1“Se le sone pelo ya me
e a se roromela,
e garoge mo felong ga yone.
2Reetsang loratla lwa lentswe la one,
le tumo e e tswang mo molomong
wa one.
3O e dumisetse
fa tlase ga legodimo lotlhe fela,
le logadima lwa one
o lo gadimisetse kwa dikhutlong
tsa lefatshe.
4Morago ga lone go dume kodu;
o dume ka kodu ya borena jwa one;
mme ga o thibe dikgadima
mogang kodu ya one e utlwalang.
5Modimo o duma kgakgamatso
ka kodu ya one,
o dira dilo tse dikgolo
tse re sa kakeng ra di tlhaloganya.
6Gonne o tle o reye kapoko o re:
‘Na mo lefatsheng;’
le pula ya medupe,
le marothodi a ya maebana
a magolo.
7O konela seatla sa motho mongwe
le mongwe;
gore batho botlhe
ba o ba dirileng ba go itse.
8Foo diphologolo le dibatana
di ye mo maiphitlhong,
di nne mo dikutleng tsa tsone.
9Ledimo le tle le tswe mo kutleng
ya borwa;
le serame ntlheng ya botsheka.
10Dikgapetla tsa metsi di abiwa
ka pudulo ya Modimo;
mme boatlhamo jwa metsi bo
gatsediwe.
11Ee, o belesa leru le le kwenneng
metsi;
o phutholole leru la one la logadima;
12le dikolosiwe ka kgoro ya one
gore di tle di dire sengwe le sengwe
se o se di laoletseng
mo lefatsheng lotlhe le le nnwang.
13Le fa o di tlisitse
gore di nne kwatlhao,
kgotsa go thusa lefatshe la one,
kgotsa ka kutlwelobotlhoko.
14“Jobe, a ko o reetse se;
ema fela, o akanye ditiro
tse di gakgamatsang tsa Modimo.
15A o itse ka fa Modimo o tleng
o di laye ka gone,
mme o phatsimise logadima
lwa leru la one ka gone?
16A o itse go retelediwa ga maru
le ditiro tse di gakgamatsang
tsa o o leng boitekanelo mo kitsong?
17Le ka fa diaparo tsa gago
di leng bothitho ka gone
fa lefatshe le tuuletse fela
ka ntlha ya phefo ya borwa?
18A o ka tsharolola nao loapi
lo lo thata
jaaka seiponi se se thetsweng?
19O re rute se re tlaa se buang nao,
gonne ga re kake ra rulaganya puo
ya rona ka ntlha ya lefifi.
20A o ka bolelelwa fa ke rata go bua,
kgotsa a motho o ka eletsa
a ka bo a komediwa?
21Jaana batho ga ba kake ba leba
lesedi fa le phatsima mo loaping;
fa phefo e fetile e lo ntlafaditse.
22Mo ntlheng ya botsheka
go tswa kgalalelo e eketeng
ya botsodutsokwane,
Modimo o na le borena
jo bo boitshegang mo go one.
23Ka ga Mothatayotlhe,
ga re kake ra mo tlhantlhabetsa,
o tlotlometse mo thateng,
mo katlholong le mo tshiamisong
e e tletseng, ga a ketla a patika.
24Mme batho ba mmoifa
ka ntlha ya gone moo;
ga a tlhokomele bape
ba ba pelo e e tlhalefileng.”
Who We AreWhat We EelieveWhat We Do
2025 by iamachristian.org,Inc All rights reserved.
