1Jehofa, ganela le ba ba ganelang
le nna; o tlhabane
le ba ba tlhabanang le nna.
2Tsaya thebe le thejane,
mme o nkemele go nthusa.
3Lerumo le lone o le somole,
mme ba ba nkhukhelang
o ba thibele tsela;
o reye mowa wa me, o re:
“Ke nna poloka ya gago.”
4Ba ba tsomang mowa wa me
a ba tlhajwe ke ditlhong
ba tlotlololwe;
ba ba logang maano
a go nkutlwisa botlhoko,
a ba busediwe kwa morago,
ba sosobaganngwe.
5A ba nne jaaka mmoko mo phefong,
e be e nne moengele wa ga Jehofa
yo o ba kgopholang.
6A tsela ya bone e nne lefifi
le borethe,
e le moengele wa ga Jehofa
yo o ba khukhelang.
7Gonne ba ntshubetse lotloa lwa
bone mo lehuting ka bomo;
ba epetse mowa wa me lemena
ka bomo.
8A tshenyego e mo wele a itebetse;
a lotloa lwa gagwe lo o lo fitlhileng
lo tshware ene ka esi;
a a wele mo tshenyegong eo ka yosi.
9Mowa wa me o tlaa nna ka
boitumelo mo go Jehofa;
o tlaa itumela mo polokeng
ya gagwe.
10Marapo a me otlhe a tlaa re:
“Jehofa, mang yo o tshwanang nao?
Yo o gololang mohumanegi
mo go yo o thata bogolo go ene,
ee, mohumanegi le motlhoki
mo go ene yo o mo thukhuthang?”
11Basupi ba ba sa siamang ba tle ba
eme, ba mpotse
ka ga dilo tse ke sa di itseng.
12Ba ntefela molemo ka bosula,
ba thukhutha mowa wa me.
13Mme ka ga me,
e rile ba le botlhoko,
go apara ga me
ya bo e le matsela a kgetse;
ka patika mowa wa me
ka go ikitsa go ja;
morapelo wa me
wa ba wa boela mo sehubeng sa me.
14Ka etsa jaaka ekete ke direla tsala
ya me kgotsa ngwana wa ga rre;
ka obega ka khutsafalo jaaka
mongwe yo o lelelang mmaagwe.
15Nna e rile ke tlhotsa,
bone ba itumela,
ba ba ba phuthega mmogo;
ba babenyana ba mphuthegela
mmogo,
mme ka bo ke sa itse;
ba nkgagola ba se ka ba khutla,
16jaaka basotli ba ba matlhapa mo
medirong, ba ntšhenetse meno.
17Jehofa o tlaa leba fela
goleele go le kaye?
Falodisa mowa wa me
mo ditshenyong tsa bone;
moratwanyana wa me mo ditaung.
18Ke tlaa go ntshetsa malebogo
mo phuthegong e kgolo;
ke tlaa go baka
mo bontsing jo bogolo jwa batho.
19 A ba e leng baba ba me
ba se itumele ka nna
ka mo go sa siamang;
le gone ba ba nkilang ka bomo
a ba se soke leitlho.
20Gonne ga ba bue kagiso;
ba baakanyetsa ba ba ntseng
ba ituletse fela
mo lefatsheng mafoko a tsietso.
21Ee, ba nkatlhamisetsa melomo ya
bone thata;
ba re: “Ahe! Ahe!
Leitlho la rona le go bonye.”
22Jehofa, wena o go bonye;
o se ka wa didimala;
Jehofa o se ka wa nna kgakala
le nna.
23Kubuga, o tsogele katlholo ya me,
e bong go mo go sekwang ga me,
Modimo wa me le Morena wa me.
24Nkatlhola, Jehofa, Modimo wa me,
ka fa tshiamong ya gago;
a ba se itumele ka nna.
25A ba se bue mo pelong ya bone
ba re: “Ahe! Re rata ga nna jalo.”
A ba se re: “Re mo komeditse.”
26A ba tlhajwe ke ditlhong,
ba sosobaganngwe mmogo
ba ba itumelelang kutlobotlhoko
ya me;
a ba ba inkgodisetsang ba apesiwe
ditlhong le tlotlologo.
27Ba ba tshabang le nna
ka ga mo ke go sekang ga tshiamo,
a ba duduetse ka boitumelo;
ee, a ba nne ba re ka gale:
“A go goletsege Jehofa
yo o kgatlhwang ke go kokotlegela
ga motlhanka wa gagwe.”
28Loleme lwa me lo tlaa bua
ka ga tshiamo ya gago,
le ka ga pako ya gago
ka letsatsi lotlhe fela.
Who We AreWhat We EelieveWhat We Do
2025 by iamachristian.org,Inc All rights reserved.
