1Ana Morena o khurumeditse jang
morwadia Sione ka leru mo bogaleng jwa gagwe!
O ntshitse bontle jwa Iseraele
mo legodimong
a bo latlhela fa fatshe,
ga a a gakologelwa
sebeo sa gagwe sa dinao
mo letsatsing la bogale jwa gagwe.
2Morena o komeditse manno otlhe
a ga Jakobe,
a se ka a tlhomoga pelo;
o digile dikago tse di thata tsa
phemelo tsa morwadia Juta
mo bogaleng jwa gagwe;
o di foloseditse fela fa fatshe,
o tlhapaditse bogosi
le dikgosana tsa jone.
3O kgaotse dinaka tsotlhe tsa Iseraele
mo bogaleng jo bo tukang;
o gonne letsogo la gagwe le legolo
fa pele ga mmaba;
mme o laitse Jakobe
jaaka molelo o o tutumang,
o o lailang ntlheng tsotlhe.
4O laetse bora jwa gagwe
jaaka mmaba, o eme,
letsogo la gagwe le legolo
le ntse jaaka moganetsi,
o bile o bolaile gotlhe mo go neng
go eletsega mo matlhong;
o goromeditse tšararego ya gagwe
jaaka molelo
mo mogopeng wa morwadia Sione.
5Morena o fetogile
o ntse jaaka mmaba,
o komeditse Iseraele;
o komeditse matlo otlhe a gagwe
a dikgosi,
o sentse dikago tsa gagwe
tse di thata tsa phemelo,
mo go morwadia Juta
o ntsifaditse selelo le khutsafalo.
6O tlositse loobo lwa gagwe ka thata,
jaaka e ka bo e le lwa tshimo;
o sentse felo ga gagwe
ga bophuthegelo;
Jehofa o dirile gore phuthego
e e masisi
le sabata di lebalwe mo Sione,
mo kgakalong ya bogale jwa gagwe
o nyaditse kgosi le moperesiti.
7Morena o itatotse sebeso sa gagwe,
o tlhoile felo ga gagwe ga boitshepo,
dithako tsa matlo a gagwe a dikgosi
o di tsentse mo seatleng sa mmaba;
ba tsositse modumo mo ntlong
ya ga Jehofa jaaka mo tsatsing
la phuthego e e masisi.
8Jehofa o ikaeletse go senya
lorako lwa morwadia Sione;
o namaladitse thapo,
ga a ise a gone seatla sa gagwe
mo go senyeng;
o dirile gore kago ya phemelo
le lorako di hutsafale;
di topetege mmogo.
9Ditswalo tsa gagwe
di rorometse mo mmung;
o sentse o robakile mephakalego
ya gagwe.
Kgosi ya gagwe le dikgosana
tsa gagwe di mo merafeng
kwa molao o seyong gone
ee, baperofeti ba gagwe
ga ba bone ponatshegelo epe
e e tswang kwa go Jehofa.
10Bagolwane ba morwadia Sione
ba dutse fa fatshe ba didimetse;
ba kubuetsa lorole
mo tlhogong tsa bone;
ba ikokwaetse ka letsela la kgetse.
Makgarebane a Jerusalema
a ikobela ditlhogo fa fatshe.
11Matlho a me a kalega ka dikeledi,
boteng jwa me bo fuduegile,
sebete sa me se gorometsegetse
fa fatshe,
ka ntlha ya tshenyego
ya morwadia batho ba me;
gonne banyana le ba ba anyang
ba ngategela mo mebileng ya motse.
12Ba raya bommaabo, ba re:
“Mabele a kae le bojalwa jwa
mofine?”
Mogang ba ngategang
jaaka ba ba tlhabilweng
mo mebileng ya motse,
mogang mowa wa bone
o goromelediwang mo sefubeng
sa bommaabo.
13Ke tlaa go supetsa eng?
Ke tlaa go tshwantsha le eng,
wena morwadia Jerusalema?
Ke tlaa go lekanya le eng
gore ke tle ke go gomotse,
wena morwadia Sione
wa kgarebana?
Gonne thubego ya gago e kgolo
jaaka lewatle;
e mang yo o ka go fodisang?
14Baperofeti ba gago
ba go bonetse diponatshegelo tsa
boithamako le bonyana;
mme ga ba ise ba lemoge boikepo
jwa gago gore ba tle ba buse
botshwaro jwa gago.
Ba go bonetse ditao tsa boithamako,
le dilo tse di tlaa go lelekang
mo lefatsheng.
15Botlhe ba ba fetang ka tsela
ba go opanyetsa diatla;
ba a otsa, ba thukhuthela morwadia
Jerusalema tlhogo ba re:
“A ke one motse o batho
ba ne ba o bitsa ba re:
‘Bontle jo bo tletseng,’ ba re:
‘Boitumelo jwa lefatshe lotlhe’ ”
16Baba botlhe ba gago
ba go atlhamoloseditse molomo;
ba a otsa, ba huranya meno ba re:
“Re mo komeditse;
ruri ke one motlha
o re ntseng re o lebeletse;
re o fitlhetse, re o bonye.”
17Jehofa o dirile se o se ikaeletseng;
o dirafaditse lefoko la gagwe
le o le laotseng
mo metlheng ya bogologolo;
o digile, a sa tlhomoge pelo.
O dirile gore mmaba a go jele koma,
o goleditse lonaka
lwa baba ba gago.
18Pelo ya bone ya goela
kwa go Morena;
wena lorako lwa morwadia Sione,
a dikeledi di elele jaaka noka
motshegare le bosigo;
o se ka wa inaya lobaka;
a nyetse ya leitlho la gago
e se khutle.
19Nanoga, o kue mo bosigong,
mo tshimologong ya ditebelo;
thela pelo ya gago jaaka metsi
fa pele ga sefatlhogo sa Morena;
mo tsholeletse diatla tsa gago
ka ga botshelo
jwa banyana ba gago ba bannye,
ba ba idibalang ka tlala
fa dibaeng tsa mebila yotlhe fela.
20Leba Jehofa,
o bone ba o ba diretseng jaana!
A basadi ba tlaa ja loumo lwa bone,
e bong banyana ba ba akgolwang ka
mabogo?
A moperesiti le moperofeti
ba tlaa bolaelwa
mo felong ga boitshepo ga Morena?
21Tshimane le nnakgolo
di namaletse fa fatshe mo mebileng;
makgarebane a me le makau a me
a ole ka tšhaka;
o a bolaile
mo motlheng wa bogale jwa gago;
o bolaile o sa tlhomoge pelo.
22O biditse ditheregiso tsa me
mo ntlheng tsotlhe
jaaka mo tsatsing la phuthego
e e masisi,
mme go ne go sa falola
le fa e le go sala ope mo motlheng
wa bogale jwa ga Jehofa.
Ba ke ba akgotseng ka ba otla,
mmaba wa me o ba jele o ba
supuditse.
Who We AreWhat We EelieveWhat We Do
2025 by iamachristian.org,Inc All rights reserved.
