dijo
tse di metsegang tsa segosi.
21Nafetali ke phala e namagadi
e e golotsweng;
o ntsha mafoko a a molemo.
22Josefe ke kala e e ungwang thata,
kala e e ungwang fa motsweding;
dikala tsa gagwe di tlolaganya
lorako.
23Bahudi ka metswi
ba mo tshwentse mo go botlhoko,
ba mo hula, ba mmogisa.
24Mme bora jwa gagwe
jwa nna mo thateng,
mabogo a diatla tsa gagwe
a thatafadiwa ke diatla
tsa Mothata wa ga Jakobe,
yo e leng modisa
le lefika la ga Iseraele,
25e bong ka Modimo wa ga rraago
o o tlaa go thusang,
le ka Mothatayotlhe,
yo o tlaa go segofatsang,
ka masego a legodimo kwa godimo,
le masego a boteng
jo bo namaletseng kwa tlase,
masego a mabele, le a sebopelo.
26Masego a ga rraago
a feteletse bogolo go masego
a batsadi ba me ba pele,
go ya kwa sekhutlong
sa bofelo sa dithaba
tse di emeng ka bosakhutleng.
A tlaa nna mo tlhogong
ya ga Josefe;
le mo phogong
ya gagwe yo a neng
a kgaoganye le bomorwa rraagwe.
27Benjamine
ke phiri e e phamolaphamolang:
o tlaa garola setoto ka moso,
maitseboa o tlaa aba
mo go bolailweng.”
28Botlhe bao ke bone ditso tse di 12 tsa Iseraele; mme se ke sone se rraabo o se buileng nabo a ba segofatsa; mongwe le mongwe ka fa tshegofatsong ya gagwe, a ba segofatsa.
Loso le phitlho ya ga Jakobe29Mme a ba laya, a ba raya a re: “Ke na le go phuthelwa kwa bathong ba gaetsho; lo mphitlhe fa go borraetsho mo logageng lo lo mo sebateng sa naga sa ga Eferone wa Mohite.
30 Mo logageng lo lo mo nageng ya Makapela, bolebana le Mamere, kwa lefatsheng la Kanana, lo Aberahame o lo rekileng le sebata sa naga mo go Eferone wa Mohite go nna boswa jwa phitlhelo.
31 Ba fitlhile Aberahame le Sara mosadi wa gagwe gone; ba fitlhile Isake le Rebeka mosadi wa gagwe gone; ka fitlha Lea gone.
32Ke raya sebata sa naga le logaga lo lo mo go sone, mo go rekilweng mo baneng ba ga Hethe.”
33 E rile Jakobe a sena go wetsa go laya bomorwawe, a gonela dinao tsa gagwe mo bolaong, a khutla, mme a phuthelwa kwa bathong ba ga gabo.
Who We AreWhat We EelieveWhat We Do
2025 by iamachristian.org,Inc All rights reserved.
