1Modimo, o re latlheleletseng
ruri? Bogale jwa gago bo
tukelelang dinku
tsa bohulo jwa gago?
2Gakologelwa phuthego ya gago,
e o sa leng wa e reka bogologolo,
e o e rekolotseng, gore e nne
sešaba sa boswa jwa gago;
le thaba ya Sione
e o kileng wa aga mo go yone.
3Tsholeletsa dinao tsa gago
kwa maropeng
a a ntseng ka bosaengkae;
kwa bosuleng jo mmaba o bo
dirileng mo felong ga boitshepo.
4Baganetsi ba gago ba ntse ba bopa
fa gare ga phuthego ya gago;
ba tlhomile mekgele ya bone
go nna ditshupo.
5Ba kile ba nna jaaka ekete
ke batho ba ba ekelang sekgwa
sa ditlhare dilepe.
6Jaanong dilo tse di kwadilweng
ka botswerere ka go setwa,
ba di thubaka ka seletswana
le dinoto.
7Ba tshubetse felo ga gago
ga boitshepo;
ba itshepolotse boago jwa leina
la gago, ka go bo digela fa fatshe.
8Mo pelong tsa bone ba rile:
“A re di gasagaseng gotlhe fela;”
ba jele matlo a thuto a otlhe
a Modimo mo lefatsheng ka molelo.
9Ga re bone ditshupo tsa rona;
ga go tlhole go na le moperofeti ope;
le gone ga go na ope yo o itseng
gore ke lobaka lo lo kaye.
10Modimo,
kana moganetsi o tlaa nna a kgoba
goleele go le kaye?
A mmaba o tlaa nna a tlhapatsa
leina la gago ka bosakhutleng?
11O gonelang letsogo la gago,
e bong letsogo la gago
le le siameng?
Le ntshe mo sehubeng sa gago
o ba nyeletse.
12Le fa go ntse jalo,
Modimo o ntse o le Kgosi ya me
le mo bogologolong,
o ntse o dira poloko
mo gare ga lefatshe.
13 O ne wa kgaoganya lewatle
ka nonofo ya gago;
wa thuba ditlhogo tsa dikgogela
mo metsing.
14 O thubagantse ditlhogo tsa kubu
e tona, wa e naya batho
ba ba ntseng mo nageng go e ja.
15O ne wa fatoganya motswedi
le morwalela;
wa kgadisa dinoka tse dikgolo thata.
16Motshegare ke wa gago,
bosigo le gone ke jwa gago;
o baakantse lesedi le letsatsi.
17O tlhomile dithoko tsotlhe
tsa lefatshe;
o dirile selemo le mariga.
18Gakologelwa mo, Jehofa,
go re mmaba o kgobile,
le go re batho ba ba dieleele
ba tlhapaditse leina la gago.
19O se ka wa neela sebatana
mowa wa lephoi la gago;
o se ka wa lebala botshelo
jwa bahumanegi ba gago
ka bosakhutleng.
20Tlhokomela kgolagano,
gonne mafelo a a lefifi a lefatshe
a tletse maago a thubakanyo.
21A bapatikwi
ba ke ba se ka ba bowa ka ditlhong;
a bahumanegi le batlhoki
ba bake leina la gago.
22Modimo, nanoga o ipuelele
mo kgannyeng ya gago;
gakologelwa ka fa motho wa seeleele
o tlholang a go kgoba ka letsatsi
lotlhe ka teng.
23O se ka wa lebala lentswe
la baganetsi ba gago;
tlhapeo ya ba ba go tsogologelang
e tlhatloga ka gale le ka gale.
Who We AreWhat We EelieveWhat We Do
2025 by iamachristian.org,Inc All rights reserved.
