ISAIA 24 - SetswanaTswana 1908/1992（TSW08NO）

Katlholo ya ga Jehofa mo lefatsheng

1Bonang, Jehofa o dira lefatshe gore le nne lolea fela, o a le swafatsa, o a le ribegetsa, mme o falatsa banni ba lone.

2E tlaa nna go re jaaka go ntse le batho go nne jalo le moperesiti; jaaka go ntse le motlhanka, go nne jalo le mong wa gagwe; jaaka go ntse le lelata, go nne jalo le mohumagadi wa lone; jaaka go ntse le moreki, go nne jalo le morekisi; jaaka go ntse le moadingwi, go nne jalo le moadimi; jaaka go ntse le motsaya koketso ya madi, go nne jalo le montsha koketso.

3Lefatshe le tlaa leafalela ruri, le tlaa thopelelwa ruri; gonne Jehofa o buile lefoko le.

4Lefatshe le a hutsafala le a ngoselela; lefatshe le a topetega le a ngoselela; batho ba ba ipegileng ba lefatshe ba a topetega.

5Lefatshe le bile le tsenye leswe tlase ga banni ba lone; ka ba tlodile melao, ba fetotse ditao, ba robile kgolagano ya bosakhutleng.

6Ke gone ka moo phutso e supuditseng lefatshe, le ba ba agileng mo go yone ba bonywe molato; ke gone ka moo banni ba lefatshe ba fisitsweng, mme ba setse ba le banye.

7Bojalwa jo boša jwa mofine bo a hutsafala, mofine o a swaba, botlhe ba ba pelo di tamutamu ba a fegelwa.

8Letleputlepu la meropana le a khutla, modumo wa ba ba ipelang o a fela, boitumelo jwa harepe bo a khutla.

9Ga ba ketla ba nwa bojalwa jwa mofine ka kopelo; senoo se se bogale se tlaa nna bokgengwe mo go ba ba se nwang.

10Motse o o mapetepete o thubagantswe; ntlo nngawe le nngwe e paketswe, gore motho ope a se ka a tsena.

11Go selelo mo mebileng ka ntlha ya bojalwa jwa mofine; boitumelo jotlhe bo fifetse, letleputlepu la lefatshe le ile.

12Mo motseng go setse tshwafalo fela; kgoro e itaakilwe ka tshenyo.

13Gonne go tlaa nna jalo mo gare ga lefatshe mo ditšhabeng, jaaka go udubadiwa ga motlhware, jaaka mabudutso a mafine fa phulo e sweditswe.

14Bao ba tlaa tsholetsa lentswe la bone, ba tlaa goa; ba tlaa goa ka thata, ba goela borena jwa ga Jehofa ba le kwa lewatleng.

15Ke gone ka moo, lo galaletseng Jehofa ntlheng ya botlhabatsatsi, e bong leina la ga Jehofa Modimo wa Iseraele, mo ditlhakeng tsa lewatle.

16Re utlwile dikopelo di tswa bokhutlong jwa lefatshe, tsa re: “Kgalalelo e nne go basiami.” Mme nna ke rile: “Ke jega pelo, ke jega pelo, ija nna we! Baoki ba dira ka mooko; ee, baoki ba dirile ka mooko o mogolo.”

17Poifo e mo go wena, le gopo, le mutlwane, wena monni wa lefatshe.

18Go tlaa dirala go re, yo o tlaa tshabang mosito wa poifo o tlaa wela mo gopong; mme yo o tlhatlogang mo teng ga gopo o tlaa tshwarwa ke mutlwane; gonne dithoba tsa legodimo di bulegile, le metheo ya lefatshe e a reketla.

19Lefatshe le thubagantswe ruri, lefatshe le tlhapologile mo gogolo, lefatshe le tshikinyegile mo go feteletseng.

20Lefatshe le tlaa theekela jaaka motho yo o tagilweng, mme le tlaa ibilega jaaka mogope; tlolo ya lone e tlaa nna boima mo go lone, mme le tlaa wa, le se ke le ba le tsoga.

21Go tlaa dirala mo letsatsing leo go re, Jehofa o tlaa betsa lesomo la ba ba ipegileng kwa godimo, le dikgosi tsa lefatshe mo lefatsheng.

22Ba tlaa phuthelwa mmogo jaaka bagolegwi ba tle ba phuthelwe mo moleteng wa kgolegelo; ba tlaa tswalelwa mo ntlong ya kgolegelo, morago ga malatsi a le mantsi ba tlaa bediwa.

23Foo kgwedi e tlaa sosobaganngwa, le letsatsi le tlaa tlhajwa ke ditlhong; gonne Jehofa wa masomosomo o tlaa busa mo thabeng ya Sione le mo Jerusalema, le fa pele ga bagolwane ba gagwe ka kgalalelo.