1Jakobe a tsholetsa matlho a gagwe a leba, mme bonang, Esau a bo a tla le banna ba le 400 nae. Mme bana a ba kgaoganyetsa Lea, le Ragele le malata a mabedi.
2A baya malata a mabedi le bana ba one kwa pele pele, Lea le bana ba gagwe fa morago, Ragele le Josefe kwa moragorago.
3Ene ka esi a fetela kwa pele ga bone, a inamela fa fatshe gasupa, a ba a tla a atamela fa go mogolowe.
4Esau a siana a ya go mo kgatlhantsha, a mo kamatlela, a mo atla; mme ba lela.
5A tsholetsa matlho a gagwe a bona basadi le banyana; mme a re: “Ba o nang nabo ke bomang?” A re: “Ke bana ba Modimo o ba neileng motlhanka wa gago ka bopelonamagadi jwa one.”
6Foo malata a atamela, one le bana ba one, mme ba inama.
7Lea le ene a atamela le bana ba gagwe, ba inama; morago ga tla Josefe le Ragele, ba inama.
8Mme a re: “O a reng ka lesomo le le kanakana le ke kopanyeng nalo?” Jakobe a re: “Ke gore ke bone tsalano mo matlhong a morena wa me.”
9Esau a re: “Ke na le tsetsho, di ntekanye; a se o nang naso e nne sa gago fela nnaka.”
10Jakobe a re: “Nnyaa, ke a go rapela, a e re fa ke bonye tsalano mo matlhong a gago, foo o amogele mpho ya me mo seatleng sa me; ka e le fa ke bonye sefatlhogo sa gago, mme ka go natefela fela jaaka motho a bona sefatlhogo sa Modimo.
11Ke a go rapela, a ko o amogele mpho ya me e e isitsweng kwa go wena; ka gobo Modimo o ntiretse ka pelonamagadi, ka ke bile ke na le mo go ntekanyeng.” A mo emelela, mme a e tsaya.
12A re: “A re nanoge, re tsamaye mmogo, ke tlaa go etelela pele.”
13A mo raya a re: “Morena wa me o a itse fa bana ba sa le diramatlana le go re matsomane le matlhape a ke nang nao a a amusa. Mme fa ba ka di kgweetsa ka potlako letsatsi le le lengwe fela, matsomane otlhe a ka swa.
14Ke a go rapela, a morena wa me a fetele kwa pele ga motlhanka wa gagwe; nna ke tlaa goga ka papetletso ka fa mosepeleng wa matlhape a a kwa pele ga me, le ka fa mosepeleng wa banyana, ke tle ke tsamaye ke fitlhe koo go morena wa me kwa Seire.”
15Esau a re: “Mma ke go tlogelele batho bangwe ba ke nang nabo.” Mme a re: “E tlaa bo e le ka ntlha yang? A nke ke bone tsalano mo matlhong a morena wa me.”
16Jalo Esau a boa ka letsatsi leo a leba kwa Seire.
17Jakobe a etela kwa Sukothe, a ikagela ntlo, a direla dikgomo tsa gagwe diobo; ke gone ka moo leina la felo foo le bidiwang Sukothe.
18Jakobe a fitlha ka kagiso kwa motseng wa Shekeme, o o mo lefatsheng la Kanana, ka a tswa kwa Patanaarame; a thibelela fa pele ga motse.
19 Sebata sa lefatshe sa fa o tsharolotseng mogope wa gagwe gone, a se reka mo seatleng sa bana ba ga Hamore rra Shekeme, ka dipapetla tsa madi di le lekgolo.
20A aga aletara gone, a e raya leina a re: Elelohe-Iseraele. (Ke go re: Modimo wa Iseraele.)
Who We AreWhat We EelieveWhat We Do
2025 by iamachristian.org,Inc All rights reserved.
