PESALEMA 142 - SetswanaTswana 1908/1992（TSW08NO）

Thapelo ya thuso mo motlheng wa matshwenyegoMasekile wa ga Dafite, ka a le mo logageng; Morapelo.

1Ke tlhaeleletsa kwa go Jehofa

ka lentswe la me;

ke isa mokokotlelo kwa go Jehofa

ka lentswe la me.

2Ke gorometsa boitoko jwa me

fa pele ga gagwe;

ke supa tlalelo ya me

fa pele ga gagwe.

3E rile mowa wa me

o phikame mo teng ga me,

wa bo o itse tsela ya me fela.

Mo tseleng e ke tsamayang mo go

yone ba ntshubetse mutlwane.

4Leba ka fa ntlheng

ya letsogo la me le legolo,

mme o bone;

gone ga go na ope yo o nkitseng;

ke tlhaetswe ke botshabelo;

ga go motho ope yo o dirang sepe

ka mowa wa me.

5Ke ne ka tlhaeleletsa

koo go wena, Jehofa, ka re:

“O botshabelo jwa me,

le kabelo ya me,

mo lefatsheng la batshedi.”

6Ela go goa ga me tlhoko,

gonne ke ngotlilwe thata;

nkgolola mo babogising ba me;

gonne ba thata bogolo go nna.

7Ntsha mowa wa me

mo ntlong ya kgolegelo,

gore ke ntshetse leina la gago

malebogo;

basiami ba tlaa ntikanyeletsa;

gonne o tlaa ntirela sentle

ka pelo mo go feteletseng.