1 Foo Jehofa a nthaya, a re: “Le fa bo Moše le Samuele ba ka bo ba eme fa pele ga me, le fa go ntse jalo pelo ya me e ne e sa kake ya nna le batho ba; ba ole mo ponong ya me, ba tswe ba ye koo.
2 Go tlaa dirala go re, e tlaa re ba go raya ba re: ‘Re tlaa tswela kae?’ Foo o ba bolelele, o re: Go bua jaana Jehofa, a re:
“ ‘Ba ba laoletsweng loso, ba ye losong;
ba ba laoletsweng tšhaka,
ba ye tšhakeng;
le ba ba laoletsweng moswele
ba ye mosweleng;
le ba ba laoletsweng botshwaro
ba ye botshwarong.’
3“Ke tlaa ba laolela dilo tse di mehuta mene,” go bua Jehofa; “tšhaka go bolaya, dintša go gagola, dinonyane tsa legodimo, le dibatana tsa lefatshe, go suputsa le go senya.
4 Ke tlaa ba akgaakgela mo magosing otlhe a lefatshe, ka ntlha ya ga Manase morwa Hesekia kgosi ya Juta, ka ntlha ya se o se dirileng mo Jerusalema.
5“Gonne e mang yo o tlaa go
tlhomogelang pelo,
wena Jerusalema? Kgotsa e mang
yo o tlaa go tukuthelang tlhogo?
Kgotsa e mang yo o tlaa fapogang
a ya go botsa ka fa o ntseng ka teng?
6O nkganne, go bua Jehofa,
o boetse kwa morago,
ke gone ka moo ke go otlololetseng
seatla sa me, mme ka go senya;
mme ke lapile
ka go nna ke ikwatlhaya.
7Ke ba olositse ka seoloso
mo dikgorong tsa lefatshe;
ke ba thukhuthile bana,
ke sentse batho ba me;
ga ba a boa mo
ditseleng tsa bone.
8Basadi ba bone ba batlholagadi
ba intsifaletse
go feta mošawa wa mawatle;
ke lerile mo go bone mothopi
go le motshegare
go tla a bolaya mma makau:
ke digetse tlalelo e e mahehe
le ditheregiso mo go ene
ka tshoganetso.
9Yo o tsetseng bana basupa
o a tapetega, o dule mowa;
letsatsi la gagwe le kotlometse
go sa ntse go le motshegare;
o ntse a tlhajwa
ke ditlhong a sosobagana;
masalela a bone ke tlaa a neela
tšhaka fa pele ga baba ba bone,”
go bua Jehofa.
Jeremia o isa dingongorego tsa gagwe mo Moreneng10Ija! Mma we! Ka e le fa o ntsetse ke le motho wa komang le kgang le lefatshe lotlhe! Ga ke a adima ope ka go lopa koketso, le nna batho ga ba a nkadima ka go ntopa koketso; le fa go ntse jalo mongwe le mongwe wa bone o a mphutsa.
11Jehofa a re: “Ruri ke tlaa go thatafatsa gore o bone molemo; ruri ke tlaa dira gore mmaba a go rapele ka thata mo motlheng wa bosula, le mo motlheng wa patikego.”
12A mongwe o ka roba tshipi, e bong tshipi e e tswang ntlheng ya botsheka, le kgotlho?
13“Thoto ya gago le dikhumo tsa gago ke tlaa di ntsha thopo fela di sa rekwe, mme e be e le ka ntlha ya dibe tsotlhe tsa gago, e bong mo melelwaneng yotlhe ya gago.
14Ke tlaa di fetisa le baba ba gago di ya kwa lefatsheng le o sa le itseng; gonne go gotsitswe molelo mo bogaleng jwa me, o o tlaa fisang mo go lona.”
15Jehofa, o a itse;
o nkgopole, o ntekole,
mme o ntefetse
mo babogising ba me;
o se ka wa ntlosa
ka bopelotelele jwa gago;
o itse fa ke bonye go kgojwa
ka leina la gago.
16Mafoko a gago a ne a bonwa,
mme ka a ja;
mafoko a gago a ne a le boitumelo
mo go nna,
le boipelo jwa pelo ya me;
gonne ke bidiwa ka leina la gago,
Jehofa Modimo wa masomosomo.
17Ga ke a ka ka dula mo phuthegong
ya bone ba ba dirang mokete,
ga ke a ka ka duduetsa;
ka dula ke le nosi
ka ntlha ya seatla sa gago;
gonne o ntladitse ka tšhakgalo.
18Ana go ntse jang botlhoko jwa me
bo nnetse ruri,
le ntho ya me e le e e sa foleng,
e e ganang go fodisiwa?
A ruri o tlaa nna mo go nna
jaaka nokana e e tsietsang,
jaaka metsi a a sa tlhomamang?
19Ke gone Jehofa o bua jaana, a re:
“Fa o boa,
foo ke tlaa ba ke go tlisa gape,
gore o tle o eme fa pele ga me;
fa o lomolola se se tlhokegang
mo go se se bosula,
o tlaa nna jaaka molomo wa me;
ba tlaa boela mo go wena,
mme wena ga o ketla o boela
kwa go bone.
20Ke tlaa go dira go nna lorako
lwa kgotlho lo lo thekeleditsweng
kemalanong le batho ba;
ba tlaa tlhabana nao,
mme ga ba ketla ba go fenya;
gonne ke na nao
go go boloka le go go golola,”
go bua Jehofa.
21“Ke tlaa go golola mo seatleng sa
baikepi, ke ba ke go rekolola mo
seatleng sa ba ba boitshegang.”
Who We AreWhat We EelieveWhat We Do
2025 by iamachristian.org,Inc All rights reserved.
