DIPALO 11 - SetswanaTswana 1908/1992（TSW08NO）

Lefelo la Tabera

1Batho ba ne ba ntse jaaka bangongoregi, ba bua bosula mo ditsebeng tsa ga Jehofa; e rile Jehofa a utlwa, bogale jwa gagwe jwa tuka; molelo wa ga Jehofa wa tuka gare ga bone, wa laila kwa moseong ga bothibelelo.

2Batho ba goela kwa go Moše; Moše a rapela Jehofa, mme molelo wa kokobela.

3Leina la felo foo la bidiwa ga twe, Tabera, gonne molelo wa ga Jehofa o ne wa tuka mo go bone.

Moše o tlhopha baeteledipele ba le masome a a supang

4Bontsi jwa batho jo bo tlhakatlhakanyeng jo bo mo go bone, jwa ineela mo dikeletsong; mme bana ba Iseraele ba lela gape, ba re: “E mang yo o tlaa re nayang nama ra e ja?

5Re gakologelwa ditlhapi tse re neng re di ja fela mo Egepeto e seng ka sepe; makatane, magapu, boleke, booie, le gareleke.

6Gompieno mowa wa rona o omeletse fela; ga go na sepe; ga re na sepe se re se solofetseng, fa e se selo se go tweng mana fela.”

7 Mana a bo a tshwana le peo e tshwaanyana mo matlhong a tshwana le boroku.

8Batho ba ne ba tle ba tsamaetsamae ba a bapale ba a sile mo ditshilong, kgotsa ba a thuge mo dikikeng, ba a apeye ka dipitsa, ba dire dipapetlana tsa senkgwe ka one; moutlwalo wa one o ne o tshwana le wa lookwane lo loša.

9 E ne e re monyo o wela mo bothibelelong bosigo, mana a wele nao.

10Moše a utlwa jaaka ba lela mo malwapeng otlhe a bone, motho mongwe le mongwe fa mojakong wa mogope wa gagwe; mme bogale jwa ga Jehofa jwa tuka thata, le Moše ga mo hutsafatsa.

11Moše a raya Jehofa a re: “Ana o diretse motlhanka wa gago bosula ka ntlha yang? Ke ka ntlha yang fa ke sa bone letlhogonolo mo ponong ya gago fa e bo ne ne o beile morwalo wa tšhaba yotlhe e mo go nna jaana?

12A ke nna mma tšhaba yotlhe e? A ke nna ke ba belegeng, fa e bo ne ne o nthaya o re ke ba tseye mo sehubeng sa me, jaaka mmelegi a tle a belege ngwana yo o anyang, ke ba ise kwa lefatsheng le o le ikanetseng borra ba bone?

13Ke tlaa tsaya kae nama e ke ka e nayang batho botlhe ba, gonne ba lelela mo go nna ba re: ‘Ke ba neye nama gore ba e je.’

14Ga ke a nonofa go rwala batho botlhe ba ke le nosi, gonne ke bokete jo bo nkimelang.

15Fa o ntirela jaana ke a go rapela, o mpolaye fela jaanong jaana, fa ke bonye letlhogonolo mo matlhong a gago; a ke se ipone bobenyana jwa me.”

16Jehofa a raya Moše a re: “Mphuthela banna ba ba 70 ba bagolwane ba Iseraele, ba o ba itseng fa e le bagolwane ba batho, ba le balaodi ba bone; o ba lere kwa mojakong wa mogope wa bophuthegelo, gore ba eme gone nao.

17Ke tlaa fologa ke bua nao gone, mme ke tlaa tsaya ga mowa o o mo go wena ke o baya mo go bone; ba tlaa rwala morwalo wa batho ba nao, gore o se o rwale o le wesi.

18O reye batho o re: E tlaa re ka moso lo bo lo iitshepisitse, mme lo tlaa ja nama; gonne lo ledile mo ditsebeng tsa ga Jehofa lwa re: ‘E mang yo o tlaa re nayang nama ra e ja. Gonne go ne go le molemo mo go rona mo Egepeto.’ Ke gone ka mo Jehofa o tlaa lo nayang nama, mme lo tlaa ja.

