ISAIA 54 - SetswanaTswana 1908/1992（TSW08NO）

Lorato lo lo sa feleng lwa ga Jehofa mo go Iseraele

1 “Opela wena moopa, wena

yo o iseng o bone ngwana;

ponyega ka sefela, o goe thata,

wena yo o iseng o nne mo pelegong;

gonne go bantsi bana ba yo o lore,

go feta ba mosadi yo o nyetsweng;”

go bua Jehofa.

2“Katolosa bonno jwa mogope

wa gago; a ba ngamole

meraro ya manno a gago;

se rekegele; lelefatsa megala ya gago,

o thatafatse dimapo tsa gago.

3Gonne o tlaa anamelela

ka fa ntlheng ya letsogo le legolo,

le ka fa go la molema;

mme losika lwa gago

lo tlaa rua merafe;

lo tlaa agisa batho mo metseng

e e ropafetseng.

4O se ka wa boifa; gonne

ga o ketla o tlhajwa ke ditlhong;

le gone o se ka wa sosobagana,

gonne ga o ketla o tlhabisiwa

ditlhong;

gonne o tlaa lebala

ditlhong tsa borweetsana jwa gago,

le go kgojwa ga botlholagadi

jwa gago ga o ketla

o tlhola o go gakologelwa gope.

5Gonne Modiri wa gago

ke ene monna wa gago;

Jehofa wa masomosomo

ke leina la gagwe;

le Moitshepi wa Iseraele

ke ene Morekolodi wa gago;

o tlaa bidiwa Modimo

wa lefatshe lotlhe.

6Gonne Jehofa o go biditse

jaaka mosadi yo o tlhadilweng

a tlhokofetse mo moweng,

e bong mosadi wa moroba

fa a latlhilwe,”

go bua Modimo wa gago.

7“Ke go tlhadile ka lobakanyana fela;

mme ke tlaa go phutha

ka mautlwelobotlhoko a magolo.

8Ka go subela sefatlhogo sa me

ka lobakanyana fela,

ka kgalefo e e belologang;

mme ke tlaa go utlwela botlhoko

ka pelonomi e e sa khutleng,”

go bua Jehofa Morekolodi wa gago.

9 “Gonne selo se,

se ntse jaaka metsi a ga Noa mo go

nna;

gonne jaaka ke ikanne

fa metsi a ga Noa a se ketla a tlhola

a hupetsa lefatshe,

ke ikanne jalo fa ke se ketla

ke go galefela

le fa e le go go kgalemela.

10Gonne dithaba di ka tloga

le makhubu a katosiwa;

mme pelonomi ya me ga e ketla

e tloga mo go wena,

le fa e le kgolagano ya me ya kagiso

go katoga mo go wena,”

go bua Jehofa

yo o go utlwelang botlhoko.

Jerusalema yo moša

11 “Ao! Wena mmogisiwa

yo o petupetugisiwang

ke matsubutsubu a phefo,

mme o sa gomodiwe;

bona ke tlaa rulaganya maje a gago

ka mebala e mentle,

ke tlaa thaya metheo ya gago

ka maje a sedumedi, (safire.)

12Ke tlaa dira mejakwana ya diiponi

ka majana a mahibitswana, (rube,)

le mejako ya gago ya majana a

mahibidu, (karebunekele,)

le molelwane otlhe wa gago ka maje

a mantle.

13 Bana ba gago botlhe

ba tlaa rutwa ke Jehofa;

kagiso ya bana ba gago

e tlaa nna kgolo.

14O tlaa tlhomamisiwa mo tshiamong;

o tlaa nna kgakala le patiko,

gonne ga o ketla o boifa;

o tlaa nna kgakala le therego,

gonne ga e ketla e go atamela.

15Bona, ba ka phuthega,

mme e seng ka nna;

le fa e le bomang

ba ba tlaa go phuthegelang

ba tlaa wa ka ntlha ya gago.

16Bona, ke nna ke tlhodileng mothudi,

yo o ubelang molelo wa magala,

a ntshe sebolao ka fa tirong ya sone;

ke bile ke tlhodile mokgakgabatsi

go tla a senya.

17Ga go na sebolao sepe

se se thudilweng ka ga gago

se se tlaa segofalang;

le loleme longwe le longwe

lo lo tlaa go tsogelang mo tshekong,

o tlaa lo sekisa.

Selo se, ke boswa jwa batlhanka

ba Jehofa, le tshiamo ya bone

e e tswang mo go nna.”

Go bua Jehofa.