1“Bona, leitlho la me le bonye
gotlhe fela mo,
tsebe ya me e go utlwile,
e go tlhalogantse.
2Se lo se itseng,
ke sone se le nna ke se itseng;
ga ke kwa tlase ga lona.
3Ruri ke rata ka bua
le Mothatayotlhe,
ke eletsa go ganetsanya le Modimo.
4Lona lo balogi ba maaka lotlhe fela,
lo dingaka tse di se nang tiro.
5Lo a bo lo ka ka lwa didimala!
Mme e ne e tlaa bo e le botlhale
mo go lona.
6Utlwang jaana kganetsanyo ya me,
lo reetse kganelelo
tsa dipounama tsa me.
7A lo tlaa buelela Modimo
ka fa go sa siamang,
a lo tlaa buelela one ka tsietso?
8A lo tlaa tlhokomela bomangmang
jwa one?
A lo tlaa ganelela Modimo?
9A go ka nna molemo fa o lo keleka?
Kgotsa jaaka motho
a tle a tsietse motho,
a lona lo tlaa tsietsa one jalo?
10Ruri o ka tla wa lo omanya,
fa lo tlhokomela bomangmang
jwa batho ka bosaitsiweng.
11A tlotlomalo ya one
ga e ketla e lo boifisa,
le poitsho ya one
ga e ketla e lo wela?
12Dipolelo tsa lona tse di itsegeng
ke diane tsa melora;
dikago tsa phemelo tsa lona
ke diphemelo tsa seretse fela.
13“Didimalang, lo nte ke bue,
go ntlele se se ntlelang fela.
14Nkoo ke tseelang nama ya me
ka meno,
ka itsenya botshelo jwa me
mo seatleng sa me go reng?
15Le fa o mpolaya,
ke tlaa nna ke o lebelela fela;
le fa go ntse jalo
ke tlaa gantshetsa ditsela tsa me
fa pele ga one.
16Se le sone e tlaa nna poloko ya me;
gonne motho yo o sa reng
Modimo sepe
ga a ketla a tla fa pele ga one.
17Utlwang puo ya tlhoafalo,
mme a go kakanya ga me
go nne mo tsebeng tsa lona.
18Bonang jaana,
ke rulagantse mafoko a me
a a sekwang;
ke a itse fa ke tlaa siamisiwa.
19Ene yo o tlaa ganelang le nna
e mang?
Gonne jaanong fa ke ka didimala
fela ke tlaa swa.
20Fa e se dilo di le pedi,
o se ka wa di ntirela,
foo ga nketla ke iphitlhela
sefatlhogo sa gago.
21Tlosetsa seatla sa gago
kgakala le nna;
a theregiso ya gago
e se ka ya mpoifisa.
22Foo o bitse,
mme ke tlaa go araba;
kgotsa o mme ke bue,
mme o mphetole.
23Maikepo a me le maleo a me a kae?
Nkitsise tlolo ya me
le boleo jwa me.
24O subelang sefatlhogo sa gago,
o ba o nkaya go re
ke mmaba wa gago?
25A o tlaa gabea lekakaba
le le tsubutlwang,
a o tlaa alola phufe ya soma?
26Gonne o kwala dilo
tse di galakang ka ga me,
o njesa boswa jwa maikepo
a bokau jwa me;
27 le maoto a me
o a tsenya mo disaneng,
o tlhokometse ditselana tsotlhe
tsa me;
o ithalela moralo mo tikologong
ya dipato tsa dinao tsa me.
28Le fa ke tshwana le selo
se se bodileng se se felang,
se se tshwanang le kobo
e e jelweng ke motoutwane.”
Who We AreWhat We EelieveWhat We Do
2025 by iamachristian.org,Inc All rights reserved.
