1A ko o utlwe morapelo
wa me, Jehofa,
mme a go goa ga me
go ke go fitlhe koo go wena.
2O se ka wa mphitlhela
sefatlhogo sa gago
mo letsatsing la pitlagano ya me;
o ntshekegele tsebe;
e re mo letsatsing le ke bitsang
ka lone o nkarabe ka bonako.
3Gonne malatsi a me
a nyelela jaaka mosi;
marapo a me le one
a a ša jaaka serumola.
4Pelo ya me
e tapetegile jaaka bojang,
e swabile;
gonne ke lebala go ja sejo sa me.
5Ka ntlha ya lentswe la go duma
ga me, marapo a me
a ngaparetse nama ya me.
6Ke ntse jaaka khukara ya naga;
ke fetogile
jaaka morubisi wa marotobolo fela.
7Ke ntse ke lebeletse,
mme ke fetogile jaaka thaga
e e ntseng e le nosi
mo setlhoeng sa ntlo.
8Baba ba me ba tlhola ba nkgoba
ka letsatsi lotlhe;
ba ba itirang ditsenwa ka ga me
ba hutsakanya ka nna.
9Gonne ke jele melora jaaka sejo,
ka tlhakanya se ke se nwang
le dikeledi.
10Ke ka ntlha ya kgakatsego ya gago,
le kgalefo ya gago;
gonne o ntsholeditse
wa ntatlhela koo.
11Malatsi a me a tshwana le moriti
o o yang go fela;
mme ke swabile jaaka bojang.
12Mme wena, Jehofa,
o tlaa nnela ruri ka bosakhutleng;
le segopodiso sa gago
go ya ditshikatshikeng tsotlhe fela.
13O tlaa nanoga
o utlwela Sione botlhoko;
gonne ke lobaka
lwa go mo tlhomogela pelo;
ee, lobaka lo lo laotsweng
lo fitlhile.
14Gonne batlhanka ba gago
ba na le kgatlhego
mo majeng a gone,
ba tlhomogela lorole lwa gone pelo.
15Jalo merafe e tlaa boifa
leina la ga Jehofa,
le dikgosi tsotlhe tsa lefatshe,
di tlaa boifa kgalalelo ya gago;
16gonne Jehofa o tsosolositse Sione
go o aga;
o bonetse mo kgalalelong ya gagwe.
17O tlhokometse morapelo
wa ba ba hotlhegileng
ba se na sepe,
ga a ka a nyatsa morapelo wa bone.
18Moo, go tlaa kwalelwa
losika lo lo tlang;
mme tšhaba e e tlaa tlholwang
e tlaa baka Jehofa.
19Gonne o okometse
a le kwa bogodimong
jwa felo ga gagwe ga boitshepo;
Jehofa o ne a lebile lefatshe
a le kwa legodimong;
20go utlwa go fegelwa ga mogolegwi;
go hunolola ba ba laoletsweng loso;
21gore batho ba tle ba bolele
leina la ga Jehofa mo Sione,
le pako ya gagwe mo Jerusalema;
22mogang ditšhaba di phuthegileng
di le mmogo, le magosi,
go direla Jehofa.
23O ne a koafatsa thata ya me
mo tseleng;
a khutsafatsa malatsi a me.
24Ke ne ka re: “Modimo wa me we!
O se ka wa ntlosa
ke le fa gare ga malatsi a me;
aitse dinyaga tsa gago tsone,
di ya le ditshikatshika tsotlhe fela.
25 O sa le o thaya motheo
wa lefatshe bogologolo;
le magodimo
ke tiro ya diatla tsa gago.
26Tsone di tlaa nyelela,
mme wena o tlaa nna fela;
ee, tseo tsotlhe
di tlaa onala jaaka seaparo;
o tlaa di fetola jaaka morepo;
mme di tlaa fetoga;
27mme wena,
o ntse o ntse jaaka o ntse fela;
dinyaga tsa gago
ga di ketla di dira le bokhutlo.
28Bana ba batlhanka ba gago
ba tlaa nna fela,
le losika lwa bone
lo tlaa tlhomamisiwa
fa pele ga gago.”
Who We AreWhat We EelieveWhat We Do
2025 by iamachristian.org,Inc All rights reserved.
