1Utlwa morapelo wa me Jehofa;
sekegela mekokotlelo ya me tsebe;
o nkarabe mo boikanngong jwa
gago, le mo tshiamong ya gago.
2 O se ka wa seka
le motlhanka wa gago;
gonne mo ponong ya gago
ga go na motshedi ope
yo o ka nnang tshiamo.
3Gonne mmaba
o bogisitse mowa wa me;
o thubanyeditse botshelo jwa me
fa fatshe;
o mpatiketse go aga
mo mafelong a lefifi
jaaka ba ba sa bolong go swa.
4Ke gone ka moo
mowa wa me o phikameng
mo teng ga me;
pelo ya me e swafetse
mo teng ga me.
5Ke gakologelwa metlha
ya bogologolo;
ke akanya go dira ga gago;
ke tlhatlhanya ditiro
tsa diatla tsa gago.
6Ke otlololela diatla tsa me
kwa go wena;
mowa wa me o go nyorelwa
jaaka lefatshe le le kgalegileng.
7Jehofa, akofa o nkarabe;
mowa wa me o a fela;
se mphitlhele sefatlhogo sa gago;
nka tla ka nna
jaaka ba ba fologelang mo moleteng.
8Nkutlwisa bopelonomi jwa gago
jwa lorato mo mosong;
gonne ke ikanya mo go wena;
nkitsise tsela e ke tshwanetseng
go tsamaya mo go yone;
gonne ke tsholeletsa mowa wa me
koo go wena.
9Jehofa, nkgolola mo babeng ba me;
ke tshabela koo go wena
gore o mphitlhe.
10O nthute go dira go rata ga gago;
gonne o Modimo wa me;
mowa wa gago o molemo;
o nkgoge mo lefatsheng
la thokgamo.
11Ntsitsibosa, Jehofa,
ka ntlha ya leina la gago;
mo tshiamong ya gago
o ntshe mowa wa me
mo tlalelong.
12Mo bopelonoming jwa gago
jwa lorato o bo o kgaole botlhe
ba ba patikang mowa wa me;
gonne ke motlhanka wa gago.
Who We AreWhat We EelieveWhat We Do
2025 by iamachristian.org,Inc All rights reserved.
