PESALEMA 136 - SetswanaTswana 1908/1992（TSW08NO）

Sefela sa malebogo

1 A ko lo ntshetseng Jehofa

malebogo; gonne o molemo;

gonne boutlwelobotlhoko jwa gagwe

bo eme ka bosakhutleng.

2A ko lo ntshetseng

Modimo wa medimo malebogo;

gonne boutlwelobotlhoko jwa gagwe

bo eme ka bosakhutleng.

3A ko lo ntshetseng

Morena wa barena malebogo;

gonne boutlwelobotlhoko jwa gagwe

bo eme ka bosakhutleng.

4Ene yo o dirang dikgakgamatso

a le esi;

gonne boutlwelobotlhoko jwa gagwe

bo eme ka bosakhutleng.

5 Ene yo o dirileng magodimo

ka tlhaloganyo;

gonne boutlwelobotlhoko jwa gagwe

bo eme ka bosakhutleng.

6 Ene yo o phutholotseng lefatshe

mo godimo ga metsi;

gonne boutlwelobotlhoko jwa gagwe

bo eme ka bosakhutleng.

7 Ene yo o dirileng masedi a magolo;

gonne boutlwelobotlhoko jwa gagwe

bo eme ka bosakhutleng.

8Letsatsi, gore le laole motshegare;

gonne boutlwelobotlhoko jwa gagwe

bo eme ka bosakhutleng.

9Kgwedi le dinaledi

gore di laole bosigo;

gonne boutlwelobotlhoko jwa gagwe

bo eme ka bosakhutleng.

10 Ene yo o iteileng Egepeto

ka lotsalwapele lwa bone;

gonne boutlwelobotlhoko jwa gagwe

bo eme ka bosakhutleng.

11 A ntsha Iseraele mo gare ga bone;

gonne boutlwelobotlhoko jwa gagwe

bo eme ka bosakhutleng;

12ka seatla se se thata,

le ka letsogo le le otlologileng;

gonne boutlwelobotlhoko jwa gagwe

bo eme ka bosakhutleng.

13 Ene yo o neng a kgaoganya

Lewatle le Lehibidu fa gare;

gonne boutlwelobotlhoko jwa gagwe

bo eme ka bosakhutleng.

14A tlolagantsha Iseraele

fa gare ga lone;

gonne boutlwelobotlhoko jwa gagwe

bo eme ka bosakhutleng.

15A ribegetsa Faro le ntwa ya gagwe

mo Lewatleng le Lehibidu;

gonne boutlwelobotlhoko jwa gagwe

bo ema ka bosakhutleng.

16Ene yo o neng a goga batho

ba gagwe a ba ralatsa naga fela;

gonne boutlwelobotlhoko jwa gagwe

bo eme ka bosakhutleng.

17Ene yo o neng a itaya dikgosi

tse dikgolo;

gonne boutlwelobotlhoko jwa gagwe

bo eme ka bosakhutleng.

18A bolaya dikgosi tse di tumileng;

gonne boutlwelobotlhoko jwa gagwe

bo eme ka bosakhutleng.

19 Sihone, kgosi ya Baamora;

gonne boutlwelobotlhoko jwa

gagwe bo eme ka bosakhutleng.

20 Le Oge, kgosi ya Bašane;

gonne boutlwelobotlhoko jwa gagwe

bo eme ka bosakhutleng.

21A aba lefatshe la bone

go nna boswa;

gonne boutlwelobotlhoko jwa gagwe

bo eme ka bosakhutleng.

22E bong boswa jwa ga Iseraele,

motlhanka wa gagwe;

gonne boutlwelobotlhoko jwa gagwe

bo eme ka bosakhutleng.

23Ene yo o re gopotseng

re phophoregetswe;

gonne boutlwelobotlhoko jwa gagwe

bo eme ka bosakhutleng.

24O bile o re golotse

mo baganetsing ba rona;

gonne boutwelobotlhoko jwa gagwe

bo eme ka bosakhutleng.

25O fa dilo tsotlhe dijo;

gonne boutlwelobotlhoko jwa gagwe

bo eme ka bosakhutleng.

26A ko lo ntshetseng Modimo wa

legodimo malebogo;

gonne boutlwelobotlhoko jwa one

bo eme ka bosakhutleng.