PESALEMA 105 - SetswanaTswana 1908/1992（TSW08NO）

Dikgakgamatso tsa Modimo ka ga Iseraele

1A ko lo ntshetseng Jehofa

malebogo,

bitsang leina la gagwe;

madiro a gagwe

lo a itsefatse mo ditšhabeng.

2Mo opeleleng,

mo opeleleng dipako;

buang ka ga ditiro tsa gagwe tsotlhe

tse di gakgamatsang.

3Kgantshang ka leina la gagwe

le le boitshepo;

a dipelo tsa ba ba batlang Jehofa

di itumele.

4Batlang Jehofa le thata ya gagwe;

batlang sefatlhogo sa gagwe

ka bosakhutleng.

5Gakologelwang ditiro tsa gagwe

tse di gakgamatsang

tse o di dirileng;

dikgakgamatso tsa gagwe,

le dikatlholo tsa molomo wa gagwe;

6lona losika lwa ga Aberahame,

motlhanka wa gagwe;

lona bana ba ga Jakobe,

baitshenkedwi ba gagwe.

7Ke ene Jehofa Modimo wa rona;

dikatlholo tsa gagwe

di mo lefatsheng lotlhe fela.

8O ntse a gakologetswe

kgolagano ya gagwe

ka bosakhutleng,

e bong lefoko le o le laoletseng

dikokomana di le makgolo a some;

9 e bong kgolagano

e o neng a e dira le Aberahame,

le ikano ya gagwe le Isake;

10 mme ikano e,

a e tlhomamisetsa Jakobe

gore e nne molao o o emeng,

le mo go Iseraele

gore e nne kgolagano

e e sa khutleng.

11Ka a re:

“Ke tlaa go naya lefatshe la Kanana,

go nna kabelo ya boswa jwa lona.”

12E le jale

ba sa ntse ba se kaye mo palong;

ee, ba se kayenyana, ba bile

ba le bajaki fela mo go lone;

13ba kgarakgatshega ka go nna

ba tlhomaganya merafe fela,

ba tswe mo bogosing bongwe

ba ye mo tšhabeng e nngwe.

14 Ga a ka a leseletsa motho ope

go ba direla tshiamololo;

ee, o ne a kgalemela dikgosi

ka ntlha ya bone;

15a re:

“Se ameng batlodiwa ba me,

lo se ka lwa utlwisa

baperofeti ba me botlhoko bope.”

16 A biletsa leuba mo lefatsheng;

a roba seikokotlelo sotlhe

sa senkgwe.

17 A roma monna

yo o neng a ba etelela pele;

Josefe a rekisiwa, a nna motlhanka;

18 dinao tsa gagwe

ba di utlwisa botlhoko

ka tse di golegang; a tsenngwa

mo diketaneng tsa tshipi;

19ga ba ga tla ga fitlha motlha

wa go dirafala ga lefoko la gagwe;

lefoko la ga Jehofa la mo leka.

20 Kgosi ya roma,

ya mo hunolola dikgole;

e bong molaodi wa ditšhaba,

mme a mo lesa a tswa fela.

21 A mo dira morena wa ntlo ya gagwe,

le molaodi wa dithoto tsotlhe

tsa gagwe;

22gore a golege dikgosana tsa gagwe

ka fa o ratang ka gone,

le gore a rute bagolwane

ba gagwe botlhale.

23 Iseraele le ene a tla mo Egepeto;

Jakobe a jaka mo lefatsheng

la ga Hame.

24 Mme Jehofa a atisa ba gagwe thata,

a ba baya go nna thata bogolo

go feta baganetsi ba bone.

25A sokolola pelo ya bone

gore ba ile batho ba gagwe,

go direla batlhanka ba gagwe

ka boferefere.

26 A roma Moše, motlhanka wa gagwe,

le ene Arone

yo o mo itshenketseng.

27Ba tlhoma ditshupo tsa gagwe

fa gare ga bone,

le dikgakgamatso tsa gagwe

mo lefatsheng la ga Hame.

28 A tlhoma lefifi, mme a le fifatsa;

mme ga ba a ka ba tsuololela

mafoko a gagwe.

29 A fetola metsi a bone a nna madi,

a bolaya ditlhapi tsa bone.

30 Lefatshe la bone

la nna le lesaisai la digwagwa,

le mo matlwaneng a dikgosi.

31 A bua, mme ga tla metshitshi ya

dintshi le dinta mo melelwaneng

yotlhe ya bone.

32 A ba naya sefako

mo boemong jwa pula,

le molelo o o tutumang

mo lefatsheng la bone.

33A kgemetha mafine a bone le one,

le ditlhare tsa mafeige tsa bone;

a robakanya ditlhare tsa melelwane

ya bone.

34 A bua, mme tsie ya tla le seboko,

mme ya bo e le mo go se nang palo,

35mme tsa ja tsa swetsa merogo yotlhe

mo lefatsheng la bone,

tsa ba tsa ja tsa bilatsa

loungo lwa mmu wa bone.

36 Le gone a gaila batsalwapele botlhe

mo lefatsheng la bone,

tshimologo ya thata yotlhe

ya bone.

37 Mme a ba ntsha

ba tswa ba na le selefera le gouta;

mme go ne go se na motho ope

yo o sekoa mo ditšhabeng tsa gagwe.

38E rile ba bothologa,

Egepeto a itumela;

gonne poifo ya bone

e ne e ba wetse.

39 A tsharolola leru go nna sesiro;

le molelo go sedifatsa bosigo.

40 Ba lopa,

mme a lere makwetekwio,

a ba kgorisa ka senkgwe

sa legodimo.

41 A arola lefika,

metsi a tšhabanyetsega;

a elela mo mafelong a a lokgere

jaaka noka.

42Gonne a gakologelwa lefoko

la gagwe le le boitshepo

le ene Aberahame

motlhanka wa gagwe.

43A ntsha batho ba gagwe,

ba tswa ka boitumelo,

le baitshenkedwi ba gagwe

ka go opela;

44 a ba naya mafatshe a merafe;

ba tsaya mohuhutso wa ditšhaba;

ba o rua;

45gore ba tle ba boloke

ditao tsa gagwe,

ba tlhokomele melao ya gagwe.

Bakang Jehofa.