19Ga lo ketla loo ja ka letsatsi le le lengwe fela, kgotsa le mabedi, kgotsa a le matlhano, kgotsa a le somne, kgotsa a le 20.

20Lo tlaa ja ka kgwedi e e tletseng go tsamaya e tswa ka dinko tsa lona e ba e nkga sebodu mo go lona, gonne lo ganne Jehofa yo o mo go lona, lo ledile fa pele ga gagwe lwa re: ‘Re ne re tswelang kwa Egepeto?’ ”

21Mme Moše a re: “Batho ba ke mo go bone ba 600 000 ba ba tsamayang ka dinao, mme o rile, o tlaa ba naya nama ba e ja ka kgwedi e e tletseng.

22A ba tlaa bolaelwa matlhape le matsomane, gore go ba lekane? Kgotsa a ba tlaa phuthelwa ditlhapi tsa lewatle gore go ba lekane?”

23Jehofa a raya Moše a re: “A letsogo la ga Jehofa le a bo le khutshwafetse? Jaana o tlaa bona bo lefoko la me le tlaa go dirafalela, kgotsa nnyaa.”

24Moše a tswa, a bolelela batho mafoko a ga Jehofa; a phutha banna ba le 70 ba bagolwane ba Iseraele, mme a ba baya mo tikologong ya mogope.

25Jehofa a fologa a le mo lerung, a bua nae, a tsaya ga mowa o o mo go ene a o baya mo bagolwaneng ba ba 70; ga dirala e rile fela mowa o nna mo go bone, ba perofesa, mme morago ba se ka ba tlhola ba dira jalo gope.

26Ga bo go ne go setse banna ba le babedi kwa bothibelelong; leina la mongwe e le Eletate, leina la yo mongwe e le Metate; mowa wa nna mo go bone, ba bo ba le mo palong ya bone ba ba kwadilweng, mme ba se ka ba tswela kwa mogopeng; ba perofesa ba le kwa bothibelelong.

27Ga siana motho wa lekau, a bolelela Moše a re: “Eletate le Metate ba perofesa kwa bothibelelong.”

28Jošua morwa Nune, modiredi wa ga Moše, mongwe wa banna ba gagwe ba ba itshenketsweng, a bua a re: “Moše morena wa me, a ba idiwe.”

29Moše a mo raya a re: “A o lefufa ka ntlha ya me? Modimo o ka ka wa mma batho botlhe ba ga Jehofa ba perofese, le gore Jehofa a beye mowa wa gagwe mo go bone.”

30Moše a tloga a ya kwa bothibelelong, ene le bagolwane ba Iseraele.

Morena o romelela Baiseraele makutikweo

31Ga tswa phefo kwa go Jehofa, ya tlisa makutikweo kwa lewatleng, ya a digela fa bothibelelong e ka ne e le mosepele wa letsatsi le le lengwe fela ntlheng nngwe, le mosepele wa letsatsi le le lengwe fela ntlheng e nngwe, mo tikologong ya bothibelelo, a tlhatlagana fa fatshe boteng bo le kana ka boleele jwa mabogo a le mabedi.

32Batho ba ema ka letsatsi leo lotlhe, le bosigo jotlhe, le ka letsatsi lotlhe la ka moso, ba kokoanya makutikweo; yo o na a kokoanya bobotlana, a kokoanya diemere di le some; mme ba a ikanegela mo tikologong ya bothibelelo.

33E rile nama e sa ntse e le gare ga meno a bone, e ise e tlhafunwe, bogale jwa ga Jehofa jwa bo bo tuketse morafe, mme Jehofa a betsa batho ka sebetso se se bogale thata.

34Leina la felo foo la bidiwa ga twe, Kiberothe-taafa, gonne ba ne ba fitlha gone batho ba ba ineetseng mo dikeletsong.

35Go tswa mo Kiberothe-taafa batho ba hudugela kwa Haserothe; mme ba nna mo Haserothe.