1Phuthego yotlhe ya bana ba Iseraele ya tloga ya tswa mo nageng ya Sine, ka go tshetsa, ka fa taolong ya ga Jehofa, ba thibelela mo Refidime; mme ga bo go se na metsi a batho ba ka a nwang.
2Batho ba ganela le Moše ka ntlha ya gone moo, ba re: “Re neye metsi gore re nwe.” Moše a ba raya a re: “Lo ganelelang le nna? Lo leka Jehofa ka ntlha yang?”
3Batho ba nyorelwa metsi go nwa; batho ba ngongoregela Moše ba re: “O ne o re ntshetsang kwa Egepeto o tla go re bolaya le bana ba rona, le dikgomo tsa rona, ka lenyora?”
4Moše a tlhaeletsa kwa go Jehofa, a re: “Batho ba ke tlaa ba dirang? Ekete ba iketleeditse go nkgobotletsa ka maje.”
5Jehofa a raya Moše a re: “Fetela kwa pele ga batho, o itseele bagolwane bangwe ba Iseraele; o bo o tseye le thobane ya gago, e o ne wa itaya noka ka yone, o e tshole ka seatla, o tsamaye.
6Ke tlaa ema fa pele ga gago gone mo lefikeng mo Horebe; o tlaa itaya lefika mme metsi a tlaa tswa mo go lone gore batho ba nwe.” Moše a dira jalo mo ponong ya bagolwane ba Iseraele.
7Golo foo a go raya leina a re: Masa le Meriba, ka ntlha ya kganelo ya bana ba Iseraele, le ka gonne ba ne ba leka Jehofa ba re: “A Jehofa o mo gare ga rona kgotsa nnyaa?”
Ntwa le ba Amaleke8Foo ga tla Amaleke, a tlhabana le Iseraele mo Refidime.
9Moše a raya Jošua a re: “Re tlhaolele banna, o bolole o ye go tlhabana le Amaleke; ka moso ke tlaa tsoga ke ema kwa tlhoreng ya thaba ke tshotse thobane ya Modimo mo seatleng sa me.”
10Jalo Jošua a dira jaaka Moše a mo reile, a tlhabana le Amaleke. Moše, le Arone, le Hure, ba tlhatlogela kwa tlhoreng ya thaba.
11Ga diragala, e ne e re fa Moše a tsholeditse letsogo, Iseraele a ba thatafalele; e re fa a digile letsogo, Amaleke a ba thatafalele.
12Mabogo a ga Moše a bo a le bokete; mme ba tsaya lentswe, ba le baya tlase ga gagwe, a dula mo go lone. Arone le Hure ba tshegetsa mabogo a gagwe, mongwe a le ka fa ntlheng nngwe, yo mongwe a le ka fa ntlheng e nngwe; mme mabogo a gagwe a sisibala ga tsamaya letsatsi la phirima.
13Mme Jošua a koafatsa Amaleke le batho ba gagwe ka bogale jwa tšhaka.
14 Jehofa a raya Moše a re: “Kwala se mo lokwalong gore e nne segopodiso, o se tsenye Jošua ka ditsebe o re: Ke tlaa phimolela ruri kgakologelo ya ga Amaleke, e tloga fa tlase ga legodimo.”
15Moše a aga sebeso, a se raya leina a re, Jehofa-nisi;
16a re: “Jehofa o ikanne; Jehofa o tlaa nna ntwa le Amaleke go tswa mo losikeng longwe go ya mo losikeng lo longwe.”
Who We AreWhat We EelieveWhat We Do
2025 by iamachristian.org,Inc All rights reserved.